Kpondɛ Moalɛ Na Te Baebolo Ne Abo

Fa ye kɛ ɛlɛkɔ maanle bie anu wɔ mekɛ mɔɔ limoa la. Ɛbanwu menli, amaamuo, aleɛ nee ezukoa mɔɔ ɛtɛnwunle bie ɛlɛ la. Ye biala anu, ɛ nye zo bada wɔ.

Bie a ɛbade nganeɛ zɔhane wɔ mekɛ mɔɔ ɛbalimoa wɔagenga Baebolo ne la. Ɔbava wɔ yeahɔ tete ewiade bie mɔɔ ɛnze ɛkɛ ne la anu. Ɛbayia menli bie mɔɔ bɛfɛlɛ bɛ Filisitiama, ɛbanwu amaamuo bie mɔɔ le kɛ “bɛsuosua bɛ adɛladeɛ ne mɔ anu,” anzɛɛ aleɛ bie mɔɔ bɛfɛlɛ ye mana yɛɛ ezukoa bie mɔɔ bɛfɛlɛ ye kpɔba la. (Adendulɛ 16:31; Dwɔhyua 13:2; 2 Samoɛle 3:31; Luku 15:9) Ninyɛne ɛhye mɔ amuala bada ɛ nye zo. Kɛ mɔɔ ɛlɛkɔ maanle gyɛne nu a ɔde la, asoo ɛ nye ɛnrɛlie kɛ ɛbanyia awie mɔɔ bahilehile ninyɛne nu ahile wɔ la ɔ?

MOALƐ MƆƆ BƐNYIANLE WƆ TETE NE LA

Ɔbɔ ye ɛvoya 16 K.Y.M. anu mɔɔ bɛhɛlɛle ngɛlɛlera nwuanzanwuanza ne la, bɛboa menli amaa bɛade ɔ bo. Kɛ neazo la, Mosisi mɔɔ le Yizilayɛ maanle ne adekilevolɛ mɔɔ limoa la “vale ziele ɔ nyunlu na ɔhilehilele” mɔɔ bɛhɛlɛ la anu.​—Mɛla ne 1:5.

Kɛyɛ ɛvoya bulu anzi, ɛnee menli mɔɔ kilehile Ngɛlɛlera ne anu kpalɛ la wɔ ɛkɛ. Wɔ 455 K.Y.M., Dwuuma dɔɔnwo mɔɔ ngakula boka nwo la yiale bagua nu wɔ suakpole Gyɛlusalɛm azo. Ɛnee Baebolo kilehilevolɛma wɔ ɛkɛ ‘ɛlɛkenga buluku [nwuanzanwuanza ko ne ala].’ Noko tɛ ɛhye angome. “Bɛhilehilele nuhua wienyi bɛhilele bɛ, amaa bɛade ɔ bo kpalɛ.”​—Nihɛmaya 8:1-8.

Ɛvoya nnu anzi, Gyisɛse Kelaese yɛle ngilehilelɛ gyima ko ne ala bie. Nɔhalɛ nu, ɛnee bɛze ye kɛ ɔle kilehilevolɛ. (Dwɔn 13:13) Ɔhilehilele menli dɔɔnwo yɛɛ awie mɔ gyɛne. Mekɛ bie, ɔdendɛle ɔhilele menli dɔɔnwo kpalɛ, ɔhanle ye Boka Zo Edwɛkɛhanlɛ ne mɔɔ ɛlie duma la, na “ye ngilehilelɛ ne zinle menli dɔɔnwo ne anwo.” (Mateyu 5:1, 2; 7:28) Wɔ 33 Y.M. nyenyesuo mekɛ nu, Gyisɛse nee ye ɛdoavolɛma nwiɔ dendɛle wɔ mekɛ mɔɔ bɛlua adenle zo bɛlɛkɔ namule bie mɔɔ bikye Gyɛlusalɛm azo la, ‘ɔhilehilele Nyamenle Edwɛkɛ ne anu’ kpalɛ ɔhilele bɛ.​—Luku 24:13-15, 27, 32.

Ɛnee Gyisɛse ɛdoavolɛma noko kilehile Nyamenle Edwɛkɛ ne anu. Mekɛ bie, ɛnee Yiteyopea kpanyinli bie ɛlɛkenga Ngɛlɛlera ne foa bie. Ɛdoavolɛ Felepe bikyele ye na ɔbizale kɛ: “Asoo ɛte mɔɔ ɛlɛkenga la abo ɔ?” Yiteyopeanli ne buale kɛ: “Na kɛ mesi meyɛ mete ɔ bo ɛ? Kyesɛ awie kilehile nu kile me.” Akee Felepe hilehilele foa zɔhane anu hilele ye.​—Gyima ne 8:27-35.

MOALƐ WƆ ƐKƐ NE ƐNƐ

Kɛ mɔɔ Baebolo kilehilevolɛma yɛle wɔ tete ne la, ɛnɛ Gyihova Alasevolɛ ne mɔ ɛlɛyɛ Baebolo ngilehilelɛ gyima ne wɔ maanle 239 anu wɔ ewiade amuala. (Mateyu 28:19, 20) Dapɛne biala, bɛboa menli mɔɔ bo mgbe ngɔnla la bɛmaa bɛte Baebolo ne abo. Menli mɔɔ bɛ nee bɛ sukoa la anu dɔɔnwo ɛngɔ asɔne. Bɛndua debiezukoalɛ ne anwo ɛhwee na bɛbahola bɛayɛ ye wɔ wɔ sua nu anzɛɛ ɛleka mɔɔ baboa wɔ la. Menli bie mɔ dua fonu, vidio anzɛɛ kɔmpita zo a sukoa a.

Yɛsɛlɛ wɔ nwu Gyihova Alasevolɛ ne mɔ bie maa bɛhile wɔ kɛzi ngyehyɛleɛ ɛhye bahola aboa wɔ la. Ɛbanwu ye kɛ, kɛ anrɛɛ Baebolo ne bayɛ buluku mɔɔ bɛnde ɔ bo la, ɔle ‘kpalɛ ɔmaa nɔhalɛ ne ɛhilehilelɛ, sonla nyunlu ɛhwilɛ, folɛdulɛ, yɛɛ menli ɛtetelɛ wɔ ɛbɛla kpalɛ ɛbɔlɛ nu,’ amaa wɔali ‘munli na yeaziezie wɔ yeamaa wɔayɛ gyima kpalɛ.’​—2 Temɔte 3:16, 17.