Tile 13
Ekpunli Kpole Mɔɔ Gyi Gyihova Belemgbunli Ebia ne Anyunlu
1. (a) Kolaa na Nyamenle azonvolɛ mɔɔ dɛnlanle aze na Keleseɛnema mekɛ ye ara anzɛɛ 144,000 ne anyia bɛ ahatualɛ la, duzu a ɔwɔ kɛ to bɛ a? (b) Duzu a “menli pemgbenleamgbe” anzɛɛ ekpunli kpole ne mɔɔ wɔ ɛkɛ ne ɛnɛ la banyia a?
ƆVI Ebɛle mekɛ zo mɔɔ badwu Dwɔn Sɔnevolɛ ne mekɛ zo la, Nyamenle nɔhalɛ azonvolɛ vale Nyamenle ɛhulolɛdeɛ ɛyɛlɛ lumuale bɛ ɛbɛlabɔlɛ nu. Noko bɛ muala bɛwu na bɛlɛkendɛ kɛ bɛbadwazo bɛ bɛara ngoane nu wɔ Nyamenle ewiade fofolɛ ne anu wɔ azɛlɛ ye azo. Ɔwɔ kɛ 144,000 ne mɔɔ nee Kelaese bali tumi wɔ Nyamenle anwuma Belemgbunlililɛ ne anu la noko wu kolaa na bɛ sa aha bɛ ahatualɛ ne. Noko akee, Yekile 7:9 kile kɛ, “menli pemgbenleamgbe” anzɛɛ ekpunli kpole bie mɔɔ vi maanle kɔsɔɔti anu mɔɔ ɛnrɛwu na bɛlɛ anyelazo kɛ bɛbadɛnla azɛlɛ ye azo dahuu la noko bara awieleɛ mekɛ ye anu. Asoo ɛboka nwo?
Ekpunli Kpole ne Ɛnwunlɛ
2. Duzu a boale manle bɛnwunle menli pemgbenleamgbe mɔɔ bɛha bɛ nwo edwɛkɛ wɔ Yekile 7:9 la ɛ?
2 Wɔ ɛvolɛ 1923 ne anu, Gyihova azonvolɛ ranwunle kɛ “mboane ne” mɔɔ Gyisɛse hanle bɛ nwo edwɛkɛ wɔ ye ndonwo ne mɔɔ wɔ Mateyu 25:31-46 anu, yɛɛ mɔɔ ɔhanle bɛ nwo edwɛkɛ wɔ Dwɔn 10:16 kɛ “mboane ne mɔ bie” (mboane ɛhye mɔ le mboane gyɛne mɔɔ ɛnle tunli ne anu) la gyi ɛkɛ ne maa menli mɔɔ banyia adenle adɛnla azɛlɛ ye azo dahuu a. Wɔ ɛvolɛ 1931 ne anu bɛnwunle kɛ menli mɔɔ bɛha bɛ nwo edwɛkɛ wɔ Yizikeɛle 9:1-11 mɔɔ bɛyɛ bɛ nzonlɛ bɛ nwoma azo la noko lɛ anyelazo kɛ bɛbadɛnla azɛlɛ ye azo. Akee bɛnwunle ye ɛvolɛ 1935 ne anu kɛ menli pemgbenleamgbe ne le mboane gyɛne ne mɔɔ Gyisɛse hanle bɛ nwo edwɛkɛ la bie. Ɛnɛ menli ɛhye mɔ mɔɔ bɛlo bɛ la dodo ɛrayɛ mgbe mgbe.
3. Duzu ati a edwɛkɛ “bɛgyigyi Nyamenle belemgbunli ebia kpole ne” anyunlu ɛngile kɛ menli ɛhye wɔ anwuma ɛ?
3 Ekpunli kpole ne mɔɔ bɛha bɛ nwo edwɛkɛ wɔ Yekile 7:9 la ɛnle anwuma. Ɛhanlɛ mɔɔ bɛha kɛ “bɛgyigyi Nyamenle belemgbunli ebia kpole ne” anyunlu la ɛngile kɛ bɛwɔ anwuma. Ɔkile kɛ Nyamenle nwu bɛ. (Edwɛndolɛ 11:4) Saa yɛfa ekpunli kpole ne “mɔɔ awie ɛngola bɛ tia” mɔɔ bɛanga bɛ dodo la yɛto menli mɔɔ bɛha bɛ dodo wɔ Yekile 7:4-8 yɛɛ Yekile 14:1-4 la anwo a, ɔmaa yɛnwu kɛ ekpunli kpole ne ɛnle menli mɔɔ wɔ anwuma a. Bɛhile wɔ ɛkɛ ne kɛ menli mɔɔ bɛbava bɛ bɛavi azɛlɛ ye azo bɛahɔ anwuma la dodo le 144,000.
4. (a) Duzu a le “amaneɛnwunlɛ kpole ne” mɔɔ ekpunli kpole ne banyia bɛ ti wɔ nu la? (b) Kɛmɔ bɛhile ye wɔ Yekile 7:11, 12 la, nwane mɔ a nee ekpunli kpole ne bɔ nu sonle a?
4 Yekile 7:14 ka ye ekpunli kpole ne anwo kɛ: “Menli ɛhye mɔ a le bɛdabɛ mɔɔ bɛho bɛdɔ zolɛ wɔ amaneɛnwunlɛ kpole ne anu la.” Bɛbanyia bɛ ti wɔ anwongyelelɛ kpole ne mɔɔ bie ɛtɛsile ɛlɛ mɔɔ bara la anu. (Mateyu 24:21) Mekɛ mɔɔ bɛlɛda Nyamenle nee Kelaese mɔɔ liele bɛ ngoane ase la, abɔdeɛ mɔɔ wɔ anwuma mɔɔ di nɔhalɛ la amuala nee bɛ bɔ nu ka kɛ: “Amen! Ayɛlɛyelɛ, anyunlunyia, nrɛlɛbɛ, moyɛlɛ, enililɛ, tumi nee anwosesebɛ kɔsɔɔti le yɛ Nyamenle ne ɛdeɛ wɔ mekɛ mɔɔ ɛnlɛ awieleɛ! Amen.”—Yekile 7:11, 12.
Kɛzi Bɛda Ye Ali Kɛ Bɛfɛta Ngoane La
5. Kɛ yɛbayɛ na yɛanwu mɔɔ ɔwɔ kɛ yɛyɛ na yɛaraboka ekpunli kpole ne anwo ɛ?
5 Ekpunli kpole ne mɔɔ bɛbalie bɛ bɛavi anwongyelelɛ kpole ne anu la nee Gyihova tenlene ngyinlazo ne mɔ yia. Baebolo ne ka subane mɔɔ bamaa bɛanwu bɛdabɛ mɔɔ bɛbalie bɛ la anwo edwɛkɛ wienyi. Ɛhye ati, menli mɔɔ kulo tenleneyɛlɛ la bahola abɔ ɛbɛla mɔɔ bamaa bɛafɛta ngoanelielɛ la ɛnɛ. Duzu a ɔwɔ kɛ menli ɛhye mɔ yɛ a?
6. Duzu ati a saa yɛfa ekpunli kpole ne yɛto mboane nwo a ɔfɛta a?
6 Mboane le bɛtɛɛ na bɛbɛlɛ bɛ nwo aze. Yemɔti mekɛ mɔɔ Gyisɛse hanle kɛ ɔlɛ mboane gyɛne mɔɔ ɛmboka anwuma ekpunli ne anwo la, ɛnee ɔlɛkile menli mɔɔ bahulo kɛ bɛkɛdɛnla aze dahuu na eza bɛkɛbɛlɛ bɛ nwo aze bɛkɛdie ye ngilehilelɛ la. Ɔhanle kɛ: “Me mboane ne tie me ne; meze bɛ, yɛɛ bɛtoa me bo zo.” (Dwɔn 10:16, 27) Menli ɛhye mɔ tie Gyisɛse kpalɛ na bɛbɛlɛ bɛ nwo aze bɛyɛ mɔɔ Gyisɛse ka la, na ɔlua zo bɛrayɛ ye ɛdoavolɛ.
7. Subane boni mɔ a ɔwɔ kɛ Gyisɛse ɛdoavolɛma nyia a?
7 Subane boni bieko a ɔwɔ kɛ Gyisɛse ɛdoavolɛ ɛhye mɔ nyia a? Nyamenle Edwɛkɛ ne bua kɛ: “Bɛdu bɛ su dɛba ne mɔɔ manle bɛbɔle ɛbɛla mɔɔ bɛdabɛ bɛkulo . . . la bɛgua. . . . Bɛva bɛ su fofolɛ ne mɔɔ Nyamenle ɛbɔ ye kɛ ɔdaye ye ɛsaso na ɔkile ɔ nwo wɔ nɔhalɛ ɛbɛla mɔɔ tenrɛ . . . anu la bɛwula.” (Ɛfɛsɛsema 4:22-24) Bɛbɔ mɔdenle kɛ bɛbanyia subane mɔɔ boa maa Nyamenle azonvolɛ koyɛlɛ tɛnla ɛkɛ ne la—“ɛhulolɛ, anyelielɛ, anzonudwolɛ, abotane, atiakunlukɛnlɛmayɛlɛ, kpalɛyɛlɛ, nɔhalɛlilɛ, mɛlɛbɛnwoaze, yɛɛ bɛ nwo zo ɛhomolɛ.”—Galeehyeama 5:22, 23.
8. Duzu a ekpunli kpole ne yia ye wɔ mekɛ mɔɔ bɛlɛboa mɔhama ne la ɛ?
8 Ekpunli kpole ne boa ekpunli ekyi ne mɔɔ lɛ anwuma anyelazo na bɛdi edwɛkɛhanlɛ gyima ne anyunlu la. (Mateyu 24:14; 25:40) Mboane gyɛne ne boa bɛ, ɔnvane nwolɛ kɛ bɛze kɛ bɛbayia dwazotia ɔluakɛ wɔ awieleɛ mekɛ ɛhye mɔlebɛbo, Kelaese Gyisɛse nee ye anwumabɔvolɛ ne mɔ dule Seetan nee ye sunsum evinli ne mɔ vile anwuma. Ɛhye ɛva ngyegyelɛ ɛra azɛlɛ ye azo “ɔluakɛ Abɔnsam ɛdwu ɛra bɛ nwo lɔ, na ɛya kpole wɔ ye nuhua, ɔboalekɛ ɔze kɛ ye mekɛ ɛha ekyi bie ala.” (Yekile 12:7-12) Ɛhye ati, Seetan ɛmia ɛkpɔlɛ mɔɔ ɔfa ɔba Nyamenle azonvolɛ anwo zo wɔ mekɛ mɔɔ ngyehyɛleɛ ɛhye awieleɛ ne ɛlɛbikye la anu.
9. Kɛzi Nyamenle azonvolɛ ɛli konim wɔ edwɛkpa ne ɛhanlɛ nu ɛ, na duzu ati ɔ?
9 Ɔnvane nwolɛ kɛ bɛyia ɛkpɔlɛ kpole la edwɛkɛhanlɛ gyima ne ɛlɛnyia anyuhɔlɛ. Belemgbunlililɛ ne anwo nolobɔlɛma mɔɔ ɛnee le ekyi bie wɔ Ewiade Konle I awieleɛ la ɛrayɛ mgbe mgbe, ɔluakɛ Gyihova ɛbɔ ɛwɔkɛ kɛ: “Akodeɛ biala mɔɔ bɛyɛ bɛatia wɔ la ɛnrɛyɛ kpalɛ ɛlɛ.” (Ayezaya 54:17) Dwuuma kɔɔto kpole ne anu sonla ko bɔbɔ nwunle kɛ bɛnrɛhola bɛnrɛzi Nyamenle gyima adenle. Ɔhanle ɔhilele ɛvoya ne mɔ lumua la anu Falasiima wɔ ɛdoavolɛ ne mɔ anwo kɛ: “Bɛgyakyi bɛ, bɛmmayɛ bɛ ɛhwee. Na saa mɔɔ bɛlɛyɛ la le sonla ngyehyɛlɛ a ɔbazɛkye. Saa ɔvi Nyamenle noko a, yemɔ ɔyɛ se kɛ bɛkɛhola ye sɛkye, yɛɛ eza noko bɛannea boɛ a, bɛbaho bɛatia Nyamenle.”—Gyima ne 5:38, 39.
10. (a) Duzu a “nzonlɛ ne” mɔɔ bɛyɛ ekpunli kpole ne anu amra la kile a? (b) Duzu a Nyamenle menli yɛ fa kile kɛ bɛtie ɛnelɛ ne mɔ vi anwuma la ɛ?
10 Bɛpɛ ekpunli kpole ne anu amra anwo nvoninli kɛ menli mɔɔ bɛyɛ bɛ nzonlɛ bɛmaa ngoanelielɛ. (Yizikeɛle 9:4-6) “Nzonlɛ ne” le daselɛ mɔɔ kile kɛ bɛyila bɛ nwo zo bɛmaa Gyihova, bɛzɔne bɛ kɛ Gyisɛse ɛdoavolɛma, na bɛpele kɛ bɛkɛnyia Kelaese subane ne mɔ bie. Bɛtie ɛnelɛ ne mɔɔ vi anwuma mɔɔ ka ye wɔ Seetan ewiade amuala adalɛ ɛzonlenlɛ maanle ne anwo kɛ: “Bɛvinde, me menli, bɛvi zolɛ bɛye bɛ nwo, anrɛɛ bɛkɛyɛ ye ɛtane ne bie, bɛkɛmaa ye munzule ne bie kɛha bɛ.”—Yekile 18:1-5.
11. Adenle mɔɔ nwolɛ hyia la boni a ekpunli kpole ne dua zo kile kɛ bɛle Gyihova azonvolɛ a?
11 Bieko, Gyisɛse hanle hilele ye ɛdoavolɛma ne kɛ: “Saa bɛkulo bɛ nwo ngoko ngoko a yɛɛ awie biala kɛnwu kɛ bɛle me ɛdoavolɛma a.” (Dwɔn 13:35) Mɔɔ nee ɛhye ɛnle ko la, ɛzonlenlɛ ngakyile mɔɔ wɔ ewiade la anu amra kuhu bɛ nwo wɔ konle nu, ɔluakɛ bɛnvi maanle ko anu la ati! Nyamenle Edwɛkɛ ne se: “Ngakyile mɔɔ wɔ bɛdabɛ mɔɔ bɛle Nyamenle amra nee bɛdabɛ mɔɔ bɛle Abɔnsam amra la avinli la ɛne: awie biala mɔɔ ɛmbɔ ɛbɛla kpalɛ anzɛɛ ɛngulo ɔ diema la ɛnle Nyamenle ara. . . . Ɔwɔ kɛ yɛkulo yɛ nwo ngoko ngoko. Ɔnle kɛ yɛyɛ kɛ Keen mɔɔ le Abɔnsam ara, mɔɔ hunle ɔ diema ne la.”—1 Dwɔn 3:10-12.
12. Duzu a Gyihova bayɛ ɛzonlenlɛ nu ‘mbaka’ mɔɔ so ma ɛtane la wɔ anwongyelelɛ kpole ne anu a?
12 Gyisɛse hanle kɛ: “Baka kpalɛ biala so ma kpalɛ, yɛɛ baka ɛtane so ma ɛtane. Baka kpalɛ ɛnzo ma ɛtane, yɛɛ baka ɛtane ɛnzo ma kpalɛ. Baka biala mɔɔ ɛnzo ma kpalɛ la bɛpɛ ye bɛto na bɛfa bɛwuda senle. Zɔhane ala yɛɛ bɛbalua Nyamenle [Ngapezoma] alanema nyɛleɛ zo bɛanwu bɛ a.” (Mateyu 7:17-20) Ma mɔɔ ewiade ɛhye anu ɛzonlenlɛ ngakyile ne mɔ so la da ye ali kɛ bɛle ‘mbaka’ ɛtane, mɔɔ ɔnrɛhyɛ Gyihova bazɛkye bɛ wɔ anwongyelelɛ kpole ne anu a.—Yekile 17:16.
13. Kɛ ekpunli kpole ne si kile kɛ “bɛgyigyi [Gyihova] belemgbunli ebia kpole ne” anyunlu wɔ koyɛlɛ nu ɛ?
13 Yekile 7:9-15 twe adwenle kɔ ninyɛne mɔɔ ekpunli kpole ne yɛ a bɛbanyia ngoane la azo. Bɛhile kɛ “bɛgyigyi [Gyihova] belemgbunli ebia kpole ne” anyunlu, na bɛdi bɛboa ye maanzaleɛ tumililɛ ne. Bɛkpo bɛ “adɛladeɛ ne mɔ nwohyee wɔ Boaneralɛ ne mogya ne anu,” mɔɔ kile kɛ bɛdie Gyisɛse ɛtane nwo mgbɔdalɛ afɔlebɔlɛ ne bɛto nu. (Dwɔn 1:29) Bɛyila bɛ nwo zo bɛmaa Nyamenle yɛɛ bɛva nzule nu ɛzɔnenlɛ bɛyɛ ɛhye anwo sɛkɛlɛneɛ. Yemɔti, bɛlɛ gyinlabelɛ kpalɛ wɔ Nyamenle anyunlu, kɛmɔ adɛladeɛ nwohyee ne le nwolɛ nvoninli la, na “bɛsonle ye alehyenlɛ nee aledwolɛ.” Ɛbahola wɔayɛ nzenzaleɛ amaa wɔ ɛbɛlabɔlɛ nee mɔɔ bɛha nwolɛ edwɛkɛ wɔ ɛke la ayɛ ko ɔ?
Nyilalɛ Mɔɔ Bɛnyia Ye Ɛnɛ
14. Nyilalɛ boni a Gyihova azonvolɛ nyia ye ɛnɛ a?
14 Kpolerazulɛ biala ɛnle nwolɛ kɛ wɔyɛ nyilalɛ mɔɔ Gyihova azonvolɛ nyia ye ɛnɛ la nzonlɛ. Kɛ neazo la, mekɛ mɔɔ ɛzukoale Gyihova tenlene atiakunlukpɔkɛ ne mɔ anwo debie la, ɛradele ɔ bo kɛ anyelazo kpalɛ bie wɔ ɛkɛ ne kenlebie. Ɔti kɛkala wɔ ɛbɛlabɔlɛ gyi atiakunlukpɔkɛ kpalɛ zo—ɛlɛsonle nɔhalɛ Nyamenle ne na ɛlɛ anyelazo kɛ ɛbava anyelielɛ wɔadɛnla aze dahuu wɔ paladaese azɛlɛ zo. Ɛhɛe, Belemgbunli Gyisɛse Kelaese bayɛ ekpunli kpole ne “tataa yeahɔ nzubula mɔɔ maa ngoane la anwo.”—Yekile 7:17.
15. Ɔluakɛ Gyihova Alasevolɛ fa Baebolo ngyinlazo mɔɔ fane maanyɛlɛ nee ɛbɛlabɔlɛ nwo di gyima la ati, duzu nyilalɛ a bɛlɛ a?
15 Nyilalɛ kɛnlɛma mɔɔ ekpunli kpole ne lɛ la a le ɛlɔlɛ, koyɛlɛ, nee ngamɔnu mɔɔ wɔ Gyihova azonvolɛ mɔɔ wɔ azɛlɛ muleɛ nna ye azo avinli la. Kɛmɔ yɛ muala yɛnyia sunsum nu aleɛ ko ne ala la ati, yɛ muala yɛdi mɛla nee ngyinlazo ko ne ala mɔɔ wɔ Nyamenle Edwɛkɛ ne anu la azo. Ɛhye ati a maanyɛlɛ anzɛɛ maanle nwo ɛhulolɛ ɛngola ɛmkpakyekpakye yɛ nu a. Eza yɛdi Nyamenle ɛbɛlabɔlɛ nwo ngyinlazo mɔɔ kpogya la azo. (1 Kɔlentema 6:9-11) Yemɔti, kɛ anrɛɛ yɛbava yɛ nwo yɛawula konle konle, mgbakyemgbakyenu nee ɛbɛlatane mɔɔ ɛbu zo wɔ ewiade ye, anu la, Gyihova menli de sunsum nu paladaese nu. Yɛ kɛzi Ayezaya 65:13, 14 ka ɛhye anwo edwɛkɛ la nzonlɛ.
16. Ɔnvane nwolɛ ngyegyelɛ mɔɔ wɔ ewiade ye la, duzu anyelazo a ekpunli kpole ne lɛ a?
16 Gyihova azonvolɛ ɛnli munli. Bɛyia ewiade ɛhye anu ngyegyelɛ mɔɔ le kɛ asetɛnla mɔɔ anu yɛ se yɛɛ esiane mɔɔ vi maanle maanle ne mɔ konle konle nu ba la bie. Bɛ nwo to bɛ, bɛnwu amaneɛ, yɛɛ bɛwu. Noko bɛlɛ diedi kɛ wɔ ewiade fofolɛ ne anu, Nyamenle bakyikyi “bɛ nye anwo monle. Ewule ɛnle ɛkɛ bieko, monle ɛnle ɛkɛ, nyane ɛnle ɛkɛ, ɛzunlɛ ɛnle ɛkɛ ne bieko.”—Yekile 21:4.
17. Ɔnvane nwolɛ debie biala mɔɔ bado yɛ ɛnɛ la, anyelielɛ boni a menli mɔɔ sonle nɔhalɛ Nyamenle ne la banyia ye kenlebie a?
17 Saa kpanyinliyɛlɛ, anwodolɛ, esiane anzɛɛ ɛkpɔlɛ ti wɔ ngoane fi ɛ sa ɛnɛ bɔbɔ a, Gyihova badwazo wɔ ara ngoane nu wɔ Paladaese. (Gyima ne 24:15) Akee ɛbahɔ zo wɔanyia sunsum nu aleɛ wɔ Kelaese Ɛvolɛ Apenle Tumililɛ ne anu. Ɛlɔlɛ mɔɔ ɛlɛ ɛmaa Nyamenle la barayɛ kpole wɔ mekɛ mɔɔ ɛbanwu kɛ ye atiakunlukpɔkɛ ne mɔ ɛlɛba nu wɔ anyunlunyia nu la. Na akee nwonane nu nyilalɛ mɔɔ Gyihova bava amaa la bamaa ɛlɔlɛ mɔɔ ɛlɛ ɛmaa ye la arayɛ kpole kpalɛ. (Ayezaya 25:6-9) Nea anyelielɛ mɔɔ Nyamenle menli banyia ye kenlebie a!
Suzu nwo Fa Ti Nu
• Edwɛkɛ kpole mɔɔ bazi la boni a Baebolo ne fa ekpunli kpole ne beta nwo a?
• Saa amgba yɛkulo kɛ yɛboka ekpunli kpole ne mɔɔ Nyamenle ɛlo bɛ la anwo a, duzu a ɔwɔ kɛ yɛyɛ ye ɛnɛ a?
• Kɛ nyilalɛ mɔɔ ekpunli kpole ne lɛ ye ɛnɛ nee mɔɔ bɛbanyia ye wɔ Nyamenle ewiade fofolɛ ne anu la anwo si hyia wɔ ɛ?
[Nvoninli wɔ mukelɛ 123]
Ekpunli kpole ne anu menli mgbe mgbe fa koyɛlɛ sonle nɔhalɛ Nyamenle ne