Kɛzi Yɛkilehile 1914 Mɔɔ Yɛdie Yɛdi Anu La
Ngɛlɛlera ne maa yɛ anwosesebɛ kɛ ‘dahuu yɛziezie yɛ nwo’ amaa yɛahola yɛalua “bɛtɛɛyɛlɛ” nee ɛbulɛ zo yɛabua yɛ diedi ne anwo kpuyia biala. (1 Pita 3:15, 16) Nɔhalɛ nu, ɔnla aze kɛ yɛbahilehile Baebolo nu edwɛkɛ le kɛ, kɛzi yɛnwunle ye kɛ Belemgbunlililɛ ne bɔle ɔ bo wɔ 1914 la anu. Ɛhye ati, bɛziezie edwɛkɛ nwiɔ, “Dasevolɛ Bie Nee Awie Adwelielilɛ—Mekɛ Boni A Nyamenle Belemgbunlililɛ Ne bɔle Ɔ Bo Kɛ Ɔdi Tumi A?” kɛ bɛfa bɛaboa yɛ. Edwɛkɛ ɛhye mɔ wɔ Ɛzinzalɛ Arane ne mɔɔ yɛlɛfa yɛamaa wɔ October nee November la anu. Mekɛ mɔɔ ɛlɛneɛnlea nuhua edwɛkɛ ne mɔ anu la, suzu kpuyia mɔɔ doɔdoa zo mɔɔ fane debie mɔɔ Cameron, nolobɔlɛnli ne mɔɔ wɔ edwɛkɛ ne anu la yɛle la anwo.
Kɛzi ɔholale . . .
ɔluale nganvolɛ zo ɔmanle bɛdiele ye edwɛkɛ ne ɛ?—Gyi. 17:22.
ɔlale mɛlɛbɛnwoaze ali wɔ mekɛ mɔɔ ɔkilehile ye diedi ne anu la ɛ?—Gyi. 14:15.
Duzu ati a ɛnee ɔle kpalɛ kɛ . . .
ɔdwula edwɛkɛ ko na yeava edwɛkɛ fofolɛ ɛ?
ɔta ɔgyinla na ɔbiza ye suamenle ne saa ɔdele mɔɔ ɔhilehilele nu la abo ɛ?
yeambɔ mɔdenle kɛ ɔka edwɛkɛ dɔɔnwo wɔ adawubɔlɛ ko anu a?—Dwɔn 16:12.
Nea kɛzi yɛbahola yɛayɛ Gyihova, yɛ “Kilehilevolɛ Kpole” ne mo kɛ yɛhilehile yɛ kɛzi yɛbahilehile Baebolo nu nɔhalɛ mɔɔ anu le kuloonwu la anu yɛahile menli mɔɔ nwolɛ ɛhɔne ɛlɛku bɛ la a!—Aye. 30:20.