“Bɛye Adalɛ Nyamenle Ne Mɔ Bɛvi Bɛ Avinli”

Ɛnee awozonle ɛzonlenlɛ nwo mɛla biala ɛnle ɛkɛ ɛdeɛ, noko ɛnee Gyekɔbo ze kɛ ɔwɔ kɛ ɔsonle Gyihova angomekye. (Ɛzɛ 20:3-5) Ɔti mɔɔ Gyihova zele ye kɛ ɔzia ɔhɔ Bɛtɛle la, Gyekɔbo zele menli mɔɔ ɔ nee bɛ lua la amuala kɛ bɛye bɛ ananze ne mɔ bɛvi bɛ avinli. Akee Gyekɔbo vuandinle ananze ne mɔ nee bɛ asomadeɛ ne mɔ mɔɔ ɔbayɛ kɛ ɛnee bɛwula bɛfa bɛbɔ bɛ nwo bane la kɔsɔɔti guale. (Gyn 35:1-4) Gyihova anye liele mɔɔ Gyekɔbo yɛle la anwo kpalɛ.

Ɛnɛ, duzu a yɛyɛ yɛkile kɛ Gyihova angomekye a yɛsonle ye a? Mɔɔ hyia kpalɛ la a le kɛ ɔwɔ kɛ yɛtwe yɛ nwo yɛfi awozonlezonlenlɛ anzɛɛ sunsum ɛtane nyɛleɛ biala anwo. Yɛfuandi bɛ nwo debie biala mɔɔ yɛlɛ la yɛgua na yɛnea ninyɛne mɔɔ yɛfa yɛdielie yɛ nye la boɛ. Biza ɛ nwo kɛ: ‘Me nye die mbuluku nee sini mɔɔ ka menli mɔɔ bɛno mogya, bɛnlɛ nganeɛdelɛ bɛmmaa awie mɔ anzɛɛ sunsum ɛtane nwo edwɛkɛ la anwo ɔ? Asoo ninyɛne mɔɔ mefa medielie me nye la maa ɔyɛ kɛ asɛɛ esiane biala ɛnle magic, silihyelɛ anzɛɛ amonle ɛwalɛ nwo ɔ?’ Ɔwɔ kɛ yɛtwe yɛ nwo yɛfi ninyɛne mɔɔ Gyihova kyi la anwo bɔkɔɔ.​—Ed 97:10.

NEA “BƐZI ABƆNSAM ADENLE” VIDIO NE NA BUA KPUYA ƐHYE MƆ:

• 

  Duzu a ɛnee gyegye Baebolo sukoavo bie mɔɔ bɛfɛlɛ ye Palesa la a?

• 

  Duzu ati a nrɛlɛbɛ wɔ nu kɛ yɛbamaa mgbanyima ne mɔ aboa yɛ Baebolo sukoavo anzɛɛ adiema bie mɔɔ sunsum ɛtane gyegye ye la ɛ?

• 

  Ninyɛne boni a ɔwɔ kɛ menli mɔɔ kpondɛ Gyihova ɛkɛ banebɔlɛ la twe bɛ nwo fi nwo bɔkɔɔ a?

• Kpɔkɛ mɔɔ anwo hyia la boni a Palesa zile ye ndɛndɛ a?

• Ninyɛne boni a ɛbayɛ wɔazi sunsum ɛtane ne mɔ adenle wɔ ɛleka mɔɔ ɛwɔ la a?