Nwane A Amgba Nea Ewiade Ye Azo A?

MƆƆ BAEBOLO NE KA LA

“Amumuyɛnli ne a nea ewiade ye amuala azo a.”​—1 Dwɔn 5:19.

“Nyamenle Ara ne rale . . . kɛ ɔbazɛkye Abɔnsam gyima.”​—1 Dwɔn 3:8, New Century Version.

KƐZI ƆBABOA WƆ LA

Ɔbamaa wɔanwu deɛmɔti ngyegyelɛ wɔ ewiade ye anu la.​—Yekile 12:12.

Ɔbamaa wɔalie wɔali kɛ ewiade ye bayɛ kpalɛ.​—1 Dwɔn 2:17.

ASOO YƐBAHOLA YƐALIE MƆƆ BAEBOLO NE KA LA YƐALI AMGBA?

Ɛhɛe, ɔlua ninyɛne nsa bie ati:

• Seetan tumililɛ ne bazɛkye. Gyihova ɛbɔ kpɔkɛ kɛ ɔmaa tumi mɔɔ Seetan ɛlɛdi wɔ alesama anwo zo la ara awieleɛ. Yebɔ ɛwɔkɛ kɛ ‘ɔbazɛkye Abɔnsam’ na yeayɛ ninyɛne mɔɔ Seetan ɛzɛkye bɛ la boɛ.​—Hibuluma 2:14, Ewiade Fofolɛ Ngilebɛbo.

• Nyamenle ɛkpa Gyisɛse Kelaese kɛ ɔli ewiade ne azo tumi. Gyisɛse ɛnle kɛ ahenle mɔɔ nea ewiade ɛhye azo, mɔɔ ɔle angomedi nee atisesebɛ la. Nyamenle ɛbɔ Gyisɛse tumililɛ ne anwo ɛwɔkɛ kɛ: “Ɔbaze koahweabane nee ehyianli anwunvɔne . . . Ɔbalie bɛ yeavi nzisi nee basabasayɛlɛ nu.”​—Edwɛne 72:13, 14.

• Nyamenle ɛmbɔ adalɛ. Baebolo ne ka ye wienyi kɛ: “Nyamenle ɛngola ɛmbɔ adalɛ.” (Hibuluma 6:18) Saa Gyihova bɔ ɛwɔkɛ kɛ ɔbayɛ debie a, ɔle kɛ asɛɛ yeyɛ yewie la! (Ayezaya 55:10, 11) “Bɛbaye mɔɔ nea ewiade ɛhye azo la bɛavi ɛkɛ.”​—Dwɔn 12:31.