“Ɛhye Le Ahyɛlɛdeɛ Mɔɔ Tɛla Biala Mɔɔ Menyianle A”

Ɛhye a ɛvolɛ 13 kakula raalɛ bie hanle wɔ mekɛ mɔɔ awie hyɛle ye twea la a. Raalɛ bie mɔɔ ɛnyia anyuhɔlɛ wɔ gualilɛ nu la hanle kɛ kɔmpita bie mɔɔ ye papa vale maanle ye wɔ mekɛ mɔɔ ɛnee ɔkɔ ndoazo sukulu la hakyile ye ɛbɛlabɔlɛ. Kunli bie nwunle kaade bie mɔɔ ɔ ye vale maanle ye wɔ mekɛ mɔɔ ɛnee bɛnyia ɛvolɛ ko wɔ bɛ agyalɛ ne anu la kɛ yemɔ a le ahyɛlɛdeɛ mɔɔ sonle bolɛ maa ye a.

Ɛvolɛ biala menli dɔɔnwo fa mekɛ dɔɔnwo kpondɛ ahyɛlɛdeɛ mɔɔ “tɛla biala” la maa bɛ busuanli anzɛɛ bɛ gɔnwo wɔ mekɛ titili bie anu. Saa menli ɛhye mɔ kile nwolɛ anyezɔlɛ kɛ mɔɔ yɛha nwolɛ edwɛkɛ wɔ anwuma ɛkɛ ne la a, bɛ nye die nwo. Na ɛdawɔ ɛ? Ɛ nye balie nwo kɛ awie mɔ bahile wɔ ahyɛlɛdeɛ nwo anyezɔlɛ anzɛɛ ɛdawɔ noko ɛbahile awie mɔ ɛdeɛ nwo anyezɔlɛ ɔ?

Ɛhye yɛ anyelielɛ kpalɛ, ɔluakɛ tɛ ahenle mɔɔ ɛfa ahyɛlɛdeɛ ne wɔamaa ye la angome a di nwolɛ fɛlɛko a, emomu ɛdawɔ noko mɔɔ ɛfa ahyɛlɛdeɛ ne wɔamaa la. Baebolo ne ka kɛ: “Anyelielɛ dɔɔnwo wɔ ɛmaanlɛ nu tɛla ɛlielɛ.” (Gyima ne 20:35) Saa ɛkyɛ awie debie na ɔ nye sɔ ye kpalɛ a, ɔmaa ɛ nye die kpole.

Kɛ ɔkɛyɛ na ɛ nee awie mɔɔ ɛkyɛ ye debie la anye alie ɛ? Na saa ɛngola ɛnwu ahyɛlɛdeɛ mɔɔ “fɛta” la a, duzu a ɛbayɛ a?