Nolobɔlɛ

◼ Buluku mɔɔ yɛbava yɛamaa wɔ November nee December: Duzu A Baebolo ne Kilehile Amgba A? anzɛɛ trate ɛhye mɔ anu ko: Kɛzi Ɛbu Baebolo Ne Ɛ? (T -30), Kɛzi Ɛnwu Kenlebie Ɛ? (T-31), Duzu A Maa Abusua Asetɛnla Yɛ Anyelielɛ A? (T-32), Nwane A Amgba Nea Ewiade Ne Azo A? (T-33), Asoo Amaneɛnwunlɛ Bara Awieleɛ? (T-34), Nyamenle Belemgbunlililɛ Ne A Le Duzu? (T-36). January nee February: Edwɛkpa Mɔɔ Vi Nyamenle Ɛkɛ!, Tie Nyamenle, anzɛɛ Tie Nyamenle Na Nyia Dahuu Ngoane.

◼ Saa ɔka dapɛne na bɛahɔ bɛ maanzinli nyianu ne a, bɛyɛ nzenzaleɛ wɔ bɛ debiezukoalɛ ne anu amaa bɛanlea “Nyianu Ngakyelɛ” nwo vidio ne. Bɛzuzu folɛdulɛ nee ngakyelɛ mɔɔ wɔ vidio ɛhye anu la yɛɛ August 3, 2013, kɛlata kɔmaa asafo muala mɔɔ se bɛlɛkɔ sunsum nu gyimalilɛ bo a bɛnlea boɛ la anwo. Bɛwie nyianu ne a, ye siane ko anzɛɛ siane nwiɔ anzi, bɛbahola bɛava asafo nu ngyianlɛ foa bie bɛazuzu nyianu ne anu edwɛkɛ titili bie mɔɔ nolobɔlɛma nwunle kɛ ɔbaboa bɛ wɔ daselɛlilɛ nu la anwo.