Ndenle Nsa Mɔɔ Yɛdua Zo Yɛfa Yɛ Nwo Yɛto Gyihova Anwo Zo La

Devidi lile Golayate anwo zo konim ɔluakɛ ɔvale ɔ nwo ɔdole Gyihova anwo zo. (1Sa 17:45) Gyihova kulo kɛ ɔfa ye anwosesebɛ ne ɔboa ye azonvolɛ kɔsɔɔti. (2Ek 16:9) Duzu a baboa yɛ yeamaa yɛava yɛ nwo yɛado Gyihova moalɛ zo na yɛanva yɛ nwo yɛando yɛ anwubielɛ nee yɛ anwosesebɛ zo ɛ? Bɛmaa yɛzuzu ndenle nsa anwo:

• Yɛ asɔne dahuu. Tɛ mekɛ mɔɔ wɔyɛ nvonleɛ la angomekye a ɔwɔ kɛ ɛyɛ asɔne ɛsɛlɛ ɛtanefakyɛ a, emomu yɛ asɔne noko wɔ mekɛ mɔɔ ɛte nganeɛ kɛ ɔwɔ kɛ ɛyɛ debie ɛtane la. (Mt 6:12, 13) Tɛ mekɛ mɔɔ wɔzi kpɔkɛ bie wɔwie la ala a ɔwɔ kɛ ɛyɛ asɔne kɛ Gyihova ɛyila zolɛ a, emomu ɔwɔ kɛ ɛyɛ asɔne noko kɛ Gyihova ɛhile wɔ adenle na ɔmaa wɔ nrɛlɛbɛ mɔɔ ɛbava wɔazi kpɔkɛ kpalɛ la.​—Gye 1:5

• Yɛ ngyehyɛleɛ kenga Baebolo ne na sukoa debie. Kenga Baebolo ne dahuu. (Ed 1:2) Nyia mekɛ dwenledwenle neazo mɔɔ wɔ Baebolo ne anu la anwo na fa ɛzukoalɛdeɛ ne yɛ gyima. (Gye 1:23-25) Siezie ɛ nwo kolaa na wɔahɔ daselɛlilɛ, mmafa ɛ nwo ɛto mɔɔ ɛze ye dɛba la azo. Dimoa siezie ɛ nwo maa asafo debiezukoalɛ amaa wɔanyia zolɛ nvasoɛ kpalɛ

• Ɛ nee Gyihova ahyehyɛdeɛ ne ɛyɛ ko. Fa adehilelɛ fofolɛ biala mɔɔ ahyehyɛdeɛ ne bava amaa la yɛ gyima ndɛndɛ. (Nɔ 9:17) Tie folɛdulɛ nee adehilelɛ biala mɔɔ asafo nu mgbanyima bava amaa la na fa yɛ gyima.​—Hi 13:17

NEA NWOLƐ ƐNGYIA KƐ YƐBAZULO KPƆDEKPƆDEYƐLƐ VIDIO NE NA BUA KPUYA ƐHYE MƆ:

• Duzu a hanle mediema ne mɔ ɛzulolɛ a?

• Duzu a boale bɛ maanle bɛgyinlanle bɛ ɛzulolɛ ne anloa a?