Kpuyia Ɛleka

◼ Asoo ɔfɛta kɛ yɛkɛlɛ yɛ ti anwo Intanɛte address wɔ mbuluku mɔɔ yɛfa yɛmaa la azo?

Nolobɔlɛma bie mɔ fa setampe anzɛɛ debie gyɛne kɛlɛ bɛ ti anwo Intanɛte address wɔ magazine anzɛɛ tract mɔɔ bɛfa bɛmaa awie mɔ la azo. Menli mɔɔ die buluku ne la akee nee nolobɔlɛnli ne di ngitanwo. Mɔdenle zɛhae mɔɔ bɛbɔ bɛboa anyelielɛma la le adwenle kpalɛ. Noko akee bɛlumua bɛhile yɛ Intanɛte address mɔɔ yɛfa yɛdi gyima la wɔ magazine nee tract ne mɔ anzi. Ɛhye ati ɔkɛyɛ kpalɛ kɛ yɛnrɛhɛlɛ yɛ ti anwo Intanɛte address wɔ mbuluku ne mɔ azo.

Saa nolobɔlɛnli kɛmaa menli mɔɔ wɔ azɛlɛsinli ne anu la debie mɔɔ bamaa bɛanwu ye la wɔ kɛlata zo, titile wɔ mekɛ mɔɔ ɔlɛyɛ ɛkpɔlalɛ bieko la a, ɔle ɔ ti anwo kpɔkɛzilɛ. Ɔwɔ kɛ yɛbɔ mɔdenle yɛsia yɛkɔkpɔla menli mɔɔ kile nwolɛ anyelielɛ la, tɛla kɛ yɛkɛgyakyi debie yɛkɛmaa bɛ kɛ bɛlua zo bɛkpondɛ yɛ na bɛ sa aha nwolɛ edwɛkɛ dɔɔnwo. Saa yɛ nee awie tendɛ a, yɛɛ yɛkola yɛkile ɔ nwo anyelielɛ ndɛndɛ a.