Saa Yɛkɔto Kakula Bie Wɔ Sua Nu A

Saa yɛkɔto kakula bie wɔ sua nu a, ɔwɔ kɛ yɛbiza ye awovolɛ abo zo na yɛ nee bɛ tendɛ. Ɛhye bahile kɛ yɛbu bɛ tileyɛlɛ ne. (Mrɛ 6:20) Saa kakula ne maa yɛ ebia a, ɔnle kɛ yɛtɛnla aze. Saa ye awovolɛ ɛnle ɛkɛ a, ɔwɔ kɛ yɛsia yɛba kenle fofolɛ.

Saa kakula ne ɛnyi ekyii, bie a ɔlɛ ɛvolɛ kɛyɛ 15 mɔɔ kɔ 19 la a, ɔbayɛ kpalɛ kɛ yɛbabiza ye awovolɛ abo zo. Saa bɛnle ɛkɛ a, bie a yɛbabiza ye saa ye awovolɛ maa ɔkpa buluku mɔɔ ɔdaye mumua ne ɔbagenga la a. Saa ɔle zɔ a, yɛbahola yɛava yɛ mbuluku ne bie yɛamaa ye na yɛaha yɛahile ye kɛ ɔhɔ jw.org ne azo.

Saa yɛlɛsia yɛahɔkpɔla kakula bie mɔɔ anye liele nwolɛ la a, ɔwɔ kɛ yɛnwu ye awovolɛ. Ɛhye bamaa yɛanyia adenle yɛahilehile deɛmɔti yɛra ɛkɛ la anu na yɛahile bɛ folɛdulɛ kpalɛ mɔɔ Baebolo ne fa maa mbusua mɔɔ bɛkola bɛfa bɛ nwo bɛto zo la. (Ed 119:86, 138) Saa yɛsuzu ye awovolɛ anwo na yɛbu bɛ a, ɔbayɛ daselɛ kpalɛ yeamaa bɛ na bie a ɔbamaa yɛanyia adenle yɛaha edwɛkpa ne yɛahile abusua ne.​—1Pi 2:12.