Anyelazo—Asoo Ɔnyia Yɛ Ɛbɛlabɔlɛ Zo Tumi Amgba?
ƐNEE Daniel ɛnyia ɛvolɛ bulu ala, ɔnyianle kansa wɔ mekɛ mɔɔ ɛnee yeli ɛvolɛ ngɔnla la. Ye dɔketama nee ɔ gɔnwo mɔ anyelazo wiele. Noko ɛnee Daniel lɛ anyelazo. Ɛnee ɔdie ɔdi kɛ kenle bie dedee ɔbayɛ kpanyinli na yeaboa yeamaa bɛakpondɛ kansa nwo ayile. Mɔɔ ɔdele kɛ dɔketa mɔɔ yɛ ye kansa ne bie ayile barakpɔla ye la, ye anyelazo ne yɛle kpole. Mɔɔ kenle ne dwule kɛ dɔketa ne bara la, ɔluakɛ ɛnee maanle nu tɛnlabelɛ ɛnle kpalɛ la ati, yeangola yeamba. Daniel asa nu dole. Ɛnee mekɛ mɔɔ limoa mɔɔ Daniel asa nu ɛdo la ɛne. Ye kenle nwiɔ anzi, ɔwule.
Dɔketanli bie mɔɔ zukoale kɛzi anyelazo nee bɛsanudolɛ ka yɛ kpɔkɛdelɛ la a hanle Daniel edwɛkɛ ne a. Bie a wɔde edwɛkɛ ko ne ala bie. Kɛ neazo la, awie mɔɔ anye ɛvi na asɛɛ yewu yewie la anye bahola ala ye kulovolɛ bie ɛkpɔlalɛ anzɛɛ ɛvoya bie ade. Noko saa mɔɔ ɔ nye la zo la ba nu a, ɔngyɛ na yeawu. Duzu a maa ɛhye yɛ zɔ a? Asoo anyelazo a maa ɛhye yɛ boɛ, kɛ mɔɔ bie mɔ die di la ɔ?
Nwomama dɔɔnwo suzu kɛ anwodozo, anyelazo yɛɛ adwenle kpalɛ mɔɔ awie banyia la kola nyia ye ɛbɛlabɔlɛ nee ye kpɔkɛdelɛ zo tumi kpole. Noko tɛ awie biala a die ɛhye to nu a. Nwomama bie mɔ ka kɛ edwɛkɛ ɛhye mɔ amuala le nwɔra. Bɛdie bɛdi kɛ kpɔkɛdelɛ ɛnvale anyelazo nwo.
Nɔhalɛ nu, ɔvi tete ne amuala menli lɛ adwenle ngakyile wɔ kɛzi anyelazo nwo hyia la anwo. Wɔ ɛvolɛ apenle dɔɔnwo mɔɔ ɛze ɛhɔ la, bɛbizale Giliki nwomanli Aristotle mɔɔ anyelazo kile la, na ɔhanle kɛ: “Ɔle ɛlalɛ mɔɔ awie ka wɔ mekɛ mɔɔ ɔ nye gyi zo la.” Ɔtɛkyɛle dɔɔnwo biala, America maanyɛlɛnli Benjamin Franklin hanle ye ɛya zo kɛ: “Awie mɔɔ fa ɔ nwo to anyelazo zo la bawu.”
Nɔhalɛ mɔɔ fale anyelazo nwo la a le boni? Asoo ɔle adwenle nu nzuzulɛ ala; adenle mɔɔ menli dua zo kpondɛ arɛlekyekyelɛ mɔɔ ɛmba nu la ɔ? Anzɛɛ ndelebɛbo kpalɛ bie wɔ ɛkɛ mɔɔ ɔti ɔwɔ kɛ yɛbu anyelazo kɛ debie mɔɔ yɛhyia nwo amaa yɛanyia kpɔkɛdelɛ kpalɛ na yɛ nye alie—debie mɔɔ wɔ ɛkɛ mɔɔ yɛbanyia zolɛ nvasoɛ la ɔ?