YƐ KILISIENE ƐBƐLABƆLƐ
Maa Ɛ Nye Ɛlie Edwɛkpahanlɛ Gyima Ne Anwo
Asoo yeyɛ se yemaa wɔ ɛlɛ kɛ ɛbali daselɛ? Yɛ nuhua dɔɔnwo babua kɛ ɛhɛe. Duzu ati ɔ? Bie a, yɛta yɛyia anyetelema anzɛɛ atisesebɛma wɔ yɛ azɛlɛsinli ne anu, anzɛɛ yɛsulo kɛ yɛ nee nyɛvolɛ bɛadendɛ. Nɔhalɛ nu, ninyɛne ɛhye mɔ bahola amaa yɛ anyelielɛ aha aze. Noko, anyelielɛ Nyamenle ne kulo kɛ yɛfa anyelielɛ yɛsonle ye. (Ed 100:2; 1Ti 1:11) Ninyɛne nsa boni ati a ɔwɔ kɛ yɛmaa yɛ nye die edwɛkɛhanlɛ gyima ne anwo a?
Mɔɔ limoa, yɛ edwɛkɛ ne maa anyelazo. Ɛnɛ, anyelazo ɛlɛminli wɔ ewiade ɛdeɛ, noko yɛbahola yɛamaa menli anyia “nrɛlaleɛ kɛnlɛma kpalɛ.” (Ay 52:7) Eza Nyamenle Belemgbunlililɛ ne anwo edwɛkpa bahola amaa yɛ nye alie. Kolaa na wɔahɔ daselɛlilɛ la, dwenledwenle nyilalɛ mɔɔ Nyamenle Belemgbunlililɛ ne bava ara azɛlɛ ye azo la anwo.
Mɔɔ tɔ zo nwiɔ, edwɛkpa ne mɔɔ yɛbɔ ye nolo la boa menli wɔ nwonane nu nee sunsum nu. Bɛsukoa kɛ bɛbakpo nyɛleɛ mɔɔ boda la na bɛanyia dahuu ngoane nwo anyelazo. (Ay 48:17, 18; Wlo 1:16) Yɛbahola yɛava ye kɛ yɛyɛ gyima wɔ ɛleka mɔɔ bɛkpondɛ menli bɛdie bɛ ngoane la. Menli bie mɔ anye ɛnrɛlie nwo kɛ yɛbalie bɛ ngoane ɛdeɛ, noko yɛbahɔ zo yɛakpondɛ menli mɔɔ anye die nwo la.—Mt 10:11-14.
Mɔɔ tɔ zo nsa la anwo hyia kpalɛ, edwɛkɛhanlɛ gyima ne di Gyihova eni. Ɔ nye die daselɛlilɛ gyima ne mɔɔ yɛyɛ la anwo kpalɛ. (Ay 43:10; Hi 6:10) Ɔti, ɔfa ye sunsum nwuanzanwuanza ne ɔboa yɛ. Bɛmaa yɛzɛlɛ Gyihova kɛ ɔmaa yɛ anyelielɛ mɔɔ le sunsum nwuanzanwuanza ma ne la bie. (Ga 5:22) Ye moalɛ zo, yɛbahola yɛali yɛ adwenleadwenle zo na yɛava akɛnrasesebɛ yɛabɔ edwɛkpa ne nolo. (Gyi 4:31) Akee, saa menli mɔɔ wɔ yɛ azɛlɛsinli ne anu la tie anzɛɛ bɛandie yɛ bɔbɔ a, yɛbanyia anyelielɛ wɔ edwɛkɛhanlɛ gyima ne anu.—Yi 3:3.
Subane boni a ɛkulo kɛ ɛda ye ali wɔ daselɛlilɛ nu a? Kɛ ɔkɛyɛ na wɔala anyelielɛ ali ɛ?
BƐNLEA DEBIE ƐZUKOALƐ NEE NINYƐNE NWO ƐDWENLEDWENLENLƐ ZO LƐ NVASOƐ VIDIO NE, NA BƐBUA KPUYA ƐHYE MƆƆ WƆ Ɔ BO ƐKE LA:
Saa yɛfa dɔnehwele dɔɔnwo yɛyɛ daselɛlilɛ gyima ne siane biala bɔbɔ a, duzu ati a ɔwɔ kɛ yɛmaa sunsum nu ninyɛne mɔɔ yɛsukoa la anwo kyia yɛ a?
Adenle boni azo a ɔwɔ kɛ yɛsukoa Mary a?
Mekɛ boni a ɛfa ɛdwenledwenle Nyamenle Edwɛkɛ ne anwo a?
Saa ɛlɛbɔ edwɛkpa ne nolo a, nzɔne a maa ɛ nye die a?