YƐ KILISIENE ƐBƐLABƆLƐ
Gyihova Boa Yɛ Wɔ Yɛ Sɔnea Mekɛ Nu
Wɔ awieleɛ mekɛ ɛhye anu, yɛyia sɔnea dɔɔnwo mɔɔ anu yɛ se la. Ɔdwu mekɛ ne bie a, yɛte nganeɛ kɛ yɛ sɔnea ne mɔ bo yɛ nwo zo. Noko akee, saa yɛkɔ zo yɛbikye Gyihova a, ɔbaboa yɛ yeamaa yɛagyinla ngyegyelɛ mɔɔ ɔte ɛbolɛ kpalɛ bɔbɔ la anloa. (Ay 43:2, 4) Kɛ ɔkɛyɛ na yɛabikye Gyihova wɔ yɛ sɔnea mekɛ nu ɛ?
Asɔneyɛlɛ. Saa yɛka yɛ ahonle nu edwɛkɛ yɛkile Gyihova wɔ asɔneyɛlɛ nu a, ɔbamaa yɛ anzodwolɛ nee anwosesebɛ yeamaa yɛazie yɛ nwo dii.—Fe 4:6, 7; 1Tɛ 5:17.
Debiezukoalɛ. Yɛhyia sunsum nu aleɛ nee moalɛ mɔɔ Gyihova dua yɛ mediema nwo zo fa maa yɛ wɔ debiezukoalɛ bo la anwo ɛnɛ yɛtɛla mekɛ biala. (Hi 10:24, 25) Saa yɛsiezie yɛ nwo yɛmaa debiezukoalɛ ne mɔ, yɛkɔ na yɛfa yɛ nwo yɛwula nu a, Gyihova sunsum ne baboa yɛ kpalɛ.—Ye 2:29.
Daselɛlilɛ. Saa yɛbɔ mɔdenle yɛfa yɛ nwo yɛwula daselɛlilɛ gyima ne anu kpalɛ a, ɔbaboa yɛ yeamaa yɛadwenle ninyɛne mgbalɛ nwo. Eza ɔbamaa agɔnwolɛvalɛ mɔɔ la yɛ nee Gyihova nee yɛ gɔnwo mɔ gyimayɛvoma avinli la anu amia.—1Kɔ 3:5-10.
NEA GYIHOVA BALIE WƆ VIDIO NE NA BUA KPUYA ƐHYE MƆ:
Duzu a boale Malu maanle ɔbikyele Gyihova wɔ ye sɔnea mekɛ nu a?
Kɛzi Edwɛne 34:18 bahola akyekye yɛ rɛle wɔ yɛ sɔnea mekɛ nu kɛ mɔɔ ɔboale Malu la ɛ?
Kɛzi Malu neazo ne da ye ali kɛ Gyihova fa ye “tumi bedevinli ne” boa yɛ wɔ yɛ sɔnea mekɛ nu ɛ?—2Kɔ 4:7