Me nye liele Baebolo ne mualɛ mɔɔ ndelebɛbo wɔ nu la anwo

ME ƐBƐLA DƐBA:

Bɛwole me wɔ Székesfehérvár, Hungary sua bie mɔɔ lɛ tetedwɛkɛ mɔɔ yɛ anyelielɛ wɔ ɛvolɛ mɔɔ bo 1,000 mɔɔ ɛze la anu. Ɔyɛ alɔbɔlɛ kɛ, metɛkakye ngyegyelɛ mɔɔ ewiade konle mɔɔ tɔ zo nwiɔ vale rale la.

Me nenya nee me nana a tetele me wɔ me ngakula nu a. Mekakye bɛ a ɛnee me nye ɛlie​—titile me nana Elisabeth. Ɔmanle menyianle Nyamenle anu diedi kpole. Menyiale ɛvolɛ nsa la, ɛnee me nee ye yɛ Awulae Nzɛlɛlɛ ne nɔsolɛ biala. Noko, me ɛvolɛ 20 ne anu yɛɛ mendele zɔhane asɔneyɛlɛ ne abo kpalɛ a.

Me nenya nee me nana tetele me wɔ me ngakula nu, ɔluakɛ ɛnee me awovolɛ yɛ gyima dahuu kɛ bɛkpondɛ ezukoa na bɛadɔ sua kpalɛ la ati. Noko abusua ne kɔsɔɔti bɔ nu di aleɛ wɔ Folɛ mɔɔ tɔ zo nwiɔ biala la anu. Me nye liele zɔhane mekɛ ne mɔ anwo.

Mɔɔ me awovolɛ anye la zo la rale nu wɔ 1958; bɛholale bɛdɔle sua bɛmanle yɛdayɛ menli nsa ne yɛdɛnlanle nu. Awieleɛ ne, me nee me awovolɛ dɛnlanle​—me nye liele kpalɛ! Noko akee, siane nsia anzi me anyelielɛ ne hakyile alɔbɔlɛlilɛ. Kansa hunle me papa.

Me nwo bubule me. Mekakye kɛ menzɛlɛle kɛ: “Nyamenle, mesɛlɛ wɔ die me papa ngoane. Mehyia ɔ nwo. Kɛmɔti a wɔambua me ɛ?” Ɛnee mekpondɛ kɛ menwu ɛleka mɔɔ me papa wɔ la. Membizale me nwo kɛ: ‘Asoo yehɔ anwuma? Anzɛɛ ɔnde aze bieko ɔ?’ Me nye bolole ngakula mɔɔ bɛ papa mɔ de aze la.

Wɔ ɛvolɛ dɔɔnwo anu, ɛnee asɛɛ kenle ko biala mekɔ azie ne azo. Ɛnee mekoto me papa nla ne anwo na mesɛlɛ kɛ: “Nyamenle, mesɛlɛ wɔ, mekulo kɛ menwu ɛleka mɔɔ me papa wɔ la.” Eza menzɛlɛle kɛ ɔboa me ɔmaa mende mɔɔ ɛbɛlabɔlɛ kile la abo.

Menzile kpɔkɛ kɛ mesukoa Germany aneɛ wɔ mekɛ mɔɔ menyianle ɛvolɛ 13 la. Menzuzule kɛ Germanyma lɛ mbuluku kpalɛ dɔɔnwo la ati, bie a mebanyia me kpuyia ne mɔ anwo mualɛ wɔ nu. Wɔ 1967 anu, menzukoale debie wɔ suakpole Jena mɔɔ ɛnee boka Germany Aduduleɛ anwo la azo. Mengengale Germany nrɛlɛbɛvolɛma mbuluku, titile mɔɔ fane sonla asetɛnla nwo la. Menzukoale edwɛkɛ mɔɔ yɛ anyelielɛ la ɛdeɛ, noko biala ammaa me kunlu andwo me nwo. Mengɔle zo menzɛlɛle nwolɛ mualɛ.

KƐZI BAEBOLO NE HAKYILE ME ƐBƐLABƆLƐ LA:

Wɔ 1970, menziale mengɔle Hungary, ɛleka mɔɔ menyiale Rose mɔɔ mebagya ye kenlebie la. Zɔhane mekɛ ne, ɛnee Hungary wɔ Komunis tumi bo. Yɛgyale la anzi mekɛ ekyii, me nee Rose yɛhɔle Austria. Ɛnee yɛ bodane a le kɛ, awieleɛ ne yɛbahɔ Sydney, Australia, ɛleka mɔɔ me ankele wɔ la.

Yeangyɛ menyianle gyima wɔ Austria. Kenle ko bie, me gɔnwo gyimayɛvo bie hanle kɛ mebanyia me kpuyia ne mɔ anwo mualɛ wɔ Baebolo ne anu. Ɔmanle me mbuluku bie mɔ mɔɔ ka Baebolo ne anwo edwɛkɛ la. Menvale anyelielɛ mengengale mbuluku ne mɔ ndɛndɛ na ɛnee mekulo kɛ mesukoa dɔɔnwo. Yemɔti mengɛlɛle Gyihova Alasevolɛ ne mɔ mɔɔ yɛle mbuluku ne la kɛlata kɛ bɛnwa me mbuluku dɔɔnwo.

Kenle mɔɔ yɛdi yɛ agyalɛ ɛvolɛ mɔɔ lumua la, Dasevolɛ kpavolɛ bie mɔɔ vi Austria la rakpɔlale me nee Rose. Ɔvale mbuluku ne mɔɔ membizale la ɔrale na ɔ nee me zukoale Baebolo ne. Kɛmɔ mekulo kɛ mesukoa la ati, ɛnee dapɛne biala yɛsukoa ye fane nwiɔ​—debiezukoalɛ ko biala di dɔnehwele kɛyɛ nna!

Me nye liele mɔɔ Alasevolɛ ne mɔ hilele me wɔ Baebolo ne anu la anwo. Mekɛ mɔɔ bɛhilele me Nyamenle duma, Gyihova wɔ me Hungary Baebolo ne anu la, ɛnee menlie menli. Wɔ ɛvolɛ 27 mɔɔ meva mehɔ asɔne la anu, metɛtele ye ɛlɛ kɛ bɛbɔ Nyamenle duma bɔbɔ. Me nye liele kɛzi Baebolo ne buale me kpuyia ne mɔ la anwo. Kɛ neazo la, menzukoale kɛ mɔwuamra ɛnze ɛhwee, ɔle kɛ asɛɛ bɛlafe botoo la. (Nolobɔvo ne 9:5, 10; Dwɔn 11:11-15) Eza menzukoale Baebolo ne ɛwɔkɛ mɔɔ fane ewiade fofolɛ mɔɔ “ewule ɛnle ɛkɛ bieko” la anwo debie. (Yekile 21:3, 4) Me nye la kɛ mebanwu me papa bieko, ɔluakɛ wɔ ewiade fofolɛ ne anu, ‘bɛbadwazo mɔwuamra.’​—Gyima ne 24:15.

Rose vile ye ɛhulolɛ nu bokale me nwo manle yɛzukoale Baebolo ne. Yɛnyianle anyuhɔlɛ ndɛndɛ, yɛvale siane nwiɔ pɛ a yɛzukoale buluku ne a! Yɛhɔle debiezukoalɛ biala mɔɔ Alasevolɛ ne mɔ yɛle wɔ Belemgbunlililɛ Asalo ɛkɛ ne la bie. Yɛ nye liele ɛlɔlɛ, moalɛ, nee koyɛlɛ mɔɔ wɔ Gyihova Alasevolɛ ne mɔ avinli la anwo kpalɛ.​—Dwɔn 13:34, 35.

Me nee Rose nyianle adenle hɔle Australia wɔ 1976 ne anu. Yɛkpole Gyihova Alasevolɛ mɔɔ wɔ ɛkɛ ne la abo zo ndɛndɛ. Alasevolɛ mɔɔ wɔ ɛkɛ la liele yɛ kɛnlɛma zo ɛkɛ ne ala. Wɔ 1978, yɛdayɛ noko yɛrayɛle Alasevolɛ.

KƐZI YEBOA ME:

Akee menyia me kpuyia mɔɔ ɛnee gyegye me mekɛ tendenle la anwo mualɛ. Gyihova Nyamenle mɔɔ mebikye ye la, ɛmaa mede nganeɛ kɛ menyia Selɛ mɔɔ tɛla biala la. (Gyemise 4:8) Na anyelazo mɔɔ melɛ kɛ mebanwu me papa bieko wɔ ewiade fofolɛ ne mɔɔ ɛlɛba la anu la sonle bolɛ maa me.​—Dwɔn 5:28, 29.

Wɔ 1989, me nee Rose zile kpɔkɛ kɛ yɛsia yɛahɔ Hungary amaa yɛahola yɛaha yɛ diedi ne anwo edwɛkɛ yɛahile yɛ gɔnwo mɔ nee yɛ abusua ne, yɛɛ menli gyɛne mɔɔ yɛbayia bɛ la. Yɛnyia nwolɛ adenle yɛlɛkilehile menli dɔɔnwo Baebolo ne. Menli mɔɔ bo 70, mɔɔ me mame boka nwo la nee yɛ ɛlɛsonle Gyihova.

Menyɛle nzɛlɛlɛ ɛvolɛ 17 na meanyia me kpuyia ne mɔ anwo mualɛ. Ɛvolɛ 39 ɛze, yɛɛ metɛyɛ asɔne​—noko kɛkala meka kɛ, “Me anwuma Selɛ, meyɛ wɔ mo kɛ wɔbua me ngakula nu nzɛlɛlɛ ne la.”