Baebolo Ɛgengalɛ Ngyehyɛleɛ

Nrɛlɛbɛ mɔɔ tɛla biala mɔɔ maa bɛnyia asetɛnla kpalɛ la a wɔ Baebolo ne anu a. Saa ɛta ɛkenga na ɛdwenledwenle nwolɛ na ɛfa mɔɔ ɛsukoa la ɛbɔ wɔ ɛbɛla a, ɔbamaa wɔ “ɛbɛlabɔlɛ ne adenrɛ.” (Dwɔhyua 1:8; Edwɛne 1:1-3) Eza ɛbanwu Nyamenle nee ɔ Ra, Gyisɛse, na ɛhye bamaa wɔanyia dahuu ngoane.​Dwɔn 17:3.

Saa ɛkulo kɛ ɛkenga Baebolo ne a nienwu a ɔwɔ kɛ ɛbɔ ɔ bo ɛfi a? Ɔgyi ɛ nwo zo. Baebolo ɛgengalɛ ngyehyɛleɛ ɛhye baboa wɔ yeamaa wɔagenga mbuluku ne mɔ kɛ mɔɔ bɛfinde Baebolo ne anu la anzɛɛ ɛbagenga bɛ ekpunli ekpunli. Kɛ neazo la, ɛbahola wɔagenga nuhua ne mɔɔ ka kɛzi Nyamenle nee tete Yizilayɛma lile la. Ɛkulo noko a, ɛbahola wɔagenga nuhua ne mɔɔ ka kɛzi alimoa Kilisienema asafo ne bɔle ɔ bo na ɔdɛlɛle la. Saa ɛkola ɛkenga tile bie mɔ alehyenlɛ biala a, ɔkadwu ɛvolɛ ko la ɛnee wɔwie Baebolo ne kenga.

Saa ɛkpondɛ ngyehyɛleɛ mɔɔ ɛbava wɔagenga Baebolo ne alehyenlɛ biala, anzɛɛ ɛkulo kɛ ɛkenga Baebolo ne wɔ ɛvolɛ ko anu, anzɛɛ bɔ zo mɔɔ ɛlɛbɔ ɔ bo wɔagenga Baebolo ne a, ngyehyɛleɛ ɛhye baboa wɔ. Twe Baebolo ɛgengalɛ ngyehyɛleɛ ɛhye mɔɔ bɛkola bɛpelente la bie, na bɔ ɔ bo ɛnɛ.