Adekpakyelɛnli Kile Duzu?

Edwɛkɛkpɔkɛ “adekpakyelɛnli” ta kile awie mɔɔ pɛ adenle maa awie mɔ di ɔ nzi na bɛkpondɛ azɛlɛsinli fofolɛ bɛyɛ nuhua gyima la. Ɛnee Gyisɛse le kɛ adekpakyelɛnli la, na ɛnee bɛzoa ye wɔ azɛlɛ ye azo kɛ ɔyɛ daselɛlilɛ gyima mɔɔ maa ngoane na ɔbuke ngoanelielɛ nwo adenle la. (Mateyu 20:28) Ɛnɛ, ye ɛdoavolɛma ɛlɛsukoa ye ɔlua mekɛ dɔɔnwo mɔɔ bɛlɛfa bɛaboa ‘bɛamaa menli arayɛ ɛdoavolɛma’ la azo. (Mateyu 28:19, 20) Bie mɔ ɛlɛyɛ adekpakyelɛ gyima ne.

Adekpakyelɛnli le dahuu edwɛkpakavolɛ. Gyihova Alasevolɛ kɔsɔɔti bɔ edwɛkpa ne nolo. Noko bie mɔ ɛyɛ ngyehyɛleɛ amaa bɛazonle kɛ dahuu adekpakyelɛma, na bɛfa dɔnehwele 70 bɛka edwɛkɛ ne siane biala. Amaa menli dɔɔnwo ahola ayɛ ɛhye la, bɛte mekɛ mɔɔ bɛfa bɛyɛ gyima la azo. Bɛkpa bie mɔ bɛmaa bɛsonle kɛ adekpakyelɛ titilima na bɛfa dɔnehwele 130 anzɛɛ mɔɔ bo zɔ la bɛyɛ daselɛlilɛ gyima ne siane biala wɔ ɛleka mɔɔ bɛhyia Belemgbunlililɛ nolobɔlɛma la. Bɛmkpondɛ ninyɛne mgbole wɔ ɛbɛlabɔlɛ nu, emomu bɛlɛ anwodozo kɛ Gyihova bamaa bɛ sa aha mɔɔ bɛhyia nwo la. (Mateyu 6:31-33; 1 Temɔte 6:6-8) Bɛdabɛ mɔɔ bɛnrɛhola dahuu adekpakyelɛ gyima ne bie yɛ la kola fa dɔnehwele 30 anzɛɛ 50 sonle kɛ adekpakyelɛ boavolɛma bɛfa bɛtɛlɛ bɛ ɛzonlenlɛ gyima ne anu siane biala.

Nyamenle nee menli nwo ɛlɔlɛ a ka adekpakyelɛnli a. Kɛ mɔɔ Gyisɛse yɛle la, yɛnwu kɛ menli dɔɔnwo lɛ sunsum nu ngyegyelɛ ɛnɛ. (Maake 6:34) Noko, yɛze debie mɔɔ bahola aboa bɛ yeamaa bɛanyia kenle bie anyelazo kpalɛ la. Menli nwo ɛlɔlɛ maa adekpakyelɛnli fa ye mekɛ nee ye anwosesebɛ boa awie mɔ ɔmaa bɛte edwɛkpa ne. (Mateyu 22:39; 1 Tɛsalonaekama 2:8) Ɔlua ɛhye ati, ye diedi yɛ kpole, ɔbikye Nyamenle na ɔ nye die kpalɛ.​—Gyima ne 20:35.

• Adekpakyelɛnli kile duzu?

• Duzu a maa bie mɔ yɛ dahuu adekpakyelɛma a?