Asoo bɛbazɛkye azɛlɛ ne?

▪ Menli bie mɔ liele lile kɛ bɛbazɛkye azɛlɛ ne wɔ October 21, 2011. Noko yeamba ye zɔ. Harold Camping mɔɔ vi U.S. na ɔyɛ gyima wɔ riledio zo la, ngapezo ne amba nu. Ɔhanle kɛ Ndɛnebualɛ Kenle ne bara May 21, 2011—azɛlɛkpusulɛ kpole bie bazi ewiade, na ye siane nnu anzi, wɔ October 21 azɛlɛ ne bazɛkye.

Noko akee, bɛnrɛzɛkye azɛlɛ ne ɛlɛ. Azɛlɛ Bɔvolɛ ne ɛnrɛmaa adenle. Ye Edwɛkɛ ne ka kɛ: “Ɛdawɔ a wɔbɔ [azɛlɛ] ye a, yɛɛ ɔgyi kpundii.”—Edwɛndolɛ 119:90.

Noko, wɔannea a menli mɔɔ kenga Baebolo ne la bie mɔ baha kɛ bɛbava senle bɛazɛkye azɛlɛ ne. Bɛka kɛ 2 Pita 3:7, 10 kile zɔ, ɔkenga kɛ: “Nyamenle anloa edwɛkɛ ko ye ala azo a bɛlua bɛhua anwuma nee aze mɔɔ kɛkala wɔ ɛkɛ ne la anwo senle bɛzie ɛkɛ bɛlɛfa bɛahendɛ ndɛnebualɛ kenle ne nee menli mɔɔ ɛnze Nyamenle la ɛzɛkyelɛ a. . . . Awulae Kenle ne bara kɛ awule la. Kenle ne, anwuma bava ɛnelɛ kpole bie aminliminli anwomanyunlu na anwumaneamra ayela aholo; na azɛlɛ ye nee debie biala mɔɔ wɔ zolɛ la bayela adɔ nzonle.” Kɛzi ɛzoanvolɛ Pita hanle ye edwɛkɛ ne la, asoo zɔhane ala a ɔwɔ kɛ yɛfa ye ɔ?

Kyɛkyɛ, ɔnle zɔ. Kɛmɔti ɛ? Ɔboalekɛ ɔwɔ kɛ ngyehyɛnu ɛhye mɔ ndelebɛbo nee edwɛkɛ mɔɔ wɔ Pita kɛlata ne nee Baebolo ne anu la kɔsɔɔti yia. Saa yɛfa edwɛkɛ ne zɔhane ala a, ɔbahile kɛ bɛbava senle bɛayela anwumaneamra—nwɔlɔra mgbe mgbe nee ninyɛne gyɛne—ɔluakɛ ɛtanevolɛma wɔ ye ɛleka ekyi bie la ati. Saa ɛ nye ɛnlie ɛnwea zo anwea bie anwo a, asoo ɛbavulevula ɛnwea mɔɔ ɛha la kɔsɔɔti wɔagua ye lɔ ɔ? Nrɛlɛbɛ ɛnle nu kɛ ɛbayɛ zɔ! Zɔhane ala a Gyihova noko ɛnrɛzɛkye ye abɔdeɛ mɔɔ wɔ ewiade ye la kɔsɔɔti ɔluakɛ ye abɔdeɛ ne mɔ ko ɛde atua la ati.

Bieko, adwenle zɔhane nee Gyisɛse Kelaese edwɛkɛ ɛhye ɛnyia: “Nyilalɛ ɛha bɛdabɛ mɔɔ bɛle bɛlɛvo la; [ɔluakɛ] Azɛlɛ ye bayɛ bɛ ɛdeɛ!” (Mateyu 5:5; Edwɛndolɛ 37:29) Asoo selɛ mɔɔ lɛ ɛlɔlɛ la bazi sua kɛnlɛma amaa ye abusua ne na akee yeayela ye? (Edwɛndolɛ 115:16) Ɛhye ɛnrɛyɛ nrɛlɛbɛsɛm! Gyihova ɛnle Bɔvolɛ ala, eza ɔle Selɛ mɔɔ lɛ ɛlɔlɛ.—Edwɛndolɛ 103:13; 1 Dwɔn 4:8.

Pita vale edwɛkɛkpɔkɛ “azɛlɛ” lile gyima wɔ sɛkɛlɛneɛ adenle zo wɔ mekɛ mɔɔ ɛnee ɔlɛka alesama abusua ne anwo edwɛkɛ la—yemɔti amumuyɛma anwo edwɛkɛ yɛɛ ɛnee ɔlɛka a. Yɛ ye nzonlɛ kɛ Pita vale edwɛkɛ ne dole Nowa mekɛ zo Azuyilɛ ne anwo. (2 Pita 3:5, 6) Wɔ zɔhane mekɛ ne, ɛtanevolɛma ala a bɛzɛkyele bɛ a; bɛanzɛkye azɛlɛ ne, tenlenenli Nowa, yɛɛ ye abusua ne. Zɔhane ala a edwɛkɛkpɔkɛ “anwuma” mɔɔ Pita vale lile gyima la noko le sɛkɛlɛneɛ adenle zo a. Wɔ edwɛkɛ ɛhye anu, “anwuma” ne kile tumi mɔɔ menli di ye wɔ ɛtanevolɛma anwo zo la. Ɛhye ati, bɛbaye amumuyɛma mɔɔ ɛnlu bɛ nwo la, nee arelemgbunli atisesebɛma kɔsɔɔti bɛavi ɛkɛ, na bɛava Nyamenle tumililɛ anzɛɛ ye Belemgbunlililɛ ne mɔɔ wɔ anwuma la bazie ɔ gyakɛ anu.—Daneɛle 2:44.

Yemɔti, bɛbazɛkye yɛ azɛlɛ ne ɔ? Kyɛkyɛ. Sɛkɛlɛneɛ adenle zo azɛlɛ ne, anzɛɛ alesama amumuyɛma a bɛbazɛkye bɛ a. Azɛlɛ mumua ne nee menli mɔɔ di boɛ la badɛnla ɛkɛ mekɛ mɔɔ ɛnlɛ awieleɛ.—Mrɛlɛbulɛ 2:21, 22.