Kpolisima Hɔzɔhonle Joseph

Saa ɛle Gyihova Dasevolɛ a, pɛ ye nvoninli kɛ kpolisima li ɛ nzi wɔ mekɛ mɔɔ ɛlɛyɛ azua nu daselɛlilɛ la. Anwubielɛ ɛhye a Joseph mɔɔ vi Micronesia la nyianle ye wɔ 2017 a. Ɔ nee Alasevolɛ nsa bie vale bɛ nwo wulale nolobɔlɛ titili bie mɔɔ bɛyɛle ye wɔ mbɔra bie mɔɔ wɔ moa la azo la anu.

Alasevolɛ nna ne dwule bɔra ekyi bie mɔɔ zolɛ menli bayɛ kɛyɛ 600 la azo wɔ ewiazo. Mɔɔ Alasevolɛ ne mɔ dwule bɔra ne azo la, ɛkɛ ne kpanyinli ko yɛle bɛ akoaba. Joseph kilehile mɔɔ zile la anu kɛ: “Kpanyinli ne hanle kɛ, kpolisima kale ne bahola ava yɛ ahɔ awuke biala anu. Ɔzinle yɛ nwo, noko yɛvile ɛbulɛ nu yɛkpole nwolɛ adenle zɔhane. Ɛnee yɛkulo kɛ yɛtia yɛkɔ menli ne azua nu kɛ mɔɔ yɛyɛ ye dɛba la.”

Akee nolobɔlɛma ne bɔle ɔ bo na bɛvale bɛziele bɛ nye zo kɛ bɛka edwɛkɛ ne bahile menli dodo biala mɔɔ bɛbahola la. Alasevolɛ ne mɔ ka kɛ: “Menli mɔɔ wɔ ɛkɛ ne la lale atiakunlukɛnlɛma ali hilele yɛ na ɛnee bɛ nye die yɛ edwɛkɛ ne anwo. Yemɔti, ɛnee saa yɛkɔ awuke bie anu a, yɛkyɛ ɛkɛ ne yɛtɛla kɛzi yɛsuzu la.”

Nzinlii, kpolisima kale zenle Joseph anwo fane nwiɔ, na mɔɔ tɔ zo nsa la, bɛ kale ne gyinlanle. Kpolisima ne bizale Joseph saa bɛbahola bɛava ye badɛnla kale ne anu bɛahɔ awuke mɔɔ ɛha la anu a. Joseph hanle kɛ: “Kyɛkyɛ, noko bɛzile zo kɛ, ‘Ɔka ekyi bɛfi bɔra ye azo, yemɔti maa yɛva wɔ yɛhɔ awuke mɔɔ ɛha la anu.’ Menliele mendole nu ɔluakɛ ɛnee azua ekyi tɛbɔ ɛkɛ ne mɔɔ metɛkɔle nu a. Ɛnee saa yɛlɛbikye awuke bie a, kpolisima ne bɔ abusua ne duma. Bɛhanle kɛ, saa yɛkɔ awuke bie anu na mebɔ anlenkɛ ne anu na awie ambuke a, bɛbabɔ bɛ kale aweɛne ne bamaa suamenle ne avinde.

“Ɔlua moalɛ zɔhane azo, yɛholale yɛhɔle awuke biala anu wɔ kenle zɔhane. Yɛmaanle mbuluku ekyi na yɛ nee menli mɔɔ anye liele nwo la yɛle sia kɔkpɔla nwo ngyehyɛleɛ.”

Kpolisima ne zele Joseph kɛ, “bɛ nye ɛlie kɛ bɛmaa menli ɛde edwɛkpa la.” Mɔɔ aleɛ ɛlɛdwo na Alasevolɛ ne mɔ ɛlɛkɔ la, sua ne azo mgbanyima mɔɔ wɔ ɛnwea ne azo la vale anyelielɛ yɛle Alasevolɛ ne mɔ bae bae wɔ mekɛ mɔɔ bɛlɛ bɛ mbuluku ne mɔ wɔ bɛ sa nu la.