Kilehile Maa Bɛlie Bɛli
1. Nyamenle Edwɛkɛ ne mɔɔ bɛfa bɛdi gyima kpalɛ wɔ daselɛlilɛ nu la ta kile duzu?
1 Menli mɔɔ bɔ mɔdenle yɛ ɛzonlenlɛ gyima ne kpalɛ kɛ ɛzoanvolɛ Pɔɔlo la, die to nu kɛ “Nyamenle nɔhalɛ edwɛkɛ ne” ɛhilehilelɛ kpalɛ kile dɔɔnwo tɛla Baebolo ne mɔɔ bɛka nuhua edwɛkɛ ala la. (2 Tem. 2:15) Saa yɛlɛfa Nyamenle Edwɛkɛ ne yɛali gyima a, kɛ ɔkɛyɛ na yɛ ngilehilelɛ ne ayɛ mɔɔ ‘bɛdie bɛdi’ ɛ?—Gyi. 28:23.
2. Kɛ ɔkɛyɛ na yɛamaa menli anye alie Nyamenle Edwɛkɛ ne anwo kpalɛ ɛ?
2 Maa Nyamenle Edwɛkɛ Ne Ɛdendɛ: Mɔɔ lumua la, twe adwenle kɔ Baebolo ne azo wɔ adenle mɔɔ maa bɛnyia ɛbulɛ bɛmaa Nyamenle nrɛlɛbɛ mɔɔ wɔ nu la azo. Anwodozo mɔɔ yɛlɛ wɔ Nyamenle Edwɛkɛ ne anu la baboa tievolɛ ne yeamaa yeadie ngɛlɛlera bie mɔɔ bɛlɛkenga la kpalɛ. (Hib. 4:12) Yɛbahola yɛaha ye sikalɛ kɛ: “Menwu kɛ nvasoɛ wɔ zo kɛ yɛbanwu mɔɔ Nyamenle ka wɔ edwɛkɛ ɛhye anwo la. Tie mɔɔ ye Edwɛkɛ ne ka la.” Saa ɔkɛyɛ boɛ a, dua Baebolo ne mɔɔ ɛbagenga ye fɔɔnwo la azo maa Nyamenle Edwɛkɛ ne ɛdendɛ.
3. Saa yɛkenga ngɛlɛlera bie yɛwie a, duzu a yɛbahola yɛayɛ yɛava yɛaboa yɛ tievolɛ ne na yeade ɔ bo a?
3 Mɔɔ tɔ zo nwiɔ, kilehile ngɛlɛlera ne mɔ mɔɔ bɛbagenga la anu. Ɔyɛ se ɔmaa menli dɔɔnwo kɛ bɛkɛde ngyehyɛnu bie abo wɔ mekɛ mɔɔ lumua mɔɔ bɛkɛgenga bɛkɛhile bɛ la. Fane dɔɔnwo ne ala, ɔwɔ kɛ yɛkilehile kɛzi ɔfane deɛ mɔɔ yɛlɛsukoa anwo la anu. (Luku 24:26, 27) Twe adwenle kɔ edwɛkɛtitile mɔɔ wɔ nu la azo. Yɛbahola yɛabiza kpuyia yɛava yɛanlea kɛ yede edwɛkɛ bie abo kpalɛ a.—Mrɛ. 20:5; Gyi. 8:30.
4. Debie mɔɔ li awieleɛ boni a ɔhyia kɛ yɛyɛ na bɛalie yɛ ngilehilelɛ ne bɛali a?
4 Suzu Ngɛlɛlera Ne Mɔ Anwo: Mɔɔ tɔ zo nsa, bɔ mɔdenle maa mɔɔ ɛkilehile la ɛhɔ ye adwenle nu na ɔha ye ahonle. Boa suamenle ne maa ɔnwu kɛzi ngyehyɛnu ne fane ɔ nwo la. Saa yɛsuzu Ngɛlɛlera ne mɔ anwo a, ɔbahola yeaboa yeamaa awie mɔɔ kɛlie kɛli la ahakyi ye adwenle. (Gyi. 17:2-4; 19:8) Kɛ neazo la, yɛkenga Edwɛndolɛ 83:18 yɛwie a, yɛbahola yɛazuzu kɛzi awie duma mɔɔ yɛkɛnwu la boa maa yɛfa ye agɔnwolɛ la anwo. Akee bie a yɛbabiza kɛ, “Ɛte nganeɛ kɛ saa ɛnwu Nyamenle duma a, ɔbamaa wɔ asɔneyɛlɛ agyinla kpɔkɛ zo ɔ?” Saa yɛmaa ngɛlɛlera ne fane suamenle ne ɛbɛlabɔlɛ nwo wɔ adenle zɛhae azo a, ɔmaa nvasoɛ mɔɔ wɔ zo la da ali. Nyamenle Edwɛkɛ ne mɔɔ yɛkilehile yɛmaa bɛdie bɛdi zɛhae la ka menli mɔɔ lɛ ahonle kpalɛ la maa bɛsonle nɔhalɛ nee tease Nyamenle Gyihova.—Gyɛ. 10:10.