Kenle Bie Fanwodi Mɔɔ Nyamenle Nee Kelaese Fa Maa La

Duzu ngyegyelɛ a ɛgyi ɔ nloa a? Ɛle abusua tile mɔɔ ɛlɛbɔ mɔdenle kɛ ɛbali wɔ abusua ne anu ɛzonlelilɛ dɔɔnwo anwo gyima ɔ? Ɛle wovolɛ ko mɔɔ ɛlɛbɔ mɔdenle kɛ ɛbanlea wɔ abusua ɔ? Ɛle sukulu kakula mɔɔ ɛ gɔnwo mɔ ɛlɛsisi wɔ wɔ sukulu ɔ? Ɛlɛyia kpɔkɛdelɛ nwo ngyegyelɛ anzɛɛ kpanyinliyɛlɛ ɛva wɔ aze ɔ? Awie biala lɛ ye ngyegyelɛ. Kilisienema bie mɔ ɛlɛyia ngyegyelɛ dɔɔnwo wɔ mekɛ ko anu. Noko yɛze kɛ ɔnrɛhyɛ Gyihova balie yɛ avi ngyegyelɛ ɛhye mɔ kɔsɔɔti anu.​—2Kɔ 4:16-18.

Kolaa na mekɛ zɔhane adwu la, nyia anwodozo kɛ Gyihova te wɔ ngyegyelɛ ne abo, ɔ nye sɔ wɔ nɔhalɛlilɛ nee wɔ kpundiigyinlanlɛ ne, na ɔbayila wɔ kpole kpalɛ. (Gyɛ 29:11, 12) Gyisɛse noko anye die yɛ nuhua ko biala anwo. Yebɔ yɛ ɛwɔkɛ kɛ ‘ɔ nee yɛ balua’ wɔ mekɛ mɔɔ yɛlɛbɔ mɔdenle yɛali yɛ Kilisiene ɛzonlelilɛ ngakyile nwo gyima la. (Mt 28:20) Saa yɛdwenledwenle kenle bie fanwodi mɔɔ yɛbanyia ye wɔ Nyamenle Belemgbunlililɛ ne abo la anwo a, ɔmaa anyelazo mɔɔ yɛlɛ la anu yɛ se na yɛsika yɛ bo kɛ yɛbagyinla ngyegyelɛ kɔsɔɔti mɔɔ yɛlɛyia ye ɛnɛ la anloa.​—Wlo 8:19-21.

NEA FA WƆ ADWENLE SIE GYISƐSE ANWO ZO WƆ MEKƐ MƆƆ AHUMU KPOLE BIE ƐDULƐ ƐLƐBIKYE LA VIDIO NE NA BUA KPUYA ƐHYE MƆ:

• Adenle boni azo a alesama hwenle bɛ nwo vile Nyamenle anwo a, na duzu a ɛvi nu ɛra a?

• Kenle bie anyelazo boni a wɔ ɛkɛ ne maa menli mɔɔ di nɔhalɛ maa Gyihova la a?

• Kɛzi kenle bie anyelazo ɛhye bahola ara nu ɛ?

• Ewiade fofolɛ ne anu nyilalɛ boni a ɛ nye la ye ade ɛsesebɛ a?