Asoo Ɛze?

Kɛmɔti a ɛnee ezukoasenzavoma wɔ Gyɛlusalɛm ɛzonlenlɛ sua ne anu ɛ?

▪ Ɔhale ekyii na Gyisɛse awu la, ɔdendɛle ɔtiale nzisi mɔɔ ɛnee ɛlɛkɔ zo wɔ ɛzonlenlɛ sua ne anu la. Baebolo ne hanle mɔɔ Gyisɛse yɛle la anwo edwɛkɛ kɛ: “Ɔvoanle bɛdabɛ mɔɔ bɛlɛdi gua wɔ ɛkɛ ne la amuala. Ɔbutubutule menli mɔɔ senza ezukoa la ɛkponle ne mɔ, ɔhanle menli mɔɔ tɔne mɔlɔnoma la mbia ne mɔ ɔguale, na ɔzele bɛ kɛ, “Bɛhɛlɛ ye . . . kɛ: . . . ‘Bɛbavɛlɛ me Ɛzonlenlɛ Sua ne nzɛlɛlɛ sua.’ Na bɛmɛ, bɛyɛ ye awulema fealeka!”—Mateyu 21:12, 13.

Ɛvoya ne mɔɔ lumua la anu Dwuuma nee menli mɔɔ hakyile bɛ nwo Dwuuma la vi bɛ maanle nee bɛ azuamgbole zo vale bɛ ezukoa rale Gyɛlusalɛm ɛzonlenlɛ sua ne anu. Noko, ɛnee ɔwɔ kɛ bɛfa ezukoa mɔɔ bɛdie bɛto nu la a bɛtua ɛvolɛ biala ɛzonlenlɛ sua adwule ne, bɛtɔ nane bɛbɔ afɔle, na bɛye ndoboa a. Ezukoasenzavoma ne zenzanle ezukoa biala mɔɔ menli ne nee ye vi bɛ maanle nu rale la, noko bɛsisile bɛ. Saa Dwuuma ɛvoyia ne mɔ ɛlɛbikye a, zɛhae ezukoasenzavoma ye siezie bɛ ɛkponle wɔ bɛdabɛ mɔɔ bɛnle Dwuuma la ɛleka ne wɔ ɛzonlenlɛ sua ne anu.

Gyisɛse edwɛkɛ mɔɔ ɔhanle kɛ bɛlɛfa ɛzonlenlɛ sua ne bɛayɛ “awulema fealeka” la maa ɔda ali wienyi kɛ ɛnee bɛsenza bɛ ezukoa ne bolɛ ɛsesebɛ.