BAEBOLO KPUYIA MƆƆ BƐBUA
Kɛzi Gyisɛse ewule ne boa yɛ ɛ?
Mekɛ mɔɔ Nyamenle bɔle alesama la, ɛnee ɔkulo kɛ bɛtɛnla azɛlɛ ye azo dahuu mɔɔ bɛ nwo ɛndo bɛ anzɛɛ bɛnwu a. Noko akee, nrenya ne mɔɔ lumua la, Adam, yɛle Bɔvolɛ ne anwo anzosesebɛ na dahuu ngoane nwo adenle bɔle ye. Kɛmɔ yɛle Adam abozoamra la ati, yɛnyianle ewule yɛvile ye ɛkɛ. (Wulomuma 5:8, 12; 6:23) Nɔhalɛ Nyamenle, Gyihova, zoanle ɔ Ra, Gyisɛse, wɔ azɛlɛ ye azo kɛ ɔrawu na ɔlie mɔɔ Adam manle ɔminlinle la.—Kenga Dwɔn 3:16.
Gyisɛse wule amaa alesama ahola anyia dahuu ngoane. Ɛnea a kɛzi asetɛnla mɔɔ ewule ɛnle nu la bayɛ wɔ azɛlɛ ye azo ɛ?
Gyisɛse ewule ne maa bɛkola bɛfa yɛ ɛtane bɛkyɛ yɛ na yɛnyia dahuu ngoane. Baebolo ne maa yɛnwu kɛzi asetɛnla bayɛ wɔ mekɛ mɔɔ kpanyinliyɛlɛ, anwodolɛ nee ewule ɛngyegye yɛ bieko la.—Kenga Ayezaya 25:8; 33:24; Yekile 21:4, 5.
Kɛzi ɔwɔ kɛ yɛkakye Gyisɛse ewule ne ɛ?
Kolaa na Gyisɛse awu wɔ nɔsolɛ ne la, ɔhanle ɔhilele ye ɛdoavolɛma kɛ bɛlua ɛvoyia sikalɛ bie azo bɛhakye ye ewule ne. Gyisɛse ewule ne mɔɔ yɛkakye ye wɔ zɔhane adenle ne azo la maa yɛnyia adenle yɛdwenle kɛzi Gyihova nee Gyisɛse kulo alesama kpole la anwo.—Kenga Luku 22:19, 20; 1 Dwɔn 4:9, 10.
Ɛvolɛ ɛhye, Gyisɛse ewule ne anwo Ngakyelɛlilɛ ne bazi Kenlenzile, April 14, mekɛ mɔɔ ewia ne ɛhɔdɔ la. Bɛlɛto ɛsalɛ bɛavɛlɛ wɔ kɛ ɛhɔ Gyihova Alasevolɛ mɔɔ bɛwɔ wɔ ɛkɛ la ɛdeɛ ne bie.—Kenga Wulomuma 1:11, 12.