Fa Anwodozo Nea Ewiade Ɛhye Awieleɛ Ne Ade

Ɔnrɛhyɛ Gyihova abotanezilɛ ne bara ye awieleɛ. Bɛbazɛkye adalɛ ɛzonlenlɛ, maanle maanle mɔɔ bɛha bɛbɔ nu la bateta Nyamenle menli ne na Gyihova bazɛkye amumuyɛma wɔ Amagɛdɔn. Kilisienema anye la kɛ ninyɛne titili ɛhye mɔ basisi.

Nɔhalɛ nu, yɛnze ninyɛne mɔɔ bahɔ zo wɔ anwongyelelɛ kpole ne anu la amuala. Kɛ neazo la, yɛnze mekɛ fɔɔnwo mɔɔ ɔbabɔ ɔ bo a. Yɛnze debie mɔɔ maanyɛlɛma bagyinla zo ateta ɛzonlenlɛ ngakyile ne mɔ a. Yɛɛ saa maanle maanle ne mɔ ka bɔ nu teta Nyamenle menli ne a, yɛnze mekɛ tendenle mɔɔ ɔbali a. Eza yɛnze adenle mɔɔ Gyihova balua zo azɛkye amumuyɛma wɔ Amagɛdɔn a.

Noko akee, debie biala mɔɔ ɔwɔ kɛ yɛnwu ye amaa yɛava anwodozo nee akɛnrasesebɛ yɛanlea kenle bie ade la wɔ Baebolo ne anu. Kɛ neazo la, yɛze kɛ yɛde awieleɛ mekɛ ne “mekɛ mɔɔ li awieleɛ la anu.” (2Ti 3:1) Yɛze kɛ saa bɛteta ɛzonlenlɛ ngakyile ne mɔ a bɛbapɛ mekɛ ne azo amaa bɛanzɛkye nɔhalɛ ɛzonlenlɛ. (Mt 24:22) Yɛze kɛ Gyihova balie ye menli. (2Pi 2:9) Yɛɛ yɛze kɛ ahenle mɔɔ Gyihova ɛkpa ye kɛ ɔva ndɛnebualɛ ɔrɛla amumuyɛma anwo zo na ɔlie ekpunli kpole ne wɔ Amagɛdɔn konle ne anu la le tenlenenli na ɔlɛ tumi.​—Ye 19:11, 15, 16.

Ninyɛne mɔɔ basisi kenle bie la bamaa ɛzulolɛ aha menli na bɛ “nye zo abulu bɛ.” Noko ɔwɔ kɛ yɛsukoa kɛzi Gyihova liele ye menli wɔ tete ne nee mɔɔ ɔbazi kenle bie mɔɔ yeha nwolɛ edwɛkɛ yehile yɛ la anwo debie na yɛdwenledwenle nwo. Saa yɛyɛ zɔ a ɔbamaa yɛava anwodozo ‘yɛadwazo yɛagyinla na yɛamaa yɛ ti zo,’ ɔluakɛ yɛ ɛlielɛ ɛbikye.​—Lu 21:26, 28.