2015 Teokelase Ɛzonlenlɛ Sukulu Ne Maa Yɛnyia Anyuhɔlɛ Wɔ Yɛ Ngilehilelɛ Nu
1 Edwɛndolɛnli Devidi hɛlɛle kɛ: “O [Gyihova], me bodane nee me dievolɛ, maa me nloa edwɛkɛ nee me ahonle nu nzɛlɛlɛ ɛdwu ɛ nyunlu na ɔzɔ ɛ nye.” (Edw. 19:14) Yɛkpondɛ kɛ Gyihova anye die yɛ edwɛkɛ nwo, ɔluakɛ nwolɛ adenle mɔɔ yɛnyia yɛlɛka nɔhalɛ ne anwo edwɛkɛ wɔ asafo ne anu nee daselɛlilɛ nu la sonle bolɛ maa yɛ. Teokelase Ɛzonlenlɛ Sukulu ne le ndenle mɔɔ Gyihova dua zo tete yɛ maa ɛzonlenlɛ gyima ne la anu ko. Ndetelɛ ɛhye kɔ zo dapɛne biala wɔ asafo mɔɔ bo 111,000 mɔɔ wɔ ewiade amuala la anu. Sukulu ne ɛboa mediema mrenya nee mraalɛ mɔɔ bɛvi ewiade amuala nee aneɛ ngakyile nu la yemaa bɛfɛta kɛ edwɛkpakavolɛma mɔɔ bɛfa edwɛkɛ mɔɔ tɔ ɛnzolɛ nu, nrɛlɛbɛ wɔ nu nee anwodozo bɛkilehile la.—Gyi. 19:8; Kɔl. 4:6.
2 Sukoa Mɔɔ Wɔ Nyamenle Edwɛkɛ Ne Anu La buluku ekyi ne, Edwɛkpa Mɔɔ Vi Nyamenle Ɛkɛ brohyua ne, yɛɛ Me Buluku Mɔɔ Ɔka Baebolo nu Edwɛkɛ ne anu edwɛkɛ a bɛbava bɛayɛ 2015 sukulu ngyehyɛleɛ ne a. Eza bɛyɛ nzenzaleɛ wɔ mekɛ mɔɔ bɛfa bɛyɛ Baebolo ɛgengalɛ nu edwɛkɛ titile ne nee Gyimalilɛ No. 1 ne la anu. Bɛhilehile nzenzaleɛ ɛhye mɔ nee adehilelɛ mɔɔ kile kɛzi bɛbayɛ sukulu gyimalilɛ foa ne mɔ la anu wɔ ɛdendɛkpunli ne mɔ mɔɔ doɔdoa zo la anu.
3 Baebolo Ɛgengalɛ Nu Edwɛkɛ Titile: Mediema mɔɔ bɛbava gyimalilɛ ɛhye bɛamaa bɛ la bava mitini nwiɔ ahilehile dapɛne Baebolo ɛgengalɛ ne anu Ngɛlɛlera ko mɔɔ baboa bɛ la anu. Saa bɛsiezie bɛ nwo kpalɛ a, ɔbamaa bɛava mekɛ mɔɔ bɛhile la bɛaha edwɛkɛ mɔɔ baboa asafo ne la. Ɔwie a tievolɛma bava mitini nsia ne mɔɔ bɛfa bɛmaa mualɛ dɛba la amaa mualɛ mɔɔ ko biala le kɛkɛ 30 anzɛɛ mɔɔ ɛndwu zɔ wɔ mɔɔ bɛ nye liele nwo wɔ dapɛne Baebolo ɛgengalɛ ne anu la anwo. Amaa yɛahola yɛaha edwɛkɛ kpalɛ wɔ kɛkɛ 30 anu la, ɔhyia anwoziezielɛ nee mɔdenlebɔlɛ, noko ɛhye batete yɛdayɛ mumua ne. Eza ɔmaa awie mɔ kola ka mɔɔ bɛzukoale la anwo edwɛkɛ.
4 Gyimalilɛ No. 1: Bɛde mekɛ mɔɔ bɛfa bɛkenga Baebolo ne la azo bɛyɛ ye mitini nsa anzɛɛ mɔɔ ɛndwu zɔ la na ahenle bagenga edwɛkɛ ekyi bie ala. Ɔwɔ kɛ menli mɔɔ bɛbava gyimalilɛ mɔɔ le ɛgengalɛ bɛamaa bɛ la kenga ye kpole fane dɔɔnwo na bɛfa bɛ adwenle bɛsie edwɛkɛ agbɔkɛ mɔɔ bɛbobɔ bɛ kpalɛ na bɛagenga bɛamaa nuhua ala ɛkɛ la azo amaa bɛagenga bɛamaa ndelebɛbo ara nu. Ɔwɔ kɛ Gyihova menli kɔsɔɔti bɔ mɔdenle kɛ bɛbagenga kpalɛ ɔluakɛ ɛgengalɛ hyia kpalɛ wɔ yɛ ɛzonlenlɛ nu. Nea kɛzi yɛ ngakula dɔɔnwo mɔɔ bɛkenga kpalɛ la maa yɛ nye die a! Ɔwɔ kɛ yɛkanvo awovolɛ wɔ ɛlɔlɛ nu mɔɔ bɛfi bɛboa bɛ ngakula ne mɔ bɛmaa bɛyɛ kengavolɛma kpalɛ la anwo.
5 Gyimalilɛ No. 2: Bɛbava ɛhye bɛamaa adiema raalɛ, na ɔbava mitini nnu a yeayɛ a. Ɔwɔ kɛ ɔfa edwɛkɛtile mɔɔ bɛva bɛmaa ye la ɔdi gyima. Saa gyimalilɛ ne gyi edwɛkɛ mɔɔ wɔ Sukoa Mɔɔ Wɔ Nyamenle Edwɛkɛ Ne Anu La anzɛɛ Edwɛkpa Mɔɔ Vi Nyamenle Ɛkɛ azo a, ɔwɔ kɛ sukoavo ne maa ɔfane daselɛlilɛ ne foa titile bie mɔɔ fɛta bɛ ɛkɛ ne azɛlɛsinli ne la anwo. Saa gyimalilɛ ne gyi edwɛkɛ mɔɔ wɔ Me Buluku Mɔɔ Ɔka Baebolo nu Edwɛkɛ ne anu la azo a, ɔwɔ kɛ sukoavo ne sukoa edwɛkɛ ne, ɔkpa ngɛlɛlera mɔɔ fɛta mɔɔ ɔbava yeali gyima la na ɔkile mɔɔ yɛbahola yɛazukoa yɛavi Baebolo nu edwɛkɛ ne anu la. Ɔbahola yeava ngɛlɛlera gyɛne mɔɔ fane edwɛkɛtile ne anwo la yeaboka nwo. Sukulu zo neavolɛ ne bamaa ye boavolɛ ko.
6 Gyimalilɛ No. 3: Ɛhye le mitini nnu na bɛbava bɛamaa adiema nrenya anzɛɛ raalɛ. Saa bɛfa bɛmaa adiema raalɛ a, ɔbayɛ ye kɛmɔ bɛyɛ Gyimalilɛ No. 2 ne la. Saa bɛfa bɛmaa adiema nrenya na edwɛkɛ ne gyi Me Buluku Mɔɔ Ɔka Baebolo nu Edwɛkɛ ne azo a, ɔbava ye adwenle yeazie tievolɛma anwo zo na yeamaa ye kɛ ɛdendɛlɛ. Ɔwɔ kɛ sukoavo ne kilehile edwɛkɛtile ne mɔɔ bɛva bɛmaa ye la anu, ɔkpa ngɛlɛlera mɔɔ fɛta mɔɔ ɔbava yeali gyima la na ɔkile mɔɔ yɛbahola yɛazukoa yɛavi Baebolo nu edwɛkɛ ne anu la.
7 Bɛhakyi Gyimalilɛ No. 3 Ne Mɔɔ Bɛfa Bɛmaa Mediema Mrenya La Anu: Saa bɛfa gyimalilɛ ne bɛmaa adiema nrenya na ɔgyi Sukoa Mɔɔ Wɔ Nyamenle Edwɛkɛ Ne Anu La anzɛɛ Edwɛkpa Mɔɔ Vi Nyamenle Ɛkɛ la azo a, ɔwɔ kɛ ɔyɛ ye yɛkile mɔɔ fane abusua ɛzonlenlɛ anzɛɛ daselɛlilɛ nwo. Fane dɔɔnwo ne ala sukulu zo neavolɛ ne bamaa sukoavo ne boavolɛ na yeahile kɛzi bɛbayɛ ye la. Ɔwɔ kɛ boavolɛ ne yɛ sukoavo ne abusua ne anu sonla anzɛɛ adiema nrenya mɔɔ wɔ asafo ne anu. Ɔbahola yeava ngɛlɛlera gyɛne mɔɔ twe adwenle kɔ Baebolo ngyinlazo zo na ɔfane edwɛkɛtile ne anwo la yeaboka nwo. Ɔyɛ a bɛbamaa kpanyinli ayɛ gyimalilɛ ɛhye. Mgbanyima bahola akpa bɛ boavolɛ nee kɛzi bɛbayɛ ye la. Nɔhalɛ nu, saa mediema nwu kɛzi mgbanyima kilehile bɛ abusua ne anzɛɛ adiema gyɛne kpalɛ la a, ɔbaboa bɛ kpalɛ.
Tie folɛdulɛ na fa di gyima amaa wɔanyia anyuhɔlɛ
8 Folɛdulɛ: Saa sukoavo biala yɛ ye gyimalilɛ ne wie a, sukulu zo neavolɛ ne bava mitini nwiɔ ahanvo ye anzɛɛ agyinla Benefit From Theocratic Ministry School Education ne azo adu ye folɛ mɔɔ fɛta la. Saa sukulu zo neavolɛ ne ɛlɛfɛlɛ sukoavo bie wɔ bama ne azo a, ɔnrɛha folɛdulɛ foa mɔɔ sukoavo ne bali nwolɛ gyima la. Saa bɛwie gyimalilɛ ko biala a, ɔwɔ kɛ sukulu zo neavolɛ ne fa nganvolɛ mɔɔ fɛta la maa sukoavo ne, ɔka ɛdendɛlɛ subane mɔɔ ɛnee sukoavo ne ɛlɛdi nwolɛ gyima la, na ɔka deɛmɔti ɔyɛle foa zɔhane kpalɛ la anzɛɛ ɔfi ɛbulɛ nu ɔkile deɛmɔti ɔwɔ kɛ sukoavo ne nyia anyuhɔlɛ wɔ foa zɔhane anu la.
9 Sukoavo biala folɛdulɛ kɛlata ne wɔ ɔdaye mumua ne ye Ministry School buluku ne mukelɛ 79 mɔɔ kɔdwu 81. Saa sukoavo bie wie ye gyimalilɛ ne na bɛkpɔne a, sukulu zo neavolɛ ne bahɛlɛ sukoavo ne buluku ne anu na yeabiza ye saa ɔyɛle gyimalilɛ ne mɔɔ fane folɛdulɛ foa ne mɔɔ bɛvale bɛmanle ye la anwo la a. Sukulu zo neavolɛ ne bahola ahanvo sukoavo ne na eza yeava nzuzulɛ mɔɔ baboa ye la yeamaa ye wɔ mekɛ mɔɔ bɛkpɔne debiezukoalɛ la anzɛɛ wɔ mekɛ gyɛne nu. Saa bɛ nee sukoavo ko biala yia a, ɔwɔ kɛ ɔbu ye kɛ ɔle nwolɛ adenle mɔɔ baboa ye yeamaa yeanyia anyuhɔlɛ wɔ sunsum nu a.—1 Tem. 4:15.
10 Saa sukoavo bie di mekɛ a, ɔwɔ kɛ sukulu zo neavolɛ ne anzɛɛ ye boavolɛ ne bɔ dɔne anzɛɛ debie bie azo ɔmaa ɔyɛ dede ɔmaa sukoavo ne nwu ye kɛ ye mekɛ ne ɛdwu. Ɔwɔ kɛ sukoavo ne tie dede ne na ɔdwula ye edwɛkɛ ne ɔfi bama ne azo.—Nea Ministry School buluku ne m. 282, ɛden. 4.
11 Ɔwɔ kɛ menli mɔɔ fɛta la amuala fa bɛ nwo wula Teokelase Ɛzonlenlɛ Sukulu ne anu. (Nea Ministry School buluku ne m. 282, ɛden. 6.) Ndetelɛ mɔɔ sukulu ne fa maa la boa Gyihova menli ɔmaa bɛfa anwodozo bɛka edwɛkɛ ne na bɛfa ɛbulɛ nee ɛlɔlɛ bɛka Belemgbunlililɛ ne anwo edwɛkpa ne. Nɔhalɛ nu, Gyihova anye die nwo kɛ menli mɔɔ nyia teokelase ndetelɛ zo nvasoɛ la amuala baye ye ayɛlɛ!—Edw. 148:12, 13; Aye. 50:4.