Nyia Anyuhɔlɛ Wɔ Bɛtianwo Debiezukoalɛ Ɛyɛlɛ Nu

DEƐMƆTI ƆHYIA LA: Bɛtianwo debiezukoalɛ boa yɛ maa yɛte nɔhalɛ ne “tɛtɛlɛ nee ye tendenle nee ye anwumahɔlɛ nee kɛzi ye kuma ne de la abo kpalɛ.” (Ɛf 3:18) Eza ɔboa yɛ ɔmaa yɛyɛ menli mɔɔ edwɛkɛ biala ɛnle yɛ nwo wɔ ɛtane ewiade ɛhye anu na yɛsɔ “ngoane edwɛkɛ ne anu boɛ.” (Fe 2:15, 16) Bɛtianwo debiezukoalɛ mɔɔ yɛdua Baebolo ne azo yɛyɛ la boa yɛ maa yɛsukoa ninyɛne mɔɔ baboa yɛdayɛ mumua ne la. Kɛ ɔkɛyɛ na yɛanyia nvasoɛ wɔ Baebolo ne mɔɔ yɛkenga na yɛsukoa la anu ɛ?

KƐZI BƐYƐ YE LA:

• Saa Baebolo mɔɔ ɛfa ɛsukoa la le mɔɔ bɛpelente anzɛɛ ɔle mɔɔ wɔ ɛlɛtɔlɔneke zo bɔbɔ a, fa kɔla yɛ ngyehyɛnu bie mɔ nzonlɛ na yɛ kɛlɛtokɛ wɔ nu

• Saa ɛkenga Nyamenle Edwɛkɛ ne a, biza ɛ nwo kpuya ɛhye mɔ: ‘Nwane ɔ? Duzu ati ɔ? Mekɛ boni? Nienwu? Kɛmɔti ɛ? Kɛzi?’

• Kpondɛ dɔɔnwo. Fa neɛnleanu ninyɛne mɔɔ yɛlɛ la di gyima kpondɛ edwɛkɛtile anzɛɛ Baebolo ngyɛnu bie anwo edwɛkɛ dɔɔnwo

• Dwenledwenle mɔɔ ɛlɛkenga la anwo na nea kɛzi edwɛkɛ ne fale ɛ nwo la

• Fa mɔɔ ɛsukoa la bɔ wɔ ɛbɛla alehyenlɛ biala.​—Lu 6:47, 48

NEA DUA BƐTIANWO DEBIEZUKOALƐ ZO ‘SƆ NGOANE EDWƐKƐ NE ANU BOƐ’ VIDIO NE NA BUA KPUYA ƐHYE MƆ:

• Edwɛkɛ boni a bie mɔ ɛha ye wɔ bɛtianwo debiezukoalɛ nwo a?

• Kɛmɔti a ɔwɔ kɛ yɛfa asɔneyɛlɛ yɛbɔ bɛtianwo debiezukoalɛ biala abo ɛ?

• Duzu a baboa yɛ yeamaa yɛade Baebolo ngyɛnu bie abo kpalɛ a?

• Duzu a yɛbahola yɛava yɛayɛ ninyɛne nzonlɛ wɔ yɛ Baebolo mɔɔ yɛfa yɛsukoa la anu a?

• Duzu ati a ɔhyia kɛ yɛdwenledwenle mɔɔ yɛsukoa ye wɔ Nyamenle Edwɛkɛ ne anu la anwo a?

• Duzu a ɔwɔ kɛ yɛfa mɔɔ yɛsukoa la yɛyɛ a?