YƐ KILISIENE ƐBƐLABƆLƐ
Kɛzi Ɛbazukoa Ngɛlɛlera Ne Kpalɛ La
Ɛkulo kɛ ɛdi nɔhalɛ wɔ sɔnea mekɛ nu kɛ Daneɛle ɔ? Daneɛle zukoale Nyamenle Edwɛkɛ ne nee ngapezo mɔɔ anu pi la kpalɛ. (Da 9:2) Saa ɛsukoa Baebolo ne anyebolo zo a, ɔbamaa wɔali nɔhalɛ dahuu. Adenle boni azo? Ɔbamaa anwodozo mɔɔ ɛlɛ kɛ Gyihova ɛwɔkɛ ne mɔ bara nu la ayɛ kpole. (Dwh 23:14) Eza ɔbamaa ɛlɔlɛ mɔɔ ɛlɛ ɛmaa Nyamenle la ayɛ kpole na yemɔ baboa wɔ yeamaa wɔayɛ mɔɔ le kpalɛ la dahuu. (Ed 97:10) Noko kɛzi ɛbabɔ ɔ bo ɛ? Fa nzuzulɛ ɛhye mɔ yɛ gyima.
Duzu a menzukoa a? Ɛ nwo mɔɔ ɛbaziezie wɔamaa asafo nyianu la boka debiezukoalɛ ngyehyɛleɛ kpalɛ nwo. Saa ɛtɔ alagye ɛkenga dapɛne Baebolo ɛgengalɛ ne na ɛyɛ neɛnleanu wɔ ninyɛne mɔɔ ɛnde ɔ bo la anu a, ɛbanyia nvasoɛ. Bieko, bie mɔ ɛva ɛyɛ bɛ bodane kɛ bɛbazukoa Baebolo ngapezo, Nyamenle sunsum nu ma ne, ɛzoanvolɛ Pɔɔlo edwɛkpatɛlɛvolɛ adendulɛ ne, anzɛɛ abɔdeɛ nwo debie. Saa Baebolo kpuya bie ba wɔ adwenle nu a, kɛlɛ to ɛkɛ na fa boka debie mɔɔ ɛkulo kɛ ɛsukoa ye kenle fofolɛ la anwo.
Nienwu a mebanyia edwɛkɛ dɔɔnwo a? Nea Neɛnleanu Ninyɛne Mɔɔ Maa Yɛnyia Sunsum Nu Ninyɛne Dɔɔnwo La vidio ne. Yɛ ewiade tumililɛ ne mɔɔ bɛva nane anwo ɛzulolɛ ne bɛgyinla ɛkɛ bɛmaa ye wɔ Daneɛle tile 7 ne la anwo neɛnleanu fa sɔ ɛ nwo nea.
Mekɛ tendenle nyɛ a ɔwɔ kɛ mefa mesukoa a? Ɛsukoa debie dahuu a ɛbanyia sunsum nu kpɔkɛdelɛ. Ɛbɔ ɔ bo a, ɛbahola wɔava mekɛ ezinra wɔazukoa. Saa nwolɛ bahyia a, fa mekɛ ne bie boka nwo. Nyamenle Edwɛkɛ ne ɛzukoalɛ le kɛ ɛlɛkpondɛ ezukoa nvutuke la, mekɛ mɔɔ ɛlɛkɔ zo wɔazukoa la, ɛnee ɛhulolɛ ne ɛlɛyɛ kpole! (Mrɛ 2:3-6) Ɛ ti akunlu bara Nyamenle Edwɛkɛ ne azo na Baebolo ɛzukoalɛ bayɛ wɔ subane.—1Pi 2:2.
DUZU A NANE ANWO ƐZULOLƐ NE MƆ MƆƆ WƆ DANEƐLE TILE 7 LA GYI ƐKƐ NE MAA A?
KPUYA BIEKO:
Kɛzi Daneɛle 7:8, 24 rale nu ɛ?
GYIMAYƐLƐ BIEKO:
Duzu a nane anwo ɛzulolɛ ne mɔ mɔɔ wɔ Yekile tile 13 la gyi ɛkɛ ne maa a?