Babɛle Tawa Ne

Wɔ Azuyilɛ ne anzi, Nowa amra mrenyia ne mɔ nee bɛ ye mɔ wole ngakula dɔɔnwo. Akee bɛ abusua ne yɛle kpole na bɛdɛlɛle bɛhɔle azɛlɛ ne azo ɛleka ngakyile kɛ mɔɔ Gyihova hanle la.

Noko bɛ nuhua bie mɔ andie Gyihova. Bɛhanle kɛ: ‘Bɛmaa yɛkyekye suakpole na yɛdɛnla ɛke. Yɛbazi tawa yɛamaa yeahɔ anwuma, amaa yɛalie duma.’

Gyihova anye anlie mɔɔ bɛyɛle la anwo, yemɔti ɔzile bɛ adenle. Ɛze mɔɔ ɔyɛle a? Ɔhakyile bɛ aneɛ ne arɛlevilɛ nu. Kɛmɔ ɛnee bɛnde bɛ nwo aneɛ bieko la ati, bɛangola sua ne si. Bɛvɛlɛle suakpole ne Babɛle, ɔ bo kile “Basabasayɛlɛ.” Akee menli bɔle ɔ bo kɛ bɛbɔ asande wɔ azɛlɛ ne azo. Noko bɛhɔle zo bɛyɛle ninyɛndane wɔ ɛleka biala mɔɔ bɛhɔdɛnlanle la. Asoo ɛnee awie wɔ ɛkɛ mɔɔ ɔkulo Gyihova ɔ? Yɛbanwu ɛhye wɔ tile bieko anu.