Duzu Ati A Nyamenle Maa Adenle Maa Menli Mɔɔ Lɛ Tumi La Sisi Mɔɔ Ɛnlɛ Bie La Ɛ?

Baebolo ne ka neazo ɛtane bie mɔɔ gyegye adwenle mɔɔ kile kɛzi awie mɔɔ lɛ tumi sisile awie mɔɔ ɛnlɛ bie la. Yɛkakye Neebɔto edwɛkɛ ne.a Ehabe mɔɔ ɛnee le belemgbunli wɔ Yizilayɛ wɔ ɛvoya ne mɔɔ tɔ zo bulu K.Y.M. la manle ɔ ye, Gyɛzɛbɛle nyianle adenle manle bɛhunle Neebɔto nee ɔ mra ne mɔ amaa belemgbunli ne ava ye vanye ɛya ne. (1 Arelemgbunli 21:1-16; 2 Arelemgbunli 9:26) Duzu ati a Nyamenle manle amumuyɛ kpole zɛhae anwo adenle a?

Maa yɛzuzu edwɛkɛ ko mɔɔ hyia la anwo: Nyamenle ɛmbɔ adalɛ ɛlɛ. (Taetɛse 1:2) Kɛzi ɛhye fane amumuyɛ mɔɔ bɛyɛ bɛsisi awie mɔ la anwo ɛ? Mɔlebɛbo ne, Nyamenle bɔle alesama kɔkɔ kɛ bɛte ɔ nwo atua a debie mɔɔ yɛ alɔbɔlɛ mɔɔ bavi nu ara la a le ewule. Kɛmɔ Nyamenle edwɛkɛ ne hanle la, ɔvi Yidɛn atuadelɛ ne azo, ewule ɛra alesama ɛbɛlabɔlɛ nu. Nɔhalɛ nu, nzisi a manle dasanli mɔɔ lumua la wule a—mekɛ mɔɔ Keen hunle ɔ diema Ebɛle la.—Mɔlebɛbo 2:16, 17; 4:8.

Ɔvi zɔhane mekɛ ne, Nyamenle Edwɛkɛ ne pɛ alesama tetedwɛkɛ ne sikalɛ kɛ: “Bie mɔ lɛ tumi ɛlɛsisi bie mɔ bɛamaa bɛanwu amaneɛ.” (Nolobɔvo ne 8:9) Zɔhane edwɛkɛ ne ɛyɛ nɔhalɛ ɔ? Gyihova bɔle Yizilayɛ maanle ne mɔɔ le ye menli la kɔkɔ kɛ, bɛ arelemgbunli ne mɔ basisi bɛ, yeamaa menli ne azu avɛlɛ Nyamenle. (1 Samoɛle 8:11-18) Belemgbunli Sɔlɔmɔn nrɛlɛbɛvolɛ ne bɔbɔ sisile ye menli ne kpole kpalɛ. (1 Arelemgbunli 11:43; 12:3, 4) Arelemgbunli atisesebɛma mɔɔ le kɛ Ehabe la yɛle menli ne amumuyɛ kpole. Suzu nwolɛ nea: Saa Nyamenle ammaa nzisi ɛhye mɔ anwo adenle a, asoo anrɛɛ ye edwɛkɛ ne ɛnrɛyɛ adalɛ ɔ?

Kakye noko kɛ, Seetan se angomedi ti a menli sonle Nyamenle a. (Dwobu 1:9, 10; 2:4) Saa Nyamenle bɔ ye menli kɔsɔɔti anwo bane wɔ nzisi biala anwo a, asoo anrɛɛ Seetan edwɛkɛ ne ɛnrɛyɛ nɔhalɛ? Na saa Nyamenle bɔ awie biala anwo bane wɔ nzisi kɔsɔɔti anwo a, asoo anrɛɛ ɔtɛbɔle adalɛ kpole ɔ? Banebɔlɛ zɛhae wɔ ɛkɛ a, menli dɔɔnwo banyia adwenle kɛ bɛbahola bɛanlea bɛ nwo zo bɔkɔɔ mɔɔ bɛngyia Nyamenle a. Noko Nyamenle Edwɛkɛ ne ka ye ngakyile kɛ—sonla ɛngola ɛnnea ɔ nwo zo. (Gyɛlɛmaya 10:23) Yɛhyia Nyamenle Belemgbunlililɛ ne ɛralɛ nwo; yemɔ ala a bamaa nzisi bo apɛ a.

Asoo ɛhye kile kɛ Nyamenle ɛnyɛ ɛhwee wɔ nzisi nwo ɔ? Kyɛkyɛ. Suzu ninyɛne nwiɔ mɔɔ ɔyɛ la anwo nea: Mɔɔ lumua la, ɔkpa nzisi nwo ɛdanlɛ ɔmaa yɛnwu kɛzi ɔde la. Kɛ neazo la, ye Edwɛkɛ ne ka adwenle ɛtane biala mɔɔ Gyɛzɛbɛle nyianle tiale Neebɔto la anwo edwɛkɛ wienyi. Baebolo ne maa ɔda ali bieko kɛ tumivolɛ bie mɔɔ ɔngulo kɛ bɛnwu ye sonlaholɛ la a si amumuyɛ zɛhae adua a. (Dwɔn 14:30; 2 Kɔlentema 11:14) Baebolo ne ka ye wienyi kɛ yemɔ a le Seetan Abɔnsam. Nyamenle kpa atisesebɛ nee nzisi nwo ɛdanlɛ na ɔboa yɛ ɔmaa yɛtwe yɛ nwo yɛfi atisesebɛyɛlɛ nwo. Ɔdua ɛhye azo ɔbɔ yɛ nwo bane amaa kenlebie yɛadɛnla aze dahuu.

Mɔɔ tɔ zo nwiɔ, Nyamenle ɛmaa yɛnyia anyelazo kpundii kɛ nzisi bo bapɛ. Kɛzi ɔkpale Ehabe nee Gyɛzɛbɛle anwo ɛdanlɛ, ɔbuale bɛ ndɛne na ɔhwenle bɛ nzo—yɛɛ menli dɔɔnwo mɔɔ le kɛ bɛdabɛ la—maa yɛnyia anwodozo wɔ ɛwɔkɛ mɔɔ yebɔ kɛ ɔbahwe ɛtanevolɛma kɔsɔɔti anzo kenlebie la anu. (Edwɛndolɛ 52:1-5) Nyamenle eza ɛmaa yɛnyia anyelazo kɛ ɔbaziezie debie ɛtane mɔɔ vi atisesebɛ nu ɛra la yeamaa menli mɔɔ kulo ye la.b Ɛhye ati, Neebɔto nɔhavo nee ɔ mra ne mɔ badɛnla azɛlɛ ye azo paladaese ne mɔɔ nzisi ɛnle ɛkɛ la anu dahuu.—Edwɛndolɛ 37:34.