Yɛbɔ Mɔdenle Yɛnyia Anyuhɔlɛ Wɔ Daselɛlilɛ Nu—Di Daselɛ Wɔ Ɛleka Mɔɔ Gyima Gyima Wɔ La

Deɛmɔti Ɔhyia La: Kɛmɔ menli dɔɔnwo fa mekɛ dɔɔnwo yɛ gyima la ati, adenle titili ko mɔɔ yɛbahola yɛalua zo yɛaha Belemgbunlililɛ edwɛkɛ ne bie yɛahile bɛ la a le kɛ yɛbali bɛ daselɛ wɔ bɛ gyima nu. Daselɛ mɔɔ yɛdi ye wɔ ɛleka mɔɔ gyima gyima wɔ la kola yɛ anyelielɛ na ɔso ma, ɔluakɛ bɛ muala bɛwɔ gyima nu yɛɛ gyimayɛvoma ne ta tendɛ kɛnlɛma ɔluakɛ bɛbu awie biala kɛ bie a ɔlɛba ɔ nee bɛ arali gua. Amaa bɛadie yɛ edwɛkɛ ne la, ɔwɔ kɛ nolobɔlɛma da nwunu ali na bɛsiezie bɛ nwo kɛnlɛma. (2 Kɔl. 6:3) Ɛhye ati, ɔwɔ kɛ ɛzonlenlɛ gyima zo neavolɛ ne nea kɛzi bɛyɛ azɛlɛsinli mɔɔ gyima gyima wɔ nu anu gyima nee menli mɔ di daselɛ wɔ ɛkɛ la boɛ.

Kɛzi Bɛyɛ Ye La:

Siezie wɔ edwɛkɛ ne sikalɛ. Saa yɛdi gyimayɛvo ne mekɛ a, bie a mekɛ fofolɛ ɔnrɛmaa yɛ adenle ɔnrɛmaa yɛ nee ye ɛnrɛdendɛ.
Kpondɛ mekɛ mɔɔ menli dɔɔnwo ɛnle gyima nu ɛkɛ la na kɔ ɛkɛ, bie a mekɛ mɔɔ bɛbabuke gyima ne ɛkɛ ne ala la.
Bɔ mɔdenle kɛ ɛbalimoa ɛ nee ahenle mɔɔ nea gyima ne azo la adendɛ. Te ɛ nyunlu na sele. Ɛbahola wɔaha kɛ: “Kɛmɔ yɛndo menli dɔɔnwo wɔ bɛ sua nu la ati, yɛlɛfa mekɛ ekyi yɛakpɔla bɛ wɔ bɛ gyima nu.” Ka edwɛkɛ ne mɔɔ wɔziezie ye sikalɛ la kile ye na maa ye trate, magazine anzɛɛ buluku gyɛne biala. Amaa yeambu yɛ kɛ yɛlɛba yɛaradɔne debie yɛamaa bɛ la, ɔbayɛ kpalɛ kɛ yɛnrɛha ndoboa nwo edwɛkɛ, kyesɛ ɔdaye mumua ne ɔbiza yɛ.
Saa ahenle mɔɔ nea gyima ne azo la anye die nwo a, sɛlɛ ye adenle kɛ ɛkpondɛ kɛ ɛ nee gyimayɛvoma mɔɔ ɛha la tendɛ. Wɔ gyima bie mɔ anu, ɛbahola wɔabiza bɛ saa ɛbahola wɔagyakyi yɛ mbuluku ne bie wɔ ɛleka mɔɔ bɛdie bɛ menle la a.
Fa nwunu di gyima, mmayɛ kyengye. Kɛ neazo la, saa gyimayɛvo bie nee awie mɔɔ ɛra ɛkɛ la ɛlɛtendɛ a, kendɛ maa ɔwie na ɛ nee ye adendɛ.

Sɔ Ɛhye Nea Wɔ Siane Ɛhye Anu:

Wɔ bɛ nɔsolɛ Abusua Ɛzonlenlɛ bieko abo, bɛzukoa edwɛkɛ sikalɛ mɔɔ saa bɛlɛdi daselɛ wɔ ɛleka mɔɔ gyima gyima wɔ la a, bɛbaha la.