Asoo Ɛze?
Duzu ati a ɔle kpalɛ kɛ Gyihova maanle Yizilayɛma vale abubule nee mɔlɔnoma bɔle afɔle a?
WƆ MƐLA ne anu, ɛnee Gyihova die abubule nee mɔlɔnoma mɔɔ bɛfa bɛbɔ afɔle bɛmaa ye la to nu. Wɔ mɛla ne mɔ anu, saa bɛfa nloma bɛabɔ afɔle a, bɛmbɔ nloma nwiɔ ɛhye mɔ ko duma bɛngyakyi ko ɛlɛ, na ɔyɛ a bɛfa ko bɛsie ko agyakɛ anu. (Lɛv. 1:14; 12:8; 14:30) Duzu ati a ɛnee ɛhye boa a? Debie ko a le kɛ ɛnee bɛnda bɛnnyia abubule. Duzu ati ɔ?
Abubule
Abubule kpɔsa kpalɛ na saa ɔdwu mekɛ mɔɔ maanle nu le wuluwulu ekyi la a, yɛɛ ɛnwu bɛ wɔ Yizilayɛ amuala a. Wɔ October biala, bɛtu bɛkɔ nyiakɛ maanle ne mɔ mɔɔ nuhua le wuluwulu ekyi la anu na ɔdwu nyenyensuo mekɛ a bɛazia bɛara Yizilayɛ. (Sɔl. 2:11, 12; Gyɛ. 8:7) Ɔti ɛnee saa ɔdwu fɔsɛlɛ mekɛ wɔ tete Yizilayɛ a, ɔyɛ se kɛ bɛbanyia abubule bɛava bɛabɔ afɔle.
Awoka zo mɔlɔnoma
Noko mɔlɔnoma ɛnda ɛmkpɔsa, ɔti mekɛ biala bie wɔ Yizilayɛ. Ɛnee eza bɛsie bɛ wɔ sua nu. (Fa toto Dwɔn 2:14, 16 anwo.) Bible Plants and Animals buluku ne hanle kɛ, “ɛnee bɛsie mɔlɔnoma wɔ namunamu nee azua mɔɔ wɔ Palɛsetanye la amuala azo. Suamenle biala lɛ ye mɔlɔnoma tunli anzɛɛ tokule wɔ bane ne anwo mɔɔ nloma ne mɔ kola da nu a.”—Fa toto Ayezaya 60:8 anwo.
Mɔlɔnoma mɔɔ la tunli nu
Ɛhye ati, Gyihova maanle Yizilayɛma vale nloma mɔɔ bɛbanyia bie wɔ bɛ ɛkɛ ne ala la bɔle afɔle vale hilele kɛ ɔlɛ ɛlɔlɛ yɛɛ ɔte edwɛkɛ bo.