“Bɛhɔ Zo Bɛzuzu Ninyɛne Ɛhye Mɔ Anwo”

Ninyɛne boni ɔ? Felepaema 4:8 ka kɛ yɛdwenledwenle ninyɛne mɔɔ le nɔhalɛ, mɔɔ nwolɛ hyia, mɔɔ le tenlene, mɔɔ nwolɛ te, mɔɔ maa bɛnyia ɛlɔlɛ, mɔɔ bɛka nwolɛ edwɛkɛ kpalɛ, ɛbɛla kpalɛ, nee mɔɔ ayɛlɛyelɛ wɔ nwolɛ la anwo. Ɛhye ɛngile kɛ ɔwɔ kɛ Baebolo ne ala a Kilisienema dwenledwenle nwo mekɛ kɔsɔɔti a. Noko, ɔwɔ kɛ yɛ ahonle nu nzuzulɛ wula Gyihova anyunlunyia. Ɔnle kɛ yɛfa yɛ adwenle yɛsie ninyɛne mɔɔ bamaa yeayɛ se kɛ yɛbali nɔhalɛ yɛamaa Gyihova la azo.​—Ed 19:14.

Ɔnla aze kɛ yɛbahoati nzuzulɛ ɛtane. Ɔwɔ kɛ yɛbɔ mɔdenle yɛ nee yɛ nwonane ne mɔɔ tɔ sinli yɛɛ “ewiade ɛhye nyamenle ne,” Seetan ko dahuu. (2Kɔ 4:4) Ɔluakɛ ɔdaye a ɔnea amaneɛbɔlɛ ninyɛne le kɛ tɛlevihyɛne, riledio, Yintanɛte yɛɛ adwelie ngɛlata nee mbuluku zo la ati, ɛbɛlatane nwo edwɛkɛ ɛyi bɛ tɔ. Saa yɛanyɛ nyeyenu wɔ mɔɔ yɛtie nee mɔɔ yɛnea la anu a, yɛ adwenle ne bazɛkye na awieleɛ bɔkɔɔ ne yɛ ɛbɛlabɔlɛ noko bazɛkye.​—Gye 1:14, 15.

NEA KPO DEBIE MƆƆ SƐKYE NƆHALƐLILƐ LA​—ANYELIELƐ NINYƐNE MƆƆ ƐNFƐTA VIDIO NE NA AKEE BUA KPUYA ƐHYE MƆ:

• 

  Duzu a ɛnee adiema nrenyia ne ɛlɛnea wɔ ye fonu ne azo a, na kɛzi ɔgyegyele ye ɛ?

• 

  Kɛzi edwɛkɛ mɔɔ wɔ Galeehyeama 6:7, 8 yɛɛ Edwɛndolɛ 119:37 boale ye ɛ?