Tete Bɛ Maa Bɛzonle Gyihova Dahuu

Anwubielɛ kile kɛ nolobɔlɛma mɔɔ nyianle ndetelɛ wɔ mɔlebɛbo ne la ta bɔ mɔdenle kpalɛ wɔ daselɛlilɛ gyima ne anu. (Mrɛ 22:6; Fe 3:16) Kɛzi ɛbaboa sukoavo bie wɔamaa yeado adiabo kpalɛ yeamaa daselɛlilɛ gyima ne la anwo nzuzulɛ bie a le ɛhye mɔ:

• Saa bɛdie wɔ sukoavo ne bɛto nu kɛ nolobɔlɛnli ala pɛ a, bɔ ɔ bo kɛ ɛtete ye. (km 8/15 1) Maa ɔnwu deɛmɔti nwolɛ hyia kɛ ɔbava ɔ nwo yeawula daselɛlilɛ gyima ne anu dapɛne biala la. (Fe 1:10) Ka azɛlɛsinli ne anwo edwɛkɛ kpalɛ kile ye. (Fe 4:8) Maa ye anwosesebɛ maa ɔ nee ekpunli zo neavolɛ ne nee nolobɔlɛma gyɛne ɛhɔ daselɛlilɛ amaa bɛava bɛ anwubielɛ ne bɛaboa ye.​—Mrɛ 1:5; km 10/12 6 ¶3

  

• Saa bɛsɔne wɔ sukoavo ne a, kɔ zo maa ye anwosesebɛ yɛɛ mmagyakyi ye ɛtetelɛ wɔ daselɛlilɛ gyima ne anu titili saa ɔtɛwiele “Nyamenle Ɛhulolɛ” buluku ne sukoa a.​—km 12/13 7

  

• Saa ɛ nee nolobɔlɛnli fofolɛ lua daselɛlilɛ nu a, fa mukenye sikalɛ di gyima. Saa ɔdi daselɛ ɔwie a, fi ahonle nu kanvo ye. Fa nzuzulɛ mɔɔ bamaa yɛayɛ nla wɔ daselɛlilɛ nu la maa ye.​—km 5/10 7