Asoo Ɛnee Nyamenle Mɛla Maa Yizilayɛma Le Kpalɛ Na Ɔfɛta?

MEKƐ bie mɔɔ ɛze ɛhɔ la, Adɔleɛ maanle bie kɔɔto diele daselɛ adalɛ mɔɔ tia menli nwiɔ mɔɔ bɛdonle bɛ ɛzonle kɛ bɛle kɔdiawu la na bɛbuale bɛ ewule fɔlɛ. Mekɛ mɔɔ bɛnwunle kɛ edwɛkɛ ne ɛnle zɔ la, lɔyama bɔle mɔdenle manle bɛyele bɛ nuhua ko. Noko lɔyama mɔɔ bɔ mɔdenle kpalɛ bɔbɔ la angola anlie ko ne mɔ ɛha la—ɛnee bɛhu ye dɛbadɛba.

Kɛmɔ edwɛkɛ ɛtane zɛhae kola si wɔ edwɛkɛlilɛ biala anu la ati, Baebolo ne tu folɛ kɛ: “Pɛlepɛle ala a bɛli ɔ nzi a.” (Mɛla ne 16:20) Saa ndɛnebuavolɛma di adehilelɛ ɛhye azo a, ɔboa maanlema. Nyamenle Mɛla ne manle Yizilayɛma nyianle edwɛkɛ mɔɔ bɛdi ye kpalɛ mɔɔ bɛnnea sonla nyunlu la. Bɛmaa yɛnlea zɔhane Mɛla ne saa ‘Nyamenle ndenle kɔsɔɔti le pɛlepɛle a.’—Mɛla ne 32:4.

NDƐNEBUAVOLƐMA ‘MƆƆ ZE NRƐLƐBƐ, BƐLƐ NDELEBƐBO, NA BƐ TI ƐDI LA’

Saa ndɛnebuavolɛma bɔ mɔdenle, bɛdi edwɛkɛ kpalɛ mɔɔ nzisi ɛnle nu a, menli anye die. Nyamenle Mɛla mɔɔ ɔvale ɔmanle Yizilayɛma la hwenle adwenle hɔle ndɛnebuavolɛma mɔɔ bɔ mɔdenle zɛhae la azo. Wɔ ɛsɛlɛ zo adendulɛ ne mɔlebɛbo, bɛhanle bɛhile Mosisi kɛ ɔkpondɛ “menli mɔɔ sulo Nyamenle, menli mɔɔ di nɔhalɛ, yɛɛ menli mɔɔ kyi ndoloboa la” ɔmaa bɛyɛ ndɛnebuavolɛma. (Adendulɛ 18:21, 22) Ɛvolɛ abulanla anzi, ɔzile zolɛ kɛ ɔwɔ kɛ bɛye ‘menli mɔɔ ze nrɛlɛbɛ, bɛlɛ ndelebɛbo na bɛ ti ɛdi la’ bɛmaa bɛbua menli ne ndɛne.—Mɛla ne 1:13-17.

Wɔ ɛvoya dɔɔnwo anzi, Dwuda Belemgbunli Gyɛhɔhyafatea hanle hilele ndɛnebuavolɛma kɛ: “Bɛnlea mɔɔ bɛyɛ la, ɔluakɛ bɛnyɛ bɛ gyima ne bɛmmaa sonla, bɛyɛ bɛamaa [Gyihova]. Ɔbaboa bɛ wɔ mekɛ biala mɔɔ bɛkɛze kɛ bɛbua ndɛne la. Bɛzulo [Gyihova] na bɛnlea boɛ wɔ mɔɔ bɛkɛze kɛ bɛyɛ la anwo, ɔluakɛ [Gyihova] yɛ Nyamenle ne ɛnli mɔguazo, ɔnnea sonla nyunlu, yɛɛ ɔnlie ndoloboa.” (2 Edwɛkɛsisilɛ 19:6, 7) Ɛhye ati belemgbunli ne hakyele ndɛnebuavolɛma kɛ, saa bɛmaa adwenletane anzɛɛ anyebolo sɛkye bɛ kpɔkɛzilɛ a, bɛbali nwolɛ ɛzonle wɔ Nyamenle anyunlu.

Mekɛ mɔɔ Yizilayɛ ndɛnebuavolɛma vale ngyinlazo kpalɛ ɛhye mɔ lile gyima la, ɔbɔle maanle ne anwo bane na bɛ nwo dɔle bɛ. Nyamenle Mɛla ne noko manle bɛ ngyinlazo mɔɔ boale ndɛnebuavolɛma manle bɛzile kpɔkɛ kpalɛ wɔ edwɛkɛ bɔbɔ mɔɔ yɛ se la anu. Ngyinlazo ɛhye mɔ bie a le boni?

NGYINLAZO MƆƆ MANLE BƐBUALE EDWƐKƐ KPALƐ

Ɛnee ɔwɔ kɛ bɛye ndɛnebuavolɛma mɔɔ ze nrɛlɛbɛ na bɛbɔ mɔdenle la ɛdeɛ, noko bɛammaa bɛanva bɛ adwenle nee bɛ nrɛlɛbɛ bɛambua ndɛne. Gyihova Nyamenle manle bɛ ngyinlazo anzɛɛ adehilelɛ mɔɔ bamaa bɛabua edwɛkɛ kpalɛ la. Adehilelɛ mɔɔ bɛvale bɛmanle Yizilayɛ ndɛnebuavolɛma la bie mɔ ɛne.

Bɛnleɛnlea edwɛkɛ nu kpalɛ. Nyamenle luale Mosisi anwo zo hanle hilele Yizilayɛ ndɛnebuavolɛma kɛ: “Bɛli edwɛkɛ biala mɔɔ kɛrala bɛ mediema ne bie mɔ avinli la, na bɛbua ye fɔɔnwo.” (Mɛla ne 1:16) Saa ndɛnebuavolɛma bahola abua edwɛkɛ kpalɛ a, kyesɛ bɛte edwɛkɛ ne abo kpalɛ. Ɔlua ɛhye ati, Nyamenle hanle hilele ndɛnebuavolɛma kɛ: “Bɛbiza nu kpalɛ, bɛvedevede nuhua gyɛlɛɛnye.” Ɛnee ɔwɔ kɛ kɔɔto ndɛnebuavolɛma nea kɛ “amgba edwɛkɛ ne le nɔhalɛ” kolaa na bɛali.—Mɛla ne 13:14; 17:4.

Bɛdie dasevolɛma edwɛkɛ. Ɛnee bɛhyia dasevolɛma na bɛahola bɛanleɛnlea edwɛkɛ nu kpalɛ. Nyamenle Mɛla ne hanle kɛ: “Saa bɛse awie ɛvo, anzɛɛ ɛdo mɛla bie anzɛɛ ɛyɛ nyɛleɛ ɛtane bie na dasevolɛ kokye ala a wɔ nwolɛ a, ɔnle kɛ bɛbua ahenle mɔɔ bɛdo ye ɛzonle ne la fɔlɛ. Saa menli nwiɔ anzɛɛ nsa di daselɛ tia ye a, ɛnee ɛzonle ne ɛli munli.” (Mɛla ne 19:15) Nyamenle Mɛla ne hanle hilele dasevolɛma kɛ: “Bɛmmabɔ nzekue. Bɛmmadi daselɛ adalɛ bɛboa sonla mɔɔ le amumuyɛ la.”—Adendulɛ 23:1.

Bɛli nɔhalɛ wɔ kɔɔto edwɛkɛ nu. Ɛnee kɛzi ɛbɔ adalɛ a bɛtwe ɛ nzo la le kɔkɔbɔlɛ maa awie biala: “Ndɛnebuavolɛma ne banleɛnlea edwɛkɛ ne anu kpalɛ, na saa bɛnwu kɛ dasevolɛ ne ɛli dasewia a, bɛva mɔɔ anrɛɛ ɔkulo kɛ ɔfa ɔyɛ ɔ gɔnwo ne la bɛyɛ ye, amaa bɛaye munzule ɛbɛla ɛhye mɔ bɛavi bɛ avinli.” (Mɛla ne 19:18, 19) Yemɔti awie bɔ adalɛ wɔ kɔɔto die awie agyapadeɛ a, bɛbalie ɔdaye noko ye ɛdeɛ ne. Saa ɔbɔ adalɛ kɛ bɛhu awie mɔɔ ɛnze nwolɛ bie la a, bɛbahu ɔdaye noko. Ɛnee adehilelɛ ɛhye boa kpalɛ maa bɛka nɔhalɛ.

Bɛbua ndɛne fɔɔnwo. Saa bɛnwu daselɛ ne amuala a, ndɛnebuavolɛma di edwɛkɛ ne na bɛbua. Wɔ ɛke, yɛnwu Nyamenle Mɛla ne anwo debie mɔɔ hyia la: “Ɔnle kɛ bɛbua bɛtia ehyianli na bɛbua bɛmaa sonlakpole. Bɛbua bɛ gɔnwo mɔ ndɛne wɔ adenle kpalɛ nu.” (Sɛlɛvolɛma 19:15) Wɔ edwɛkɛ biala anu, ɛnee ɔwɔ kɛ ndɛnebuavolɛma bua edwɛkɛ ne kɛmɔ ɔde la, ɔnle kɛ bɛnea kɛzi awie de anzɛɛ ye gyinlabelɛ na bɛabua.

Bɛbahola bɛava ngyinlazo ɛhye mɔ mɔɔ nuhua la ɛkɛ ne wienyi wɔ Nyamenle Mɛla mɔɔ ɔvale ɔmanle Yizilayɛma wɔ ɛvoyia dɔɔnwo mɔɔ ɛze ɛhɔ anu la bɛali gyima wɔ kɔɔto ɛnɛ. Saa bɛdi zo a, edwɛkɛ mɔɔ bɛnli ye boɛ nee pɛlepɛlelilɛ mɔɔ ɛngɔ zo la bɛavi ɛkɛ.

Ɛnɛ mekɛ ye, ndɛnebuavolɛ tie menli nwiɔ mɔɔ ɛlɛka edwɛkɛ la — Saa bɛdi Nyamenle mɛla ne anu ngyinlazo zo a, bɛnrɛbua edwɛkɛ ɛtane

MENLI MƆƆ NƆHALƐ PƐLEPƐLELILƐ BOALE BƐ

Mosisi hanle hilele Yizilayɛma kɛ: “Maanle kpole biala ɛnle ɛkɛ mɔɔ lɛ mɛla nee amaamuo mɔɔ tenrɛ kɛ mɛla ɛhye mɔ mɔɔ melɛfa meamaa bɛ ɛnɛ la.” (Mɛla ne 4:8) Nɔhalɛ nu, maanle gyɛne biala annyia ye zɔ. Wɔ Belemgbunli Sɔlɔmɔn mɔɔ ye mgbavolɛ nu ɔlile Gyihova mɛla zo la ebialilɛ ne anu, menli ne “anzo nu dwole bɛ” na bɛ nwo dɔle bɛ, “bɛlile, bɛnlonle na bɛ nye liele.”—1 Arelemgbunli 4:20, 25.

Ɔyɛ alɔbɔlɛ kɛ, awieleɛ ne Yizilayɛma hakyile bɛ nzi zile bɛ Nyamenle ne la. Nyamenle luale ngapezonli Gyɛlɛmaya anwo zo hanle kɛ: “Nea, bɛkpo medame [Gyihova] me nloa edwɛkɛ; na duzu nrɛlɛbɛ bɔbɔ a bɛze a?” (Gyɛlɛmaya 8:9) Mɔɔ vi nu rale la a le kɛ Gyɛlusalɛm yɛle “suakpole mɔɔ ahɔdiawu ɛyi ye tɛkɛɛ” na “bɛkyi nyɛleɛ” wɔ zo la. Awieleɛ ne bɛzɛkyele ye na ɔlale ɛkɛ mgbane ɛvolɛ 70.—Yizikeɛle 22:2; Gyɛlɛmaya 25:11.

Ngapezonli Ayezaya dɛnlanle aze wɔ Yizilayɛ ngyegyelɛ mekɛ ɛhye anu. Mekɛ mɔɔ ɔnleanle mɔɔ hɔle zolɛ la, ɔhanle Gyihova Nyamenle nee ye Mɛla ne anwo nɔhalɛ edwɛkɛ kɛ: “Saa wɔ ndeanlɛ ba ewiade a, ewiade amra sukoa pɛlepɛlelilɛ.”—Ayezaya 26:9.

Ayezaya anye liele kɛ bɛmanle ɔhanle Mɛzaya Belemgbunli, Gyisɛse Kelaese, tumililɛ ne anwo edwɛkɛ kɛ: “Ɔnrɛbua ndɛne ɛnyelɛzo, yɛɛ ɔnrɛhyea ɔ nzo ɔnrɛbua ndɛne. Ɔbabua ehyianvolɛma ndɛne pɛlepɛle nu, na yeabua awienvolɛma ndɛne pɛpɛ.” (Ayezaya 11:3, 4) Nea anyelazo kɛnlɛma mɔɔ menli kɔsɔɔti mɔɔ bayɛ Mɛzaya Belemgbunlililɛ ne maanlema la banyia wɔ Nyamenle Belemgbunlililɛ ne anu a!—Mateyu 6:10.

a Duma Gyɛhɔhyafate abo kile “Gyihova Le Ndɛnebuavolɛ.”

Asoo Nyamenle Mɛla Ne Manle Bɛlile Nzenralɛ?

Menli dɔɔnwo ɛzu edwɛkɛ “ɛbɔ ɛ gɔnwo anye a bɛbɔ ɛ nye, ɛtu ɛ gɔnwo agye a bɛtu ɛ gye” mɔɔ wɔ Baebolo ne anu la anwo kpolera. (Adendulɛ 21:24) Bie mɔ bu ye kɛ, ɔkile kɛ Nyamenle die nzenralɛ to nu. Noko adwenle ɛhye ko tia Nyamenle mɛla ɛhye: “Bɛmmadi nzenralɛ anzɛɛ bɛmmafa bɛdabɛ bɛ menli ne mɔ amra mrenya anwo edwɛkɛ bɛsie bɛ kunlu.” (Sɛlɛvolɛma 19:18) Ɛnee, kɛzi ɔwɔ kɛ yɛte edwɛkɛ mɔɔ wɔ Adendulɛ ne anu la abo ɛ?

Adendulɛ 21:22 ka mrenya nwiɔ mɔɔ ɛlɛko na ko kɛbɔ nrenzɛvolɛ kɛmaa ɔ ko kɛkpɔne la anwo edwɛkɛ. Saa raalɛ ne nee ɔ ra ne anwu a, raalɛ ne mɔɔ ɛboda la ahu ɛnrɛbɔ ye bie. Emomu, nrenya ne mɔɔ bɔle nrenzɛvolɛ ne la, ‘ezukoa bolɛ biala mɔɔ nrenzɛvolɛ ne ɔ hu kɛbɔ la, saa ndɛnebuavolɛma die to nu a, ɔwɔ kɛ ahenle ne tua.’ Ɛhye kile kɛ, ndɛnebuavolɛma mɔɔ wɔ kɔɔto ɛkɛ la bamaa ahenle mɔɔ bodale raalɛ ne la adua kakɛ mɔɔ ɔ hu kɛbɔ ye la. Saa ɛbodalɛ ne ati ɔdaye anzɛɛ kakula ne wu a, ndɛnebuavolɛma ko ne ala bɛamaa bɛahu ahenle mɔɔ hunle bɛ la.

Ɔba ye zɛhae a, kɔɔto ne, na tɛ ahenle mɔɔ wule la, bayɛ ye mɔɔ “ɛku ɛ gɔnwo a bɛku wɔ, ɛbɔ ɛ gɔnwo anye a bɛbɔ ɛ nye, ɛtu ɛ gɔnwo agye a bɛtu ɛ gye . . . . ” (Adendulɛ 21:23, 24) Zɔhane ngyinlazo ne manle ndɛnebuavolɛma hakyele kɛ ɔnle kɛ anzohwenlɛ ne bo zolɛ anzɛɛ ɔyɛ ekyi. Baebolo nwomanli Richard Elliott Friedman ka kɛ: “Ngyinlazo ne sikalɛ a le kɛ ɔwɔ kɛ ɛtane ne nee anzohwenlɛ ne yɛ ko na ɔnle kɛ ɔbo zo ɛlɛ.”

Duzu a manle menli nyianle adwenle kɛ Nyamenle Mɛla maa bɛkola bɛdi nzenralɛ a? Ɔfɛta kɛ yɛyɛ ye nzonlɛ kɛ wɔ Mateyu 5:38, 39, Gyisɛse hanle kɛ: “Bɛde kɛ bɛha kɛ: ‘Bɛva ɛnyelɛ bɛzie ɛnyelɛ bo zo, yɛɛ bɛva egyele bɛzie egyele bo zo.’ Noko mame, mese: Saa awie yɛ wɔ ɛtane a, mmasenra ye. Saa awie bɔ ɛ nzo fema ne anu a, kakyi bɛne ne ɔdaye maa ye.” Ɔzɔho kɛ Gyisɛse mekɛ zo, ɛnee asɔne kilehilevolɛma bie mɔ ɛva ‘nzenralɛ mɛla’ mɔɔ wɔ bɛ tetedwɛkɛ mɔɔ bɛka anu la ɛboka nwo kɛ bɛkola bɛdi nzenralɛ. Noko akee, Gyisɛse manle ɔlale ali wienyi kɛ ngilehilelɛ zɛhae biala ɛnle Nyamenle Mɛla mɔɔ ɔvale ɔmanle Yizilayɛma la anu.