“Duzu Ati A Ɔwɔ Kɛ Ɛyila Ɛ Nwo Zo Ɛmaa Gyihova A?”
“Nɔe, Nyamenle ne mɔɔ mele ye ɛdeɛ na mesonle ye la anwumabɔvolɛ rale me nwo ɛke.”—GYI. 27:23.
1. Duzu a bɛdabɛ mɔɔ bɛkɔ kɛ bɛzɔne bɛ la ɛlimoa ɛyɛ a, na kpuya boni mɔ a ɛhye maa yɛbiza a?
“ASOO wɔnlu ɛ nwo wɔvi wɔ ɛtane nwo, wɔyila ɛ nwo zo wɔmaa Gyihova na wɔlie wɔdo nu kɛ ɔbalua Gyisɛse Kelaese anwo zo a yealie wɔ ngoane ɔ?” Kpuya nwiɔ ne mɔɔ bɛbiza ɛzɔnenlɛma wɔ ɛzɔnenlɛ ɛdendɛlɛ ne awieleɛ la anu ko ɛne. Duzu ati a ɔhyia kɛ Kilisienema yila bɛ nwo zo maa Gyihova a? Saa yɛyila yɛ nwo zo yɛmaa Nyamenle a kɛzi ɔboa yɛ ɛ? Duzu ati a saa awie ɛzonlenlɛ bazɔ Nyamenle anye a ɔwɔ kɛ ɔyila ɔ nwo zo a? Amaa yɛade mualɛ ne mɔ abo la, ɔwɔ kɛ yɛdimoa yɛnwu mɔɔ bɛnwozoyilalɛ kile la.
2. Duzu a awie anwo azo mɔɔ ɔyila yeamaa Gyihova la kile a?
2 Duzu a awie anwo azo mɔɔ ɔyila yeamaa Nyamenle la kile a? Yɛ kɛzi ɛzoanvolɛ Pɔɔlo hanle ɔ nee Nyamenle agɔnwolɛvalɛ ne anwo edwɛkɛ la nzonlɛ. Ɔvɛlɛle Gyihova wɔ menli mɔɔ ɔ nee bɛ wɔ meli bie anu la anyunlu kɛ “Nyamenle ne mɔɔ mele ye ɛdeɛ” la. (Kenga Gyima ne 27:22-24.) Nɔhalɛ Kilisienema amuala le Gyihova ɛdeɛ. Noko akee, ewiade ne amuala “wɔ amumuyɛnli ne tumi bo.” (1 Dwɔn 5:19) Saa Kilisienema dua asɔneyɛlɛ zo yila bɛ nwo zo maa Gyihova a ɛnee bɛrayɛ ye ɛdeɛ. Bɛnwozoyilalɛ zɛhae le ɛwɔkɛ mɔɔ awie fi ye ɛhulolɛ nu bɔ Nyamenle. Ɔyɛ ɛhye ɔwie a akee bɛazɔne ye.
3. Duzu a ɛnee Gyisɛse ɛzɔnenlɛ ne kile a, na kɛ ɔkɛyɛ na ye ɛdoavolɛma azukoa ye neazo ne ɛ?
3 Gyisɛse yɛle neazo maanle yɛ wɔ mekɛ mɔɔ ɔzile kpɔkɛ kɛ ɔyɛ Nyamenle ɛhulolɛdeɛ la. Kɛmɔ bɛwole ye bɛdole Yizilayɛ maanle ne mɔɔ ɛnee bɛyila zo bɛmaa Nyamenle anu la ati, ɛnee ɔngyia kɛ ɔyila ɔ nwo zo bieko. Noko, mekɛ mɔɔ bɛsɔne ye la ɔyɛle debie bieko mɔɔ Mɛla ne anga kɛ bɛyɛ la. Nyamenle Edwɛkɛ ne maa yɛnwu kɛ ɔhanle kɛ: “Nea! Mera . . . kɛ mebayɛ wɔ ɛhulolɛdeɛ, O Nyamenle.” (Hib. 10:7; Luku 3:21) Yemɔti ɛnee Gyisɛse ɛzɔnenlɛ ne kile kɛ yedu ɔ nwo yemaa Nyamenle kɛ ɔbayɛ Ye ɛhulolɛdeɛ. Ye ɛdoavolɛma sukoa ye neazo ne na bɛfa bɛ nwo bɛmaa kɛ bɛzɔne bɛ. Noko wɔ bɛ afoa nu, bɛ ɛzɔnenlɛ ne le bagua nu debie mɔɔ kile kɛ bɛlua asɔneyɛlɛ zo bɛyila bɛ nwo zo bɛmaa Nyamenle.
Kɛzi Bɛnwozoyilalɛ Boa Yɛ La
4. Duzu a Devidi nee Dwɔnatan agɔnwolɛvalɛ ne kilehile yɛ wɔ anwofamaa nwo a?
4 Kilisienema anwozoyilalɛ le anyebolo edwɛkɛ. Anyebolo wɔ nu tɛla ɛwɔkɛ mɔɔ yɛbɔ menli gyɛne la. Noko kɛzi bɛnwozoyilalɛ boa yɛ ɛ? Yɛyɛ ndotonwo bie. Yɛva nvasoɛ mɔɔ menli nyia ye wɔ mekɛ mɔɔ bɛbabɔ bɛ nwo ɛwɔkɛ kɛ bɛyɛ agɔnwolɛma la kɛ neazo. Amaa wɔanyia agɔnwolɛ kpalɛ la ɔwɔ kɛ ɛyɛ agɔnwolɛ kpalɛ. Ɛhye kile kɛ ɔwɔ kɛ ɛdwenle ɛ gɔnwo ne anwo. Agɔnwolɛvalɛ kɛnlɛma zɛhae anwo neazo ko mɔɔ wɔ Baebolo ne anu la a le Devidi nee Dwɔnatan ɛdeɛ ne. Bɛbɔle bɛ nwo ɛwɔkɛ kɛ bɛbayɛ agɔnwolɛma. (Kenga 1 Samoɛle 17:57; 18:1, 3.) Kɛ mɔɔ yɛnwu ye wɔ bɛ ɛdeɛ ne anu la, saa menli di nɔhalɛ maa bɛ nwo a yɛɛ bɛ agɔnwolɛvalɛ ne anu yɛ se a.—Mrɛ. 17:17; 18:24.
5. Saa akɛlɛ bie fa ɔ nwo maa ɔ menle bɔkɔɔ a nvasoɛ boni a ɔnyia a?
5 Mɛla ne mɔɔ Nyamenle vale maanle Yizilayɛma la maa yɛnwu nvasoɛ bieko mɔɔ awie nee ɔ gɔnwo yɛ ngyekyeleɛ a ɔnyia la. Ɛnee saa akɛlɛ bie kulo kɛ ɔnyia ɔ menle mɔɔ le sonlakpalɛ la anwobanebɔlɛ dahuu a, ɛnee ɔwɔ kɛ ɔ nee ɔ menle ne yɛ ngyekyeleɛ. Mɛla ne ka kɛ: “Saa akɛlɛ ne ka tinli zo kɛ, ‘Mekulo me menle, me ye nee me mra; memkpondɛ kɛ mekɔ’ a, ɔwɔ kɛ ɔ menle ne fa ye kɔ nɔhalɛ Nyamenle ne anyunlu. Akee ɔbava ye yeahɔgyinla anlenkɛ ne anzɛɛ felɛmo ne anwo, na ɔ menle ne ava bulalɛ afiti ɔ nzo, na yeayɛ ye akɛlɛ wɔ ye ngoane mekɛ kɔsɔɔti anu.”—Ɛzɛ. 21:5, 6.
6, 7. (a) Kɛzi ngyekyeleɛ mɔɔ menli yɛ la boa bɛ ɛ? (b) Duzu a yemɔ maa yɛnwu ye wɔ yɛ nee Gyihova agɔnwolɛvalɛ ne anwo a?
6 Agyalɛ le ngyekyeleɛ mɔɔ menli nwiɔ yɛ la anwo neazo. Ɔle ngyekyeleɛ mɔɔ anyebolo wɔ nu mɔɔ nrenyia nee raalɛ yɛ a. Menli nwiɔ mɔɔ de kɛ agyalɛma noko bɛtɛgyale la ɛnrɛhola ɛnrɛnyia nɔhalɛ banebɔlɛ; zɔhane ala a ɔde ye wɔ bɛ mra afoa nu a. Noko saa nrenyia nee raalɛ gya bɛ nwo na bɛbu Baebolo ne a, bɛbɔ mɔdenle bɛdi ngyegyelɛ mɔɔ bɛyia ye la anwo gyima, bɛnriandi.—Mat. 19:5, 6; 1 Kɔl. 13:7, 8; Hib. 13:4.
7 Wɔ Baebolo mekɛ nu, menli mɔɔ yɛle gualilɛ nee gyima nwo ngyehyɛleɛ la nyianle zolɛ nvasoɛ. (Mat. 20:1, 2, 8) Kɛ ɔde ye ɛnɛ noko la ɛne. Kɛ neazo la, saa yɛkayɛ gyima bie anzɛɛ bɛfa yɛ gyima nu na yɛ nee gyima menle ne yɛ ngyehyɛleɛ na yɛkɛlɛ a, ɔboa yɛ kpalɛ. Kɛ mɔɔ nɔhalɛlilɛ nwo hyia wɔ agɔnwolɛvalɛ, agyalɛ nee gyima nu la, zɔhane ala a saa yɛyila yɛ nwo zo yɛmaa Gyihova a ɔmaa yɛ agɔnwolɛvalɛ ne anu mia a! Maa yɛzuzu kɛzi menli mɔɔ dɛnlanle aze wɔ tete ne la nyianle bɛ nwo zo mɔɔ bɛyilale bɛmaanle Gyihova Nyamenle la azo nvasoɛ nee mɔɔ ɛnee ɔkile la anwo.
Kɛzi Bɛnwozoyilalɛ Boale Yizilayɛma La
8. Mɔɔ Yizilayɛma yilale bɛ nwo zo maanle Nyamenle la ɛnee duzu a ɔkile a?
8 Yizilayɛma yilale bɛ nwo zo maanle Gyihova wɔ mekɛ mɔɔ bɛbɔle ye ɛwɔkɛ la. Gyihova maanle bɛyiale wɔ Boka Saenae abo na ɔzele bɛ kɛ: “Saa bɛtie me ne bɔkɔɔ na bɛdi me ngyekyeleɛ zo a, mebaye bɛ meavi menli kɔsɔɔti anu meava bɛ meayɛ me agyapadeɛ titili.” Menli ne amuala yɛle ko na bɛbuale kɛ: “Mɔɔ Gyihova ɛha la amuala, yɛbayɛ.” (Ɛzɛ. 19:4-8) Ɛnee bɛnwozoyilalɛ ne ɛnle ngyekyeleɛ anzɛɛ ɛwɔkɛ bie mɔɔ bɛlɛbɔ la ala. Ɛnee ɔkile kɛ bɛle Gyihova ɛdeɛ na Gyihova nee bɛ lile kɛ ye “agyapadeɛ titili.”
9. Nvasoɛ boni a Yizilayɛma nyianle ye vile bɛnwozoyilalɛ ne anu a?
9 Yizilayɛma rayɛle Gyihova ɛdeɛ la bɛnyianle nvasoɛ dɔɔnwo. Ɔlile nɔhalɛ ɔnleanle bɛ kɛ mɔɔ awovolɛ mɔɔ lɛ ɛlɔlɛ nea ɔ ra la. Nyamenle zele Yizilayɛma kɛ: “Asoo raalɛ arɛle bavi ɔ ra mɔɔ no nyɛfonlɛ, anzɛɛ ɔ kunlu ɛnrɛyelɛyela ye ɛnrɛmaa ɔ kunlu ralɛ nrenyia ɔ? Saa mraalɛ ɛhye mɔ arɛle fi bɔbɔ a, mame me rɛle ɛnrɛvi wɔ ɛlɛ.” (Aye. 49:15) Gyihova vale Mɛla ne hilele bɛ adenle, ɔmaanle bɛ ngapezoma mɔɔ maanle bɛ anwosesebɛ yɛɛ ɔmaanle anwumabɔvolɛma bɔle bɛ nwo bane. Edwɛndolɛnli bie hɛlɛle kɛ: “Ɔka ye edwɛkɛ ne ɔkile Gyekɔbo, ye ngyehyɛleɛ nee ye ndɛnebualɛ ɔkile Yizilayɛ. Ɔtɛyɛle ɛhye ɔtɛmaanle maanle gyɛne biala.” (Edw. 147:19, 20; kenga Edwɛne 34:7, 19; 48:14.) Kɛ mɔɔ Gyihova nleanle maanle ne mɔɔ ɛnee le ye ɛdeɛ wɔ tete ne la, zɔhane ala a ɔbanlea bɛdabɛ mɔɔ bɛyila bɛ nwo zo bɛmaa ye la ɛnɛ a.
Deɛmɔti Ɔwɔ Kɛ Yɛyila Yɛ Nwo Zo Yɛmaa Nyamenle La
10, 11. Asoo bɛwo yɛ bɛdo Nyamenle abusua ne anu ɔ? Kilehile nu.
10 Saa yɛlɛka Kilisienema anwozoyilalɛ nwo edwɛkɛ a bie a bie mɔ babiza kɛ, ‘Duzu ati a ɔhyia kɛ meyila me nwo zo kolaa na meahola meazonle Nyamenle ɛ? Saa yɛsuzu gyinlabelɛ mɔɔ yɛlɛ ye kɛkala wɔ Nyamenle anyunlu la anwo a ɔmaa yɛnwu deɛmɔti ɔle zɔ la. Kakye kɛ ɔlua Adam ɛtane ne ati, yɛmboka Nyamenle abusua ne anwo. (Wlo. 3:23; 5:12) Bɛnwozoyilalɛ anwo hyia amaa bɛalie yɛ bɛaboka Nyamenle abusua ne anwo. Maa yɛnlea deɛmɔti ɔle zɔ la.
11 Kɛmɔ yɛ awovolɛ le ɛtanevolɛma la ati bɛngola bɛmmaa yɛ ngoane mɔɔ di munli. (1 Tim. 6:19) Bɛanwo yɛ kɛ Nyamenle amra ɔluakɛ mekɛ mɔɔ Adam nee Yive yɛle ɛtane la alesama hwenle bɛ nwo vile Selɛ ne nee Bɔvolɛ ne mɔɔ lɛ ɛlɔlɛ la anwo. (Fa toto Ditilɔnomi 32:5 anwo.) Ɔvi zɔhane mekɛ ne, alesama ɛmboka Nyamenle abusua ne anwo, bɛhwe bɛ nwo bɛvi Nyamenle anwo.
12. (a) Kɛ ɔkɛyɛ na alesama araboka Nyamenle abusua ne anwo ɛ? (b) Duzu a ɔwɔ kɛ yɛyɛ kola na bɛazɔne yɛ a?
12 Noko akee, yɛ nuhua ko biala bahola azɛlɛ Nyamenle kɛ ɔva yɛ ɔboka ye abusua ne anwo.a Kɛ ɔkɛyɛ na ɛtanevolɛma mɔɔ le kɛ yɛdayɛ la ahola ayɛ zɔ ɛ? Ɛzoanvolɛ Pɔɔlo hɛlɛle kɛ: “Mekɛ mɔɔ yɛle agbɔvolɛ la bɛluale ɔ Ra ne ewule ne azo bɛzieziele yɛ nee Nyamenle avinli.” (Wlo. 5:10) Saa bɛlɛsɔne yɛ a yɛsɛlɛ Nyamenle kɛ ɔmaa yɛnyia adwenle kpalɛ amaa yealie yɛ yeado nu. (1 Pita 3:21) Noko kolaa na bɛazɔne yɛ la, ɔwɔ kɛ yɛyɛ ninyɛne bie mɔ. Ɔwɔ kɛ yɛnwu Nyamenle, yɛnyia ye nu anwodozo, yɛnu yɛ nwo na yɛkakyi yɛ ɛbɛlabɔlɛ. (Dwɔn 17:3; Gyi. 3:19; Hib. 11:6) Debie bieko wɔ ɛkɛ mɔɔ ɔwɔ kɛ yɛyɛ amaa Nyamenle alie yɛ ahɔ ye abusua ne anu. Duzu ɔ?
13. Duzu ati a ɔfɛta kɛ awie yila ɔ nwo zo maa Nyamenle kolaa na yeahola yeaboka Ye abusua ne anwo ɛ?
13 Kolaa na awie mɔɔ ɛhwe ɔ nwo ɛvi Nyamenle anwo ahola araboka ye abusua ne anwo la, ɔwɔ kɛ ɔdimoa ɔfi ye ɛhulolɛ nu ɔbɔ Gyihova ɛwɔkɛ. Yɛyɛ ndonwo bie amaa yɛade ɔ bo. Yɛva selɛ bie mɔɔ le atiakunlukɛnlɛma na ɔkulo kɛ ɔfa arisa kakula bie ɔboka ye abusua ne anwo la kɛ neazo. Awie biala ze nrenyia ne kɛ ɔle selɛ kpalɛ. Noko, kolaa na yealie arisa ne kɛ ɔ ra la ɔkulo kɛ kakula ne bɔ ye ɛwɔkɛ. Yemɔti nrenyia ne se ye kɛ: “Kolaa na meava wɔ kɛ me ra la, mekulo kɛ menwu ye kɛ ɛbahulo me na wɔabu me kɛ wɔ papa a.” Kyesɛ kakula ne fi ye ɛhulolɛ nu bɔ nrenyia ne ɛwɔkɛ kolaa na yealie ye yeaboka ye abusua ne anwo. Asoo ndelebɛbo ɛnle nu ɔ? Zɔhane ala a, Gyihova noko die bɛdabɛ mɔɔ bɛfi bɛ ɛhulolɛ nu bɛyila bɛ nwo zo bɛmaa ye la boka ye abusua ne anwo a. Baebolo ne ka kɛ: “Bɛva bɛ sonlabaka ne bɛmaa Nyamenle kɛ afɔlebɔlɛ mɔɔ de ngoane nu, nwolɛ te na ɔsɔ Nyamenle anye.”—Wlo. 12:1.
Bɛnwozoyilalɛ Da Ɛlɔlɛ Nee Diedi Ali
14. Adenle boni azo a bɛnwozoyilalɛ da ɛlɔlɛ ali a?
14 Saa yɛyila yɛ nwo zo yɛmaa Gyihova a ɔkile kɛ yɛkulo ye kpalɛ. Wɔ adenle bie azo, ɔle kɛ agyalɛ ndane anzɛɛ ɛwɔkɛ la. Adiema nrenyia bie bɔ ɛwɔkɛ kɛ ɔbali nɔhalɛ yeamaa ɔ ye ɔnva nwo mɔɔ ɔbazi biala la. Ɛhye ɛnle ɛwɔkɛ mɔɔ ɛbɔ kɛ ɛbayɛ debie ala, emomu ɔle ɛwɔkɛ mɔɔ ɛbɔ awie ɔluakɛ ɛkulo ye la ati. Saa adiema nrenyia bie kulo kɛ ɔ nee raalɛ bie tɛnla na ɔnyia agyalɛ zo nvasoɛ a, kyesɛ ɔbɔ ɛwɔkɛ. Zɔhane ala a, saa yɛkulo kɛ yɛnyia Gyihova abusua ne azo nvasoɛ a ɔwɔ kɛ yɛyila yɛ nwo zo yɛmaa ye a. Yemɔti yɛyila yɛ nwo zo yɛmaa Nyamenle ɔluakɛ, ɔnva nwo kɛ yɛnli munli la, yɛkulo kɛ yɛyɛ ye ɛdeɛ na yɛbɔ kpɔkɛ kɛ yɛbali nɔhalɛ yɛamaa ye ɔnva nwo biala mɔɔ ɔbazi la.—Mat. 22:37.
15. Kɛzi bɛnwozoyilalɛ da diedi ali ɛ?
15 Saa yɛyila yɛ nwo zo yɛmaa Nyamenle a, yɛkile kɛ yɛlɛ ye nu diedi. Duzu ati ɔ? Diedi mɔɔ yɛlɛ ye wɔ Gyihova anu la maa yɛnyia anwodozo kɛ ɔle kpalɛ kɛ yɛbabikye Nyamenle. (Edw. 73:28) Yɛze kɛ kɛmɔ yɛde “awolɛndoazo ɛhye mɔɔ yɛ ɛtane na ɔnyɛ mɔɔ le kpalɛ la anu” la ati, ɔyɛ a ɔbayɛ se kɛ yɛ nee Nyamenle balua. Noko yɛlɛ ɛwɔkɛ mɔɔ Nyamenle ɛbɔ kɛ ɔbaboa yɛ la anu anwodozo. (Fel. 2:15; 4:13) Yɛze kɛ yɛnli munli, noko yɛlɛ anwodozo kɛ saa yɛyɛ nvonleɛ bɔbɔ a Nyamenle baze yɛ anwunvɔne. (Kenga Edwɛne 103:13, 14; Wulomuma 7:21-25.) Yɛlɛ diedi kɛ Gyihova bamaa yɛanyia kpɔkɛ mɔɔ yɛbɔ kɛ yɛdi nɔhalɛ la anwo ahatualɛ.—Dwobu 27:5.
Bɛnwozoyilalɛ Maa Yɛ Nye Die
16, 17. Duzu ati a saa yɛyila yɛ nwo zo yɛmaa Gyihova a yɛ nye die a?
16 Saa yɛyila yɛ nwo zo a yɛ nye die ɔluakɛ yɛva yɛ nwo yɛmaa Gyihova. Gyisɛse hanle nɔhalɛ edwɛkɛ bie kɛ: “Anyelielɛ dɔɔnwo wɔ ɛmaanlɛ nu tɛla ɛlielɛ.” (Gyi. 20:35) Gyisɛse azɛlɛ ye azo ɛzonlenlɛ gyima ne maanle ɔ nye liele. Ɛnee ɔdwu mekɛ ne bie a ɔkoati ɔ menle ɛlielɛ, aleɛ yɛɛ arɛlekyekyelɛ amaa yeaboa awie mɔ yeamaa bɛanwu ngoane adenle ne. (Dwɔn 4:34) Gyisɛse lile fɛlɛko kɛ ɔlɛmaa ɔ Ze anye alie la. Gyisɛse hanle kɛ: “Meyɛ mɔɔ sɔ ɔ nye la dahuu.”—Dwɔn 8:29; Mrɛ. 27:11.
17 Yemɔti amaa Gyisɛse ɛdoavolɛma anye alie wɔ ɛbɛlabɔlɛ nu la ɔzele bɛ kɛ: “Saa awie kulo kɛ ɔtoa me a, maa ɔkpo ɔ nwo.” (Mat. 16:24) Saa yɛyɛ zɔ a ɔtwe yɛ ɔbikye Gyihova. Asoo awie wɔ ɛkɛ ne mɔɔ ɔlɛ ɛlɔlɛ na ɔbahola yeanlea yɛ kpalɛ yeadɛla Gyihova?
18. Duzu ati a saa yɛdi yɛ nwo zo ɛyilalɛ ɛwɔkɛ ne azo a yɛ nye die kpalɛ tɛla kɛ yɛbadu yɛ nwo yɛamaa debie anzɛɛ awie gyɛne a?
18 Saa yɛyila yɛ nwo zo yɛmaa Gyihova na yɛdi yɛ edwɛkɛ zo yɛyɛ ye ɛhulolɛdeɛ a, ɔmaa yɛ nye die kpalɛ tɛla kɛ yɛbadu yɛ nwo yɛamaa debie anzɛɛ awie gyɛne bie la. Kɛ neazo la, menli dɔɔnwo fa bɛ mekɛ kpondɛ anwonyia noko bɛnnyia nɔhalɛ anyelielɛ nee ahunlundwolɛ. Noko akee, bɛdabɛ mɔɔ bɛyila bɛ nwo zo bɛmaa Gyihova la nyia nɔhalɛ anyelielɛ. (Mat. 6:24) “Nyamenle le [bɛ] gɔnwo gyimayɛvo.” Ɛhye le enililɛ kpole mɔɔ maa bɛ nye die. Noko bɛyila bɛ nwo zo bɛmaa Nyamenle mɔɔ anye sɔ mɔɔ bɛyɛ la na tɛ gyima bie. (1 Kɔl. 3:9) Nyamenle anye sɔ bɛ tunwomaa ne tɛla awie biala. Ɔbamaa ye nɔhalɛ azonvolɛ ayɛ mgbavolɛ nee mbɛlɛra bieko amaa bɛanyia ye ɛlɔlɛ ne azo nvasoɛ dahuu.—Dwobu 33:25; kenga Hibuluma 6:10.
19. Nwolɛ adenle boni a bɛdabɛ mɔɔ bɛyila bɛ nwo zo bɛmaa Gyihova la nyia a?
19 Saa ɛyila ɛ nwo zo ɛmaa Gyihova a ɔmaa ɛ nee ye nyia agɔnwolɛvalɛ kyengye. Baebolo ne ka kɛ: “Bɛbikye Nyamenle, na ɔbabikye bɛ. (Gye. 4:8; Edw. 25:14) Wɔ edwɛkɛ mɔɔ doa zo la anu, yɛbazuzu deɛmɔti yɛbahola yɛava anwodozo yɛadu yɛ nwo yɛamaa Gyihova la anwo.
[Ɔbodwɛkɛ]
a Gyisɛse “mboane gyɛne” ne ɛnrɛyɛ Nyamenle amra kyesɛ ɛvolɛ apenle ne ba awieleɛ. Noko akee, kɛmɔ bɛyila bɛ nwo zo bɛmaa Nyamenle la ati, bɛkola bɛfɛlɛ Nyamenle kɛ bɛ “Ze” yɛɛ bɛkola bɛbu bɛ kɛ bɛle Gyihova abusua ne anu amra.—Dwɔn 10:16; Aye. 64:8; Mat. 6:9; Yek. 20:5.
Kɛzi Ɛbaye Ɔ Nloa Ɛ?
• Saa awie yila ɔ nwo zo maa Nyamenle a ɔkile duzu?
• Saa yɛyila yɛ nwo zo yɛmaa Nyamenle a kɛzi ɔboa yɛ ɛ?
• Duzu ati a ɔhyia kɛ Kilisienema yila bɛ nwo zo maa Gyihova a?
[Nvoninli]
Saa yɛdi yɛ nwo zo ɛyilalɛ ɛwɔkɛ ne azo a yɛnyia nɔhalɛ anyelielɛ