Yɛ Nye Sɔ Nwolɛ Adenle Ngakyile Mɔɔ Yɛlɛ!
1 Sumunli kɛ bɛbɔle alesama la, Gyihova ɛmaa ye azonvolɛ ɛnyia nwolɛ adenle ngakyile dɔɔnwo. Yemaa bɛnyia nwolɛ adenle dɔɔnwo mɔɔ ɔnnea bɛ ɛvolɛ, bɛ gyinlabelɛ, kɛ bɛle mrenya anzɛɛ mraalɛ. (Luk. 1:41, 42; Gyi. 7:46; Fel. 1:29) Nwolɛ adenle boni mɔ a ɔmaa yɛnyia bɛ ɛnɛ a?
2 Nwolɛ Adenle Mɔɔ Yɛlɛ la Bie Mɔ: Gyihova mɔɔ ɛlɛkilehile yɛ la le nwolɛ adenle mɔɔ yɛnyia. (Mat. 13:11, 15) Mualɛ mɔɔ yɛmaa wɔ asafo ayia bo yɛfa yɛye Gyihova ayɛlɛ la le nwolɛ adenle bieko mɔɔ yɛlɛ. (Edw. 35:18) Saa yɛnyia adenle kɛ yɛmaa mualɛ a, yɛfa anyelielɛ a yɛmaa a. Zɔhane ala a, saa yɛbu gyimalilɛ ko biala mɔɔ yɛnyia ye wɔ asafo ne anu la kɛ ɔle nwolɛ adenle a, yɛbava yɛ anwosesebɛ kɔsɔɔti yɛayɛ a. Asoo yɛfa yɛ nwo yɛwula adenle mɔɔ yɛlɛ yɛnea Belemgbunlililɛ Asalo ne azo boɛ na yɛsiezie ɛkɛ ne la anu dahuu ɔ?
3 Menli mgbe dɔɔnwo ɛngola ɛnnwu ye saa Nyamenle tie bɛ nzɛlɛlɛ a, noko yɛmɛ Sonla Kpole mɔɔ tɛla biala wɔ maanzaleɛ ye anu la tie yɛ asɔneyɛlɛ. (Mrɛ. 15:29) Gyihova mumua ne tie ye azonvolɛ asɔneyɛlɛ. (1 Pit. 3:12) Ɔndo fane dodo mɔɔ ɔwɔ kɛ yɛba ɔ nyunlu la ɛweɛne. Nea nwolɛ adenle kpole mɔɔ yɛlɛ kɛ yɛkola yɛyɛ asɔne “mekɛ biala” a!—Ɛfɛ. 6:18.
4 ‘Nyamenle Agɔnwo Gyimayɛvoma’: Nwolɛ adenle kɛnlɛma mɔɔ yɛnyia ye la ko a le Nyamenle Belemgbunlililɛ edwɛkpa ne mɔɔ yɛlɛbɔ ye nolo kɛ ‘Nyamenle agɔnwo gyimayɛvoma’ la. (1 Kɔl. 3:9) Ɛhye le gyima mɔɔ maa yɛnyia ahunlundwolɛ nee anyelielɛ a. (Dw. 4:34) Ɔngyia kɛ Gyihova kɛva menli kɛli gyima na yeahola yeayɛ gyima ɛhye, noko yeva yewula yɛ sa ɔluakɛ ɔkulo yɛ. (Luk. 19:39, 40) Noko, tɛ awie biala a Gyihova ɛva nwolɛ adenle ɛhye ɛmaa ye a. Ɔwɔ kɛ menli mɔɔ yɛ bagua nu ɛzonlenlɛ gyima ne la dwu sunsum nu ninyɛne bie mɔ anwo. (Aye. 52:11) Asoo yɛ nye sɔ nwolɛ adenle ɛhye na yɛfa ɛzonlenlɛ gyima ne yɛdumua mɔɔ yɛyɛ ye dapɛne biala la anyunlu ɔ?
5 Nwolɛ adenle mɔɔ Gyihova fa maa yɛ la maa yɛ asetɛnla nyia atiakunlukpɔkɛ. (Mrɛ. 10:22) Bɛmmamaa yɛbu yɛ nye yɛgua zo ɛlɛ! Saa yɛkile kɛ yɛ nye sɔ ɛzonlenlɛ nu nwolɛ adenle mɔɔ yɛlɛ la a, yɛmaa yɛ anwuma Selɛ ne, “ɛlolɛdeɛ kpalɛ biala nee ahyɛlɛdeɛ biala mɔɔ di munli” Maavolɛ ne, anye die.—Gye. 1:17.