Ɛsɔfo Ne Nyianle Ye Ngyegyelɛ Ne Anwo Mualɛ

Kenle ko bie mɔɔ Gyihova Dasevolɛ raalɛ bie mɔɔ bɛfɛlɛ ye Eliso la hɔle raalɛ bie sua nu ɛkɛ ne na ɔ nee ye ɛlɛsukoa Baebolo ne la, raalɛ ne nyianle nyɛvolɛ arɛlevilɛ nu. Ɛsɔfo bie nee ɔ ye a rale ɛkɛ a. Ɛnee Eliso ɛde kɛ agyalɛma ɛhye ara nrenyia kokye ne ɛwu kenlensa ye ala.

Mɔɔ Eliso yɛle bɛ gyakɔ wɔ bɛ ra ne ewule ne anwo wiele la, ɛsɔfo ne nee ɔ ye bɔle ɔ bo kɛ bɛsu. Akee ɛsɔfo ne vale ɛya hanle kɛ: “Mennwu deɛmɔti Nyamenle maanle sɔnea ɛhye dole me a! Duzu ati a ɔvale me ra kokye ne ɔhɔle a? Mezonle Nyamenle ɛvolɛ 28, meyɛ ninyɛne mgbalɛ dɔɔnwo, noko mɔɔ yeva yedua me kakɛ la ɛne! Duzu ati a Nyamenle hunle me ra ne a?”

Eliso hilehilele nu hilele agyalɛma ne kɛ tɛ Nyamenle a vale bɛ ra ne hɔle a. Eza ɔ nee bɛ zuzule ɛkpɔnedeɛ ne, ewudwazo ne nee deɛmɔti Nyamenle maa adenle maa ninyɛndane sisi la anwo. Ɛsɔfo ne nee ɔ ye hanle hilele Eliso kɛ yemaa bɛ sa ɛha mualɛ mɔɔ bɛlɛyɛ nwolɛ asɔne la.

Ye dapɛne bieko, ɛsɔfo ne nee ɔ ye ziale rale raalɛ ne sua nu ɛkɛ amaa bɛazukoa mɔɔ ɔlɛsukoa la bie. Ɛnee Eliso nee raalɛ ne ɛlɛsukoa edwɛkɛtile ne mɔɔ se “Anyelazo Kpalɛ wɔ Ɛkɛ Maa Wɔ Alɔvolɛ Mɔɔ Ɛwu” mɔɔ wɔ Duzu A Baebolo Ne Kilehile Amgba A? buluku ne anu la. Agyalɛma ne vale bɛ nwo wulale debiezukoalɛ ne anu kpalɛ.

Bɛ mu nwiɔ bɛhɔle Gyihova Alasevolɛ nyianu titili ne mɔɔ bɛyɛle ye wɔ Tbilisi, Georgia la bie. Ɛlɔlɛ nee koyɛlɛ mɔɔ bɛnwunle ye la hanle bɛ ahonle kpalɛ​—subane ɛhye mɔ a ɛnee bɛlɛbɔ mɔdenle kɛ bɛmaa bɛ asɔnema ne ala ye ali a, noko yeanyɛ boɛ.