Melɛyɛ Dɔɔnwo Ɔ?
1. Ninyɛne boni mɔ a bahola agyegye Keleseɛnenli mɔɔ di nɔhalɛ la ɛ?
1 Asoo wɔbiza ɛ nwo zɔhane kpuyia ne ɛlɛ? Bie a, wɔ mɔdenlebɔlɛ wɔ ɛzonlenlɛ gyima ne anu ɛha aze, ɔluakɛ ɛlɛyɛ kpanyinli, ɛlɛ kpɔkɛdelɛ nwo ngyegyelɛ anzɛɛ wɔ abusua nu ɛzonlelilɛ ɛzo na ɔmmaa ɛngola dɔɔnwo yɛ la ati. Adiema raalɛ ko mɔɔ lɛ ngakula nsa la hɛlɛle kɛ, ɔyɛ a mete nganeɛ kɛ medi nwolɛ ɛzonle, ɔluakɛ mekɛ nee anwosesebɛ mɔɔ hyia mɔɔ mefa menea me abusua ne la ɛmmaa mengola dɔɔnwo yɛ wɔ ɛzonlenlɛ gyima ne anu. Duzu a baboa yɛ yeamaa yɛazuzu edwɛkɛ nwo wɔ adenle kpalɛ zo a?
2. Duzu a Gyihova kulo kɛ yɛyɛ a?
2 Mɔɔ Gyihova Kulo Kɛ Yɛyɛ La: Ɔda ali kɛ, yɛ kɔsɔɔti yɛkulo kɛ yɛyɛ dɔɔnwo wɔ ɛzonlenlɛ gyima ne anu. Noko, fane dɔɔnwo ne ala ngakyile kpole wɔ mɔɔ yɛkulo kɛ yɛyɛ nee mɔɔ yɛbahola yɛayɛ ye amgba la anu. Nɔhalɛ mɔɔ de kɛ yɛkulo kɛ yɛyɛ dɔɔnwo la kile kɛ, mɔɔ yɛlɛyɛ ala la ɛnzɔ yɛ nye. Ɔwɔ kɛ yɛkakye kɛ, Gyihova ze yɛ sinlidɔlɛ kpalɛ na ɔngulo kɛ yɛyɛ mɔɔ yɛnrɛhola ye yɛ la. (Edw. 103:13, 14) Duzu a ɔkulo kɛ yɛyɛ a? Ɔkulo kɛ yɛfi yɛ ahonle nu yɛyɛ biala mɔɔ yɛbahola la yɛfa yɛsonle ye.—Kɔl. 3:23.
3. Kɛ ɔkɛyɛ na yɛanleɛnlea mɔdenle mɔɔ yɛlɛbɔ ye wɔ ɛzonlenlɛ gyima ne anu la anu ɛ?
3 Duzu a baboa yɛ yeamaa yɛanwu mɔɔ yɛbahola yɛayɛ la ɛ? Yɛbahola yɛazɛlɛ Gyihova kɛ ɔboa yɛ ɔmaa yɛnwu gyinlabelɛ mɔɔ yɛwɔ nu la kpalɛ. (Edw. 26:2) Yɛ gɔnwo Keleseɛnenli mɔɔ ɛnyi wɔ sunsum nu, mɔɔ ze yɛ kpalɛ na yɛlɛ ye nu anwodozo, mɔɔ ɔbahola yeaha ɛleka mɔɔ hyia kɛ yɛnyia anyuhɔlɛ la bahola aboa yɛ. (Mrɛ. 27:9) Kakye noko kɛ kɛmɔ tɛnlabelɛ nu edwɛkɛ kakyi la ati, nvasoɛ wɔ zo kɛ yɛkɛnleɛnlea gyinlabelɛ mɔɔ yɛwɔ nu la anu dahuu.—Ɛfɛ. 5:10.
4. Kɛzi ɔwɔ kɛ yɛbu Baebolo ne anu ngakyelɛ mɔɔ fane yɛ ɛzonlenlɛ gyima ne anwo la ɛ?
4 Kɛzi Ɔwɔ Kɛ Yɛbu Ngakyelɛ Ne Mɔ La: Saa bɛlɛsu ɛnriandilɛ a, menli mɔɔ gyigyi ahane ɛlɛnea bie la ta tea nu maa bɛ anwosesebɛ. Bodane ne a le kɛ, bɛfa bɛaboa bɛ bɛamaa bɛazu ɛnriandilɛ ne bɛahɔ awieleɛ, na tɛ kɛ bɛmaa bɛ nwo mɔra adu ɔ. Zɔhane ala a folɛdulɛ mɔɔ gyi Baebolo ne azo nee ngakyelɛ mɔɔ wɔ yɛ mbuluku ne mɔ anu nee mɔɔ bɛka bɛkile yɛ wɔ debiezukoalɛ bo kɛ yɛbɔ ‘edwɛkpa ne nolo’ ndɛndɛ la le mɔɔ bɛfa bɛboa yɛ a, na ɔngile kɛ yɛ mɔdenlebɔlɛ ne ɛnzɔ ɛnyelɛ la ati ɔ. (2 Tem. 4:2) Yɛbahola yɛanyia anwodozo kɛ, mekɛ ala mɔɔ yɛlɛbɔ mɔdenle yɛayɛ mɔɔ yɛbahola biala la, Gyihova bavi ɛlɔlɛ nu ahakye yɛ ‘gyima nee ɛhulolɛ’ mɔɔ yɛda ye ali la.—Hib. 6:10.