Ɔyɛ Yɛ Fɛ Kɛ Yɛde Edwɛkɛ Mɔɔ Vea

Awie ɛha edwɛkɛ bie mɔɔ vea la ɛhile wɔ ɛlɛ ɔ?​—a Baebolo ne ka edwɛkɛ titile bie mɔɔ vea la anwo edwɛkɛ. Ɔle edwɛkɛ titile ɔluakɛ ɔvi Nyamenle ɛkɛ. Eza ɔvea ɔluakɛ menli ande nwolɛ edwɛkɛ. Ɛnee anwumabɔvolɛma bɔbɔ kulo kɛ bɛte nwolɛ edwɛkɛ dɔɔnwo. Ɛkulo kɛ ɛnwu zɔhane edwɛkɛ ne mɔɔ vea la ɔ?—

Mekɛ tendenle mɔɔ ɛze ɛhɔ la, Nyamenle bɔle nrenya nee raalɛ mɔɔ lumua la. Bɛfɛlɛ bɛ Adam nee Yive. Nyamenle manle bɛ aako kɛnlɛma mɔɔ bɛfɛlɛ ye Yidɛn tola la. Saa Adam nee Yive diele Nyamenle a, anrɛɛ bɛ nee bɛ mra bahola ayɛ azɛlɛ ye amuala paladaese kɛ zɔhane tola ne la. Eza anrɛɛ bɛbahola bɛadɛnla Paladaese ɛkɛ ne dahuu. Noko ɛkakye mɔɔ Adam nee Yive yɛle la ɔ?—

Adam nee Yive yɛle Nyamenle anwo anzosesebɛ, na ɛhye ati a ɛnɛ yɛnle paladaese ne anu a. Noko Nyamenle hanle kɛ ɔbamaa azɛlɛ ye amuala azo ayɛ kɛnlɛma, na awie biala badɛnla aze dahuu na ɔ nye alie. Kɛzi ɔbayɛ ɛhye ɛ? Mekɛ tendenle bie anu, ɛnee menli ɛnze. Ɛnee ɔle edwɛkɛ mɔɔ vea.

Gyisɛse rale azɛlɛ ye azo la, ɔhanle ɛhye anwo edwɛkɛ dɔɔnwo ɔhilele menli. Ɔhanle kɛ ɔfane Nyamenle Belemgbunlililɛ ne anwo. Gyisɛse hanle hilele menli kɛ bɛzɛlɛ kɛ zɔhane Belemgbunlililɛ ne ɛrɛla. Ɔbamaa azɛlɛ ye azo ayɛ paladaese kɛnlɛma.

Ɔyɛ wɔ fɛ kɛ wɔnwu edwɛkɛ ɛhye mɔɔ vea la ɔ?— Kakye kɛ menli mɔɔ tie Gyihova la angomekye a bahɔ Paladaese ɛkɛ ne bie a. Baebolo ne ka mrenya nee mraalɛ mɔɔ diele Gyihova la anwo edwɛkɛ dɔɔnwo kile yɛ. Ɛkulo kɛ ɛsukoa bɛ nwo edwɛkɛ dɔɔnwo ɔ?— Maa yɛnlea kɛ yɛbanwu bɛ nuhua bie mɔ nee kɛzi yɛbahola yɛayɛ kɛ bɛdabɛ la.