Yɛ Adekpakyelɛ

Saa yɛbɔ mɔdenle yɛdwu sunsum nu bodane mɔɔ yɛva yɛzie yɛ nye zo la anwo a, ɛnee yɛlɛfa yɛ anwosesebɛ yɛali gyima kpalɛ. (1Kɔ 9:26) Yeha ekyi na ewiade ne ahɔ ye awieleɛ, bodane mɔɔ yɛbava yɛazie yɛ nye zo la bamaa yɛava yɛ mekɛ ne yɛali gyima kpalɛ. (Ɛf 5:15, 16) Bɛbahola bɛazuzu bodane mɔɔ bɛkulo kɛ bɛdwu nwo wɔ ɛzonlenlɛ ɛvolɛ fofolɛ ne anu la anwo wɔ bɛ abusua ɛzonlenlɛ bo ɔ?. Bodane ngakyile mɔɔ ɛbahola wɔava asɔneyɛlɛ wɔazuzu nwo la wɔ nyianu buluku ɛhye anu.​—Gye 1:5.

Kɛ neazo la, asoo bɛbahola bɛaboa sonla ko wɔ abusua ne anu bɛamaa yeayɛ adekpakyelɛ ɔ? Saa ɛte nganeɛ kɛ ɛnrɛhola ɛnrɛdwu dɔnehwele ne anwo a, ɛ nee adekpakyelɛma mɔɔ bɛ tɛnlabelɛ ne le kɛ wɔ ɛdeɛ ne la ɛli adwelie. (Mrɛ 15:22) Ɛbahola wɔavɛlɛ adekpakyelɛnli bie wɔara wɔ abusua ɛzonlenlɛ bo na ɛ nee ye ali adwelie. Akee kɛlɛ nzuzulɛ ngakyile mɔɔ ɔbava yeamaa la. Saa wɔyɛ adekpakyelɛ ɛlɛ a, ɛbahola wɔazuzu wɔ tɛnlabelɛ ne anwo saa ɛbahola wɔayɛ ye bieko a.

Asoo wɔ abusua ne anu amra bahola ayɛ adekpakyelɛ boavolɛ siane ko anzɛɛ mɔɔ bo zɔ la ɔ? Saa ɛnlɛ anwosesebɛ a, ɛbahola wɔayɛ adekpakyelɛ boavolɛ na wɔava mekɛ ekyi wɔayɛ daselɛlilɛ gyima ne kenle ko biala. Yɛɛ saa ɛngola ɛngɔ daselɛlilɛ dahuu ɔluakɛ ɛfa wɔ mekɛ kɔsɔɔti ɛyɛ gyima anzɛɛ ɛkɔ sukulu la ati a, ɛbahola wɔakpa siane mɔɔ ɛnwomenlelielɛ anzɛɛ dapɛne awieleɛ nnu wɔ nu la. Yɛ siane mɔɔ ɛkulo kɛ ɛyɛ adekpakyelɛ boavolɛ wɔ nu la nzonlɛ wɔ wɔ kalenda ne azo na yɛ ngyehyɛleɛ mɔɔ bamaa wɔadwu nwo la anwo kɛlɛtokɛ.​—Mrɛ 21:5.

NEA BƐNYIA AKƐNRASESEBƐ . . . ADEKPAKYELƐMA VIDIO NE, NA BUA KPUYA ƐHYE:

• Kɛzi Adiema Raalɛ Aamand anwubielɛ ne maa yɛnwu kɛzi Gyihova nea bɛdabɛ mɔɔ bɛfa ninyɛne bɛbɔ afɔle bɛyɛ adekpakyelɛ gyima ne la ɛ?