Sukoa Nyamenlezulolɛ Fi Obadaya Ɛkɛ

Ɛnee Obadaya a nea Belemgbunli Ehabe amumuyɛ mɔɔ ɔmaanle Beeyale ɛzonlenlɛ mɔɔ ɛkpɔlɔ la dɛlɛle wɔ Yizilayɛ la awuke ne azo a. Noko Obadaya zukoale kɛ ɔbazulo Gyihova “ɔvi ye ngakula nu.” (1 Arl. 18:​1-13) Ɔti mɔɔ Ɔbahyema Gyɛzɛbɛle hanle kɛ bɛhu Gyihova ngapezoma ne mɔ amuala la, Obadaya nwunle kɛ ɔwɔ kɛ ɔfa akɛnrasesebɛ ɔyɛ nwolɛ debie amaa bɛangu bɛ. Saa ɛfa ngapezonli ko bɔbɔ wɔavea a, ɔ nzi yɛ ɛzulolɛ; noko Obadaya vale ngapezoma 100 veale na ɔmaanle bɛ aleɛ wɔ mekɛ mɔɔ ɛhɔne kpole bie rale la! Ɛnee ɔwɔ kɛ ɔfa menli ɛhye mɔ ɔfea mɔɔ adalɛ ngapezoma dɔɔnwo ne mɔɔ bɛvea belemgbunli ne nee ɔbahyema ne abo la ɛnrɛnwu bɛ a. Ɛnea a kɛzi tɛnlabelɛ ne bayɛ ɛ?—1 Arl. 18:19.

Duzu a yɛbahola yɛazukoa yɛavi nrenyia ɛhye mɔɔ sulo Nyamenle la ɛkɛ a? Ɛnee Obadaya sulo Ehabe ɛdeɛ, noko ɛnee ɔsulo Gyihova kpole kpalɛ ɔtɛla Ehabe. Ɛhye maanle ɔnyianle akɛnrasesebɛ ɔvale ye ngoane ɔdole esiane nu ɔbɔle ɔ mediema ne mɔ anwo bane. Saa bɛfa bɛ sa bɛto nɔhalɛ ɛzonlenlɛ zo wɔ ɛleka mɔɔ yɛwɔ la a, yɛdayɛ noko yɛbahola yɛazukoa kɛ yɛbazulo Gyihova. Ɛzulolɛ ɛhye bamaa yɛanyia anwosesebɛ yɛaboa yɛ mediema mɔɔ bɛlɛyia sɔnea la.