Menli Mɔtwɛ Nyianle Ngoane

Nowa nee ye abusua ne yɛɛ nane ne mɔ hɔle ɛlɛne ne anu. Gyihova dole anlenkɛ ne anu na ezule ne bɔle ɔ bo kɛ ɔtɔ. Ɔdɔle kpole kpalɛ yemɔti ɛlɛne ne tulule nzule ne anye. Akee nzule ne vale azɛlɛ ne amuala azo. Ɛtanevolɛma kɔsɔɔti wule. Noko Nowa nee ye abusua ne nyianle ngoane. Ɛbahola wɔapɛ kɛzi bɛ nye liele kɛ bɛdiele Gyihova la anwo nvoninli ɔ?

Ezule ne dɔle alehyenlɛ nee aledwolɛ kenle 40 na ɔpenle. Akee nzule ne sesanle ngyikyi ngyikyi. Awieleɛ bɔkɔɔ ne, ɛlɛne ne hɔnwenle boka bie azo. Noko ɛnee nzule dɔɔnwo wɔ azɛlɛ ne azo, yemɔti Nowa nee ye abusua ne andwu aze ɛkɛ ne ala.

Akee nzule ne sesanle bɔkɔɔ. Nowa nee ye abusua ne lile ɛvolɛ ko nee ɔ nzi wɔ ɛlɛne ne anu. Akee Gyihova hanle kɛ bɛbahola bɛadwu bɛavi ɛlɛne ne anu. Bɛ nye liele kpole kɛ Gyihova ɛlie bɛ ngoane la, yemɔti bɛbɔle afɔle bɛmaanle ye.

Bɛ afɔlebɔlɛ ne zɔle Gyihova anye. Yemɔti ɔbɔle ɛwɔkɛ kɛ ɔnrɛva azuyilɛ ɔnrɛzɛkye ewiade ye bieko. Ɔmaanle nyangondonle (rainbow) dole anwomanyunlu ɔvale ɔhilele kɛ ɔbali ye ɛwɔkɛ zo. Wɔnwu nyangondonle ɛlɛ ɔ?

Akee Gyihova hanle hilele Nowa nee ye abusua ne kɛ bɛwo bɛmaa azɛlɛ ne ɛyi.