KPUYIA MƆƆ VI KENGAVOMA ƐKƐ

Duzu ati a Gyisɛse zunle kolaa na yeadwazo Lazalɛse kɛmɔ Dwɔn 11:35 ne hanle la ɛ?

Saa yɛ kulovolɛ bie wu a, yɛsu, ɔluakɛ yɛminli debie. Ɔwɔ nuhua kɛ ɛnee Gyisɛse kulo Lazalɛse edwɛkɛ ɛdeɛ, noko tɛ ye ewule ne a manle ɔzunle a. Kɛmɔ Dwɔn kɛlɛtokɛ ne kile la, ɔ kunlu mɔɔ yelɛyelale ye manle menli mɔɔ ɛnee debie ɛdɔ bɛ nye zo la ati a ɔzunle a.​—Dwɔn 11:36.

Mekɛ mɔɔ Gyisɛse dele kɛ Lazalɛse ɛnde kpɔkɛ la, tɛ ɛkɛ ne ala a ɔhɔle kɛ ɔkayɛ ye ayile a. Kɛlɛtokɛ ne ka kɛ: “Mɔɔ [Gyisɛse dele] Lazalɛse anwodolɛ nrɛlaleɛ ne la, ɔzile aze kenle nwiɔ wɔ ɛleka mɔɔ ɔwɔ la.” (Dwɔn 11:6) Kɛmɔti a Gyisɛse hyɛle ɛ? Bodane bie ati ɔ. Ɔhanle kɛ: “Anwondolɛ ɛhye ɛnrɛmaa Lazalɛse ɛnrɛwu. Nyamenle anyunlunyia ti yɛɛ ɛhye ɛzi a, na ɔbayɛ debie mɔɔ ɔlua zolɛ Nyamenle Ara ne ɔdaye ɔbanyia anyunlunyia a.” (Dwɔn 11:4) Adenle boni azo a ɛnee anwondolɛ ne ɛnrɛmaa Lazalɛse “ɛnrɛwu” ɛ? Ɛnee Gyisɛse kulo kɛ ɔdua Lazalɛse ewule ne azo ɔwula “Nyamenle anyunlunyia.” Adenle boni azo? Ɛnee ɔkulo kɛ ɔdua nwanwane adenle zo ɔdwazo ɔ gɔnwo ne ɔfi ewule nu.

Mekɛ mɔɔ Gyisɛse nee ye ɛdoavolɛma ne ɛlɛdi adwelie wɔ kenle zɔhane la, ɔvale ewule ɔdole nlafelɛ nwo. Ɛhye ati a ɔhanle ɔhilele bɛ kɛ “na mekɔ meahɔdunwue [Lazalɛse la].” (Dwɔn 11:11) Gyisɛse ɛdeɛ, Lazalɛse mɔɔ ɔdwazo ye yeavi ewule nu la le kɛ awovolɛ mɔɔ ɔtunwue ɔ ra yeavi nlafelɛ nu la. Yemɔti ɛnee ɔnnwu deɛmɔti ɔwɔ kɛ ɔdi Lazalɛse ewule ne anwo nyane a.

Duzu a manle Gyisɛse zunle a? Mualɛ ne wɔ edwɛkɛ mɔɔ doa zo la anu. Mekɛ mɔɔ Gyisɛse nwunle kɛ Lazalɛse adiema raalɛ Mɛle nee ɔ gɔnwo mɔ ɛlɛsu la, “nyane kpole hanle ye manle alɔbɔlɛ hunle ye.” Mɔɔ Gyisɛse nwunle kɛ bɛlɛdi nyane la, “alɔbɔlɛ hunle ye.” Ɛhye ati a ‘Gyisɛse zunle a.’ Alɔbɔlɛ kpole hunle Gyisɛse wɔ mekɛ mɔɔ ɔnwunle kɛ ɔ gɔnwo mɔ ɛlɛdi nyane la.​—Dwɔn 11:33, 35.

Kɛlɛtokɛ ɛhye kile kɛ Gyisɛse lɛ tumi mɔɔ ɔbava yeadwazo yɛ kulovolɛma na eza yeamaa bɛ kpɔkɛdelɛ kpalɛ wɔ ewiade fofolɛ ne anu a. Eza ɔboa ɔmaa yɛnwu kɛ Gyisɛse te nganeɛ maa bɛdabɛ mɔɔ Adam ɛtane ne ɛmaa bɛ kulovolɛma ɛvi bɛ sa la. Debie bieko mɔɔ yɛsukoa yɛfi kɛlɛtokɛ ɛhye anu la a le kɛ ɔwɔ kɛ yɛ kunlu yelɛyela yɛ maa bɛdabɛ mɔɔ bɛlɛdi bɛ kulovolɛma ewule nwo nyane la.

Ɛnee Gyisɛse ze kɛ ɔbadwazo Lazalɛse yeavi ewule nu. Noko akee, ɔlua ɛhulolɛ kpole nee ahunluyelɛyelalɛ mɔɔ ɔlɛ ɔmaa ɔ gɔnwo mɔ la ati, ɔzunle. Zɔhane ala a, anwunvɔnezelɛ bamaa ‘yɛ nee mɔɔ su la azu a.’ (Wulo. 12:15) Nyanelilɛ zɛhae ɛngile kɛ awie ɛnlɛ diedi wɔ ewudwazo anyelazo ne anu. Ɔwɔ nuhua kɛ ɛnee Gyisɛse ɛlɛba aradunwue Lazalɛse ɛdeɛ, noko ɔzunle ɔvale ɔyɛle nyane mɔɔ yɛdi yɛmaa menli mɔɔ debie ɛdɔ bɛ nye zo la anwo neazo.