Diedinli Mɔɔ Di Nɔhalɛ Nee Maanle Sonla Kpalɛ​—Kɛzi Ɛbayɛ Ɔ Mu Nwiɔ La

NINYƐNE nwiɔ boni a ɛnee Gyisɛse ɛzonlenlɛ gyima ne gyi zo a? Mɔɔ lumua, Gyisɛse bɔle mɔdenle kɛ ɔmaa menli ahakyi bɛ adwenle, na tɛ maanyɛlɛ ngyehyɛleɛ ɔ. Kɛ neazo la, yɛ edwɛkɛ mɔɔ Gyisɛse zile zo wɔ ye Boka Zo Ɛdendɛlɛ ne anu la nzonlɛ. Mekɛ mɔɔ ɔzele ye tievolɛma ne kɛ ‘bɛdabɛ mɔɔ bɛze bɛ sunsum nu ngyianlɛ’ la a bɛanyia nɔhalɛ anyelielɛ la, yeangyɛ yɛɛ ɔhanle kɛ bɛle kɛ ngyenle nee kɛnlaneɛ a. Ɔvale ɔzɔle zo kɛ: ‘Nyilalɛ ɛha bɛdabɛ mɔɔ bɛle bɛlɛvo, bɛdabɛ mɔɔ bɛ ahonle nu te, bɛdabɛ mɔɔ bɛpele bɛkpondɛ anzondwolɛ la.’ (Mateyu 5:1-11) Gyisɛse boale ye ɛdoavolɛ ne mɔ ɔmanle bɛnwunle deɛmɔti ɔhyia kɛ bɛfi bɛ ahonle muala nu bɛsonle Nyamenle na bɛkakyi bɛ adwenle nee bɛ nganeɛdelɛ bɛmaa ɔ nee Nyamenle ngyinlazo mɔɔ wɔ kpalɛ nee ɛtane nwo la yia a.

Mɔɔ tɔ zo nwiɔ, mekɛ mɔɔ Gyisɛse nwunle kɛ alesama ɛlɛnwu amaneɛ la, ɔ kunlu yelɛyelale ye ɔmanle ɔyɛle debie ɔboale bɛ. Noko akee, yeanva yeanzie ɔ nye zo kɛ ɔtu amaneɛnwunlɛ bo. (Mateyu 20:30-34) Ɔyɛle menli mɔɔ ɛnee ɛnde kpɔkɛ la ayile, noko anwodolɛ tɛbɔ ɛkɛ. (Luku 6:17-19) Ɔboale menli mɔɔ ɛnee bɛlɛsisi bɛ la, noko nzisi tɛkɔ zo. Ɔmanle menli mɔɔ ɛnee ɛhɔne ɛlɛku bɛ la aleɛ, noko ɛhɔne tɛku alesama.—Maake 6:41-44.

Ɔkakyi Subane Yɛɛ Ɔte Ngyegyelɛ Zo

Duzu ati a Gyisɛse vale ziele ɔ nye zo kɛ ɔmaa menli ahakyi bɛ subane na yeamaa bɛ ngyegyelɛ zo ade dɛlale kɛ ɔyɛ ngyehyɛleɛ mɔɔ ɛnee wɔ ɛkɛ la boɛ anzɛɛ ɔye amaneɛnwunlɛ ɛkɛ ɛ? Ɛnee Gyisɛse ze kɛ Nyamenle ɛbɔ kpɔkɛ kɛ kenlebie ɔbamaa Ye Belemgbunlililɛ ne azɛkye alesama arane kɔsɔɔti na yeaye mɔɔ fa amaneɛnwunlɛ ba la yeavi ɛkɛ bɔkɔɔ. (Luku 4:43; 8:1) Ɛhye ati, mekɛ mɔɔ ɛzoanvolɛ ne mɔ hanle kɛ ɔdɛnla ɛkɛ na ɔyɛ wuleravolɛ ne mɔ ayile la, Gyisɛse hanle kɛ: “Bɛmaa yɛhɔ namunamu mɔɔ bikye ɛke la azo. Ɔwɔ kɛ mebɔ Edwɛkpa ne nolo wɔ ɛkɛ ne mɔ noko, ɔluakɛ ɛhye mɔ ati a membale a.” (Maake 1:32-38) Gyisɛse manle menli amaneɛnwunlɛ zo dele ɛdeɛ, noko ɛnee Nyamenle edwɛkɛ ne mɔɔ ɔbaha la a le ye gyima titile a.

Ɛnɛ, Gyihova Alasevolɛ bɔ mɔdenle sukoa Gyisɛse wɔ bɛ edwɛkɛhanlɛ gyima ne anu. Bɛbɔ mɔdenle kɛ bɛmaa nyanelilɛ zo ade ɔlua menli mɔɔ hyia moalɛ mɔɔ bɛboa bo la azo. Noko Alasevolɛ ne mɔ ɛmbɔ mɔdenle kɛ bɛye nzisi mɔɔ wɔ ewiade la bɛavi ɛkɛ. Bɛdie bɛdi kɛ Nyamenle Belemgbunlililɛ ne badu mɔɔ fa amaneɛnwunlɛ ba la abo bɔkɔɔ. (Mateyu 6:10) Kɛmɔ Gyisɛse yɛle la, bɛbɔ mɔdenle kɛ bɛmaa menli ahakyi bɛ subane na tɛ kɛ bɛkakyi maanyɛlɛ ngyehyɛleɛ ɔ. Ɔfɛta kɛ bɛyɛ ye zɔ ɔluakɛ tɛ alesama ngyegyelɛ kpole a le maanyɛlɛ, emomu ɛbɛlabɔlɛ.

Maanlema Kpalɛ

Kɛ Keleseɛnema la, eza Gyihova Alasevolɛ ze kɛ ɔwɔ kɛ bɛyɛ maanlema kpalɛ. Ɛhye ati, bɛbu arane mgbanyima na bɛdi bɛ eni. Wɔ bɛ mbuluku nee bɛ daselɛlilɛ gyima ne anu, bɛsi menli adua kɛ bɛli mɛla zo. Noko akee, saa arane bie kpondɛ kɛ bɛyɛ debie mɔɔ tia Nyamenle mɛla a, Alasevolɛ ne mɔ ɛnli zo. ‘Bɛtie Nyamenle bɛtɛla sonla.’—Gyima ne 5:29; Wulomuma 13:1-7.

Gyihova Alasevolɛ kɔ menli mɔɔ wɔ bɛ maanle ne anu la kɔsɔɔti ɛkɛ bɛ nee bɛ sukoa Baebolo ne mɔɔ bɛnlie bɛ ɛhwee a. Ngilehilelɛ ɛhye ɛmaa menli dɔɔnwo ɛhakyi bɛ subane. Ɛvolɛ biala, bɛboa menli apenle dɔɔnwo bɛmaa bɛdi nyɛleɛ ɛtane mɔɔ le kɛ sigalɛte ɛnlonlɛ, nzabolɛ, nyile ɛtane ɛnlonlɛ, kyakya ɛdolɛ, nee nla nu ɛbɛlatane zo. Kɛmɔ bɛfa Baebolo ngyinlazo bɛdi gyima wɔ bɛ ɛbɛlabɔlɛ nu la ati, bɛle maanlema mɔɔ bɔ ɛbɛla kpalɛ.

Bieko, Baebolo ngilehilelɛ boa maa abusua ne anu amra nyia ɛbulɛ maa bɛ nwo na adwelielilɛ kpalɛ kɔ zo wɔ agyalɛma, awovolɛ nee bɛ mra yɛɛ ngakula ne mɔ bɔbɔ avinli. Ɛhye le ninyɛne mɔɔ maa abusua nu mia. Saa mbusua nu mia a ɔmaa maanle ne yɛ se.

Mekɛ mɔɔ yɛzuzu edwɛkɛ ɛhye mɔ anwo yɛwie la, kɛzi wɔ adwenle se wɔ ɛ: Asoo Baebolo ne die menli mɔɔ fa maanyɛlɛ fonla nyamenlezonlenlɛ nu la to nu? Mualɛ ne da ali wienyi; ɔnlie ɔndo nu. Noko asoo ɔwɔ kɛ Keleseɛnema yɛ maanlema kpalɛ ɔ? Ɛhɛe, ɔwɔ kɛ bɛyɛ. Kɛzi bɛbayɛ ye ɛ? Ɔlua Gyisɛse edwɛkɛ mɔɔ se bɛyɛ kɛ ngyenle nee kɛnlaneɛ bɛmaa ewiade ne mɔɔ bɛbali zo la azo.

Menli mɔɔ bɔ mɔdenle fa Kelaese adehilelɛ ɛhye di gyima la, nee bɛ mbusua nee bɛ kpalɛzoamra nyia zolɛ nvasoɛ. Gyihova Alasevolɛ mɔɔ bɛwɔ ɛleka mɔɔ ɛde la anye balie kɛ bɛbaha Baebolo ngilehilelɛ ɛhye mɔɔ ɛlɛkɔ zo wɔ wɔ maanle ne anu la anwo edwɛkɛ bɛahile wɔ.a

[Ɔ bo ɛkɛ ne edwɛkɛ]

[Edwɛkɛ mɔɔ bɛkpa wɔ mukelɛ 7]

Gyisɛse bɔle mɔdenle kɛ ɔmaa menli ahakyi bɛ subane, na tɛ maanyɛlɛ ngyehyɛleɛ ɔ

[Edwɛkɛ mɔɔ bɛkpa wɔ mukelɛ 8]

Gyihova Alasevolɛ ze kɛ ɔwɔ kɛ bɛyɛ maanlema kpalɛ