Hulda Dwule Ye Bodane Nwo

SAA ɛhɔle bɔra ekyi bie mɔɔ bɛfɛlɛ ye Sangir Besar mɔɔ wɔ Indonesia la azo wɔ ɛvolɛ bie mɔ mɔɔ ɛpɛ nu la anu a, anrɛɛ ɛbanwu Kilisiene mraalɛ nsa bie wɔ nyevile ne anloa. Ɔlua bɛ daselɛlilɛ gyima ne ati, ɛnee bɛze bɛ kpalɛ wɔ bɔra ne azo—bɛboa awie mɔ bɛmaa bɛte Baebolo ne abo. Noko mekɛ zɔhane wɔ nyevile ne anloa, ɛnee bɛlɛyɛ debie mɔɔ le ngakyile bɔkɔɔ la.

Mɔɔ limoa, bɛluoluale nyevile ne anu bɛkpondɛle awolɛ mgbole na bɛzoale bɛhɔle ɛnwea ne anloa. Bie mɔ mgbole le kɛ bɔlo la. Akee bɛdɛnlɛdɛnlanle egyaade mbia zo bɛvale hamenle bɛkpakyekpakyele awolɛ ne mɔ anu ngyikyi ngyikyi maanle bɛ mgbole yɛle kɛ asɛɛ akɔlɛ aholonvia. Bɛwiele la, bɛvale wolɔba bokiti bɛvulale na bɛzoale bɛvole kpolike bɛhɔle ɛleka mɔɔ bɛde la. Kɛmɔ bɛfa awolɛ ne bɛyɛ kale adenle la ati, bɛvale bɛguale ahodoku mgbole mɔɔ bɛbahola bɛava bɛagua kale nu la anu.

Mediema mraalɛ ɛhye mɔ anu ko a le Hulda. Ɔlua ye tɛnlabelɛ ne ati, ɛnee ɔfa mekɛ dɔɔnwo ɔyɛ gyima ɔtɛla menli mɔɔ ɛha la. Ɛnee ɔfa ezukoa mɔɔ ɔnyia la amuala ɔnea ye abusua ne. Noko bodane bieko mɔɔ ɛnee gyi ɔ nye zo kɛkala la ati a ɔyɛle gyima zɔhane a. Ɛnee ɔkulo kɛ ɔtɔ tabelɛte amaa yeahola yeava JW Library^® app ne yeali gyima. Ɛnee Hulda ze kɛ vidio ne mɔ nee ninyɛne gyɛne mɔɔ wɔ zo la baboa wɔ daselɛlilɛ nu yɛɛ bɛbamaa yeade Baebolo ne abo kpalɛ.

Hulda kpakyele awolɛ dɔnehwele nwiɔ nwonlomɔ biala bokale mɔɔ ɔyɛ ye dɛba la anwo too siane ko nee foa, na ɛnee ɔnyia awolɛ mɔɔ ɛfa ɛgua pick up nzi a ɔbayi la. Akee ɔnyianle ezukoa ɔdɔle tabelɛte ne.

Ɔhanle kɛ: “Ɛnee mefɛ kpalɛ yɛɛ awolɛ ne mɔɔ mekpakye la pepɛ me, noko mɔɔ menyianle tabelɛte ne mɔɔ ɛnee ɔboa me wɔ daselɛlilɛ nu na ɔmaa mekola mesiezie me nwo ndɛndɛ memaa debiezukoalɛ ne mɔ la, me rɛle vile me nyane ne amuala.” Eza ɔhanle kɛ, kɛmɔ ɛnee yɛyɛ debiezukoalɛ ne mɔ wɔ fonu nee yintanɛte zo wɔ ewulenzane mekɛ ne anu la ati, tabelɛte ne boale ye. Ɔyɛ yɛ fɛ kɛ Hulda dwule ye bodane ne anwo la.