Ahenle Mɔɔ Fa Konle Nee Amaneɛnwunlɛ Ba La

Ewiade Konle I la rale awieleɛ wɔ November 11, 1918. Bɛdole gyima biala anu, na menli ne zile agole wɔ gua ne mɔ azo. Noko anyelielɛ ne angyɛ. Ewiade konle ne anzi yeangyɛ yɛɛ debie bieko mɔɔ anwo yɛ ɛzulolɛ tɛla etu la rale a.

Ewule anwo ɛzulolɛ bie mɔɔ bɛfɛlɛ ye influenza la hanle sogyama mɔɔ wɔ France la wɔ June 1918. Yeangyɛ ewule ne hunle menli dɔɔnwo. Kɛ neazo la, wɔ siane ekyi bie anu, ɔhunle America sogyama dɔɔnwo wɔ France ɔdɛlale mɔɔ kpɔvolɛma ne hunle bɛ la. Ewule ne dɛlɛle ndɛndɛ wɔ ewiade amuala ɔluakɛ ɔhanle sogyama ne na bɛazia bɛahɔ bɛ maanle nu.

Konle ne wiele la ɛhɔne nee ezukoa afoa nu anwongyelelɛ rale. Ɛhɔne rale Europe ɛleka dɔɔnwo wɔ mekɛ mɔɔ konle ne rale awieleɛ wɔ 1918 la. Ɔkadwu 1923 la, ɛnee ɛfa Germany ezukoa ne ɛtɔ debie a nvasoɛ ɛnle zo. Ɛvolɛ nsia anzi, ewiade amuala ezukoa gyinlabelɛ ne zɛkyele bɔkɔɔ. Awieleɛ kolaa ne wɔ 1939, ewiade konle mɔɔ tɔ zo nwiɔ la bɔle ɔ bo—wɔ adenle bie azo ɛnee ɔle ewiade konle mɔɔ lumua la ndoazo. Duzu a vale amaneɛnwunlɛ ngakyile ɛhye mɔ rale a?

AWIELEƐ MEKƐ NE ANWO SƐKƐLƐNEƐ

Baebolo ngapezo boa yɛ maa yɛnwu debie mɔɔ manle ninyɛne bie mɔ zile wɔ tete ne la, na ɛhye le nɔhalɛ bɔkɔɔ wɔ Ewiade Konle I la anwo. Gyisɛse Kelaese hanle dole ɛkɛ ne kɛ “maanle nee maanle baho atia bɛ nwo” yɛɛ ɛhɔne nee ewule ngakyile bara azɛlɛ ye azo ɛleka biala. (Mateyu 24:3, 7; Luku 21:10, 11) Ɔhanle ɔhilele ye ɛdoavolɛ ne mɔ kɛ munzule ɛhye mɔ bayɛ ewiade awieleɛ ne anwo sɛkɛlɛneɛ. Bɛha nwolɛ edwɛkɛ dɔɔnwo wɔ Yekile buluku ne anu, na ɔka munzule mɔɔ wɔ azɛlɛ ye azo la anwo edwɛkɛ kɛ ɔfane konle bie mɔɔ zile anwuma la anwo.—Nea ɛlɛka “Konle Zile Azɛlɛ Ye Azo Nee Anwuma Lɔ.”

Baebolo buluku ɛhye eza ka mrenya nna mɔɔ de mgbɔnwɔ zo la anwo edwɛkɛ. Mrenya ɛhye mɔ anu nsa gyi ɛkɛ ne maa esiane ko ne ala mɔɔ Gyisɛse hanle kɛ ɔbazi la—konle, ɛhɔne, yɛɛ ewule ngakyile. (Nea ɛlɛka “Mrenya Nna Ne Mɔɔ De Mgbɔnwɔ Zo La Ɛlɛkɔ Bɛ Nyunlu Amgba Ɔ?”) Ɔda ali kɛ, ewiade konle mɔɔ lumua la bɔle amaneɛnwunlɛ mekɛ mɔɔ ɔ bo ɛtɛpɛle la abo. Baebolo ne maa ɔda ali kɛ Seetan a manle ɔbɔle ɔ bo a. (1 Dwɔn 5:19) Asoo ye tumi ne bara awieleɛ?

Yekile buluku ne noko maa yɛnwu kɛ Seetan “mekɛ ɛha ekyi bie ala.” (Yekile 12:12) Ɛhye ati a yeva ɛya kpole na yemaa munzule dɔɔnwo ɛra azɛlɛ ye azo la. Ngyegyelɛ mɔɔ yɛnwu ye la noko di daselɛ kɛ Seetan mekɛ ne ɛha ekyi bie.

BƐBAZƐKYE ABƆNSAM GYIMA BIALA

Nɔhalɛ nu, Ewiade Konle I la vale nzenzaleɛ kpole rale wɔ tetedwɛkɛ nu. Ɔvale ewiade konle nee atuadelɛ ɔrale na yeammaa bɛannyia alesama mɔɔ ɛlɛdi tumi la anu anwodozo. Eza ɔmaa yɛnwu kɛ amgba bɛdu Seetan bɛvi anwuma lɔ. (Yekile 12:9) Ewiade neavolɛ ɛhye mɔɔ bɛnnwu ye la bɔle atisesebɛ ɛbɛla ɔluakɛ ɔze kɛ ye mekɛ ɛha ekyi bie ala. Saa zɔhane mekɛ ne ba awieleɛ a, ngyegyelɛ mekɛ ne mɔɔ Ewiade Konle I vale rale la abo bapɛ bɔkɔɔ.

Baebolo ngapezo ne maa yɛnyia anwodozo wɔ Gyisɛse Kelaese, yɛ anwuma Belemgbunli ne anu kɛ, ɔbazɛkye “Abɔnsam gyima biala mɔɔ yeli la.” (1 Dwɔn 3:8) Kɛkala bɔbɔ menli mgbe dɔɔnwo yɛ asɔne kɛ Nyamenle Belemgbunlililɛ ne ɛrɛla. Asoo ɛyɛ bie? Ɔlua Belemgbunlililɛ ne azo, menli mɔɔ di nɔhalɛ la banwu kɛ bɛlɛyɛ Nyamenle ɛhulolɛdeɛ wɔ azɛlɛ ye azo na tɛ Seetan ɛhulolɛdeɛ. (Mateyu 6:9, 10) Wɔ Nyamenle Belemgbunlililɛ ne abo, ewiade konle anzɛɛ konle gyɛne biala ɛnrɛzi bieko ɛlɛ! (Edwɛndolɛ 46:9) Sukoa zɔhane Belemgbunlililɛ ne anwo debie na wɔadɛnla aze wɔanwu mekɛ mɔɔ anzondwolɛ bara azɛlɛ ye azo la!—Ayezaya 9:6, 7.