Yɛzile Kpɔkɛ Kɛ Yɛbatete Ninyɛne Zo Wɔ Yɛ Ɛbɛlabɔlɛ Nu

Ɛnee Madián nee Marcela anwo tɔ bɛ wɔ ɛleka mɔɔ bɛde wɔ Medellín mɔɔ wɔ Colombia la. Ɛnee bɛtua Madián kakɛ kpalɛ la ati ɛnee bɛde sua kɛnlɛma bie anu. Noko kɛmɔ bɛle Gyihova Nyamenle azonvolɛ la ati, edwɛkɛ bie hanle bɛ maanle bɛzuzule ninyɛne mɔɔ ɔwɔ kɛ bɛmaa nwolɛ kyia bɛ kpalɛ la anwo. Bɛhilehilele nuhua kɛ: “Wɔ 2006, yɛhɔle kenle ko nyianu titili ne mɔɔ ɔ ti ne se ‘Keep Your Eye Simple’ la bie. Na ɛdendɛlɛ mɔɔ bɛmaanle la anu dɔɔnwo maanle yɛ anwosesebɛ kɛ yɛtete ninyɛne zo amaa yɛahola yɛava mekɛ dɔɔnwo yɛazonle Nyamenle. Mɔɔ bɛkpɔnenle nyianu ne la, yɛnwunle kɛ tɛ mɔɔ bɛhanle la a yɛlɛyɛ a. Ɛnee yɛkulo ninyɛne dɔɔnwo ɛtotɔlɛ ɔti ɛnee yɛtua kakɛ kpole.”

Ɛdendɛlɛ mɔɔ Madián nee Marcela dele ye wɔ nyianu ne abo la hanle bɛ maanle bɛbɔle ɔ bo kɛ bɛtete ninyɛne zo. Bɛka kɛ, “Yɛbɔle ɔ bo kɛ yɛte ninyɛne mɔɔ bɔ yɛ kakɛ la azo. Yɛdule yɛhɔle sua ekyi bie anu, yɛdɔnenle yɛ kale ne na yɛdɔle moto.” Bieko, bɛgyakyile kɛ bɛbahɔ sotɔɔ mgbole nu amaa bɛantotɔ ninyɛne dɔɔnwo. Bɛbɔle ɔ bo bɛvale mekɛ dɔɔnwo bɛhanle Baebolo ne anu edwɛkɛ bɛhilele awie mɔ. Eza bɛvale adekpakyelɛ titilima mɔɔ bɛlɛbɔ mɔdenle bɛazonle Gyihova la agɔnwolɛ kyengye.a

Yeangyɛ, Madián nee Marcela zile kpɔkɛ kɛ bɛbahɔ asafo ekyi bie mɔɔ wɔ moa mɔɔ hyia moalɛ la ɛkɛ amaa bɛahola bɛadɛlɛ bɛ ɛzonlenlɛ gyima ne anu. Amaa bɛahola bɛahɔ la, Madián gyakyile ye gyima ne. Raalɛ ne mɔɔ nea ye gyima ne azo la ande deɛmɔti ɔgyakyile gyima ne la abo. Ɔti Madián bizale ye kɛ: “Ɛdie ezukoa dɔɔnwo noko asoo ɛ nye die ɔ?” Raalɛ ne hanle kɛ ɔ nye ɛnlie ɔluakɛ ɔlɛ ngyegyelɛ dɔɔnwo mɔɔ ɔngola ɔnli nwolɛ gyima a. Akee ɔzele raalɛ ne kɛ: “Ɔti tɛ ezukoa dɔɔnwo mɔɔ awie nyia la a hyia a. Emomu debie mɔɔ maa ɔ nye die kpalɛ la a hyia a. Nyamenle anwo debie mɔɔ yɛkilehile awie mɔ la maa me nee me ye anye die, na yɛkulo kɛ yɛfa mekɛ dɔɔnwo yɛyɛ gyima ɛhye amaa yɛ nye alie kpole.”

Sunsum bodane mɔɔ Madián nee Marcela vale ziele bɛ nye zo la ɛmaa bɛnyia ahunlundwolɛ nee anyelielɛ. Bɛvale ɛvolɛ 13 bɛzonlenle wɔ asafo mɔɔ bɛhyia moalɛ mɔɔ bɛwɔ Colombia sɔlɔ adɔleɛ la anu. Na kɛkala bɛnyia nwolɛ adenle bɛlɛsonle kɛ adekpakyelɛ titilima.