‘Walk by Faith, Not by Sight’
Kolaa na bɛabɔ Gyɛlusalɛm anwo bɛayia na bɛazɛkye ye bɔkɔɔ la, ɛzoanvolɛ Pɔɔlo hɛlɛle Kilisienema kɛ ɔwɔ kɛ Kelaese sogyama kpalɛ maa bɛ nye da kɛ bɛbanwu amaneɛ yɛɛ ɔnle kɛ bɛmaa anwondɔlɛ nee anyelielɛdeɛ kyia bɛ somaa. (2 Tem. 2:3, 4) Kɛmɔ ɔnrɛhyɛ na munzule ado ewiade ɛtane ɛhye la ati, yɛhyia diedi kpalɛ amaa yɛava yɛ nye yɛazie sunsum nu ninyɛne zo. (2 Kɔl. 4:18; 5:7) Nea ‘Walk by Faith, Not by Sight’ vidio ne. (Kɔ jw.org azo na nea PUBLICATIONS > VIDEOS abo.) Yɛ kɛzi nwonane afoa nu ninyɛne mɔɔ yɛbali ɔ nzi somaa la yɛle ɛhane maanle Neeham nee Abaetale la nzonlɛ. Bɛwie a, bɛzuzu kpuya ɛhye mɔ anwo.
(1) Wɔ ɛvoya ne mɔɔ limoa la anu, ɛnee duzu a le “munzudeɛ ne mɔɔ bɔ maanle” mɔɔ “ɔgyi ɛleka nwuanzanwuanza ne” la ɛ, na duzu a ɛnee ɔwɔ kɛ Kilisienema mɔɔ wɔ Gyɛlusalɛm la yɛ a? (Mat. 24:15, 16) (2) Nzɔne ati a ɛnee ɔhyia diedi na bɛavi suakpole ne azo ɛ? (3) Ninyɛne boni a ɛnee ɔwɔ kɛ bɛfa bɛbɔ afɔle na bɛavi ɛkɛ ɛ? (4) Kɛmɔti a Neeham nee Abaetale hwehwenle bɛ bo aze ɛ? (Mat. 24:17, 18) (5) Diedi nwo sɔnea bieko boni a Relahyɛle yiale wɔ mekɛ mɔɔ ɔlɛfi Gyɛlusalɛm la ɛ? (Mat. 10:34-37; Maake 10:29, 30) (6) Kɛzi Yitan yɛle diedi nee Gyihova anu anwodozo nwo neazo kpalɛ ɛ? (7) Ngyegyelɛ boni a Kilisienema yiale wɔ Pɛla a? (8) Kɛzi Neeham nee Abaetale diedi ne hanle aze ɛ? (9) Kɛzi Gyihova nleanle Kilisienema mɔɔ wɔ Pɛla la ɛ? (Mat. 6:33; 1 Tem. 6:6-8) (10) Kɛ ɔkɛyɛ na yɛazukoa Ebileham nee Sɛla wɔ mekɛ mɔɔ yɛlɛbikye ewiade ɛhye awieleɛ la ɛ? (Hib. 11:8-10) (11) Duzu a maanle Neeham nee Abaetale nyianle adwenle kɛ bɛsia bɛahɔ Gyɛlusalɛm ɛ, na nzɔne ati a ɛnee ɔnle adwenle kpalɛ a? (Luku 21:21) (12) Mekɛ mɔɔ Neeham nee Abaetale dwule Gyɛlusalɛm la, kɛzi ɛnee asetɛnla ne de wɔ ɛkɛ ɛ? (13) Duzu ati a ɔwɔ kɛ yɛmia yɛ diedi nu ɛnɛ kolaa na ewiade ɛhye ara ye awieleɛ a?—Luku 17:31, 32; 21:34-36.
Diedi nu mɔɔ yɛdua la kile kɛ (1) yɛdie Gyihova adehilelɛ yɛado nu, (2) yɛmaa yeahile yɛ adenle, na (3) yɛabu sunsum nu ninyɛne yɛadɛla nwonane nu ɛdeɛ. Ɔrɛla ye kɛ yɛbahɔ zo yɛalua wɔ diedi nu na yɛanyia anwodozo kɛ “ewiade nee nuhua atiakunluwɔzo ninyɛne ne mɔ amuala bapɛ nu aze, na sonla ne mɔɔ yɛ Nyamenle ɛhulolɛdeɛ la de aze dahuu.”—1 Dwɔn 2:17.