Fa Ngapezoma Ne Yɛ Neazo—Nahum
1. Duzu a yɛsukoa yɛfi Nahum buluku ne anu a?
1 Tete Nenɛvɛ mɔɔ bɛzɛkyele ye la di daselɛ kɛ, kɛmɔ Nahum hanle la, Gyihova di ye agbɔvolɛ nzenralɛ yɛɛ kpɔvolɛ mɔɔ anwo yɛ ɛzulolɛ kpalɛ bɔbɔ la ɛnrɛhola Ɔ nyunlu gyinla. (Nahum 1:2, 6) Ɛzukoalɛdeɛ dɔɔnwo wɔ Nahum ngapezo ne anu mɔɔ baboa yɛ wɔ yɛ daselɛlilɛ gyima ne anu a.
2. Kɛ ɔkɛyɛ na yɛamaa yɛ edwɛkɛ ne ayɛ anyelielɛ ɛ?
2 Maa Bɛnyia Arɛlekyekyelɛ Nee Anyelazo: Mɔlebɛbo ne, ɛnee yeyɛ kɛ tete Aselea suakpole Nenɛvɛ ɛzɛkyelɛ nwo edwɛkɛ ala a Nahum buluku ne ka a. (Nahum 1:1; 3:7) Noko Gyihova menli anye liele edwɛkɛ ɛhye anwo. Nahum mɔɔ ye duma ne abo kile “Arɛlekyekyevolɛ” la manle ɔ gɔnwo mɔ Dwuuma anwosesebɛ kɛ, ɔnrɛhyɛ bɛ kpɔvolɛ ne abo zo baminli! Eza Nahum zile zo kɛ Gyihova le “ɛvealeka wɔ ɛmianlɛ nu.” (Nahum 1:7) Mekɛ mɔɔ yɛlɛbɔ edwɛkpa ne nolo la, yɛdayɛ noko yɛmaa awie mɔ anwosesebɛ kɛ bɛkpondɛ ɛvealeka wɔ Gyihova ɛkɛ.—Nahum 1:15.
3. Kɛ ɔkɛyɛ na yɛazukoa Nahum wɔ neazo nee ndonwo mɔɔ bɛfa bɛdi gyima la anu ɛ?
3 Fa Neazo Nee Ndonwo Di Gyima: Gyihova hanle kɛ Nahum ɛva Nenɛvɛ awieleɛ ne ɛtoto Yigyibiti suakpole Thebes (No-amon), mɔɔ Aselea mumua ne lumuale zɛkyele ye la anwo. (Nahum 3:8-10) Mekɛ mɔɔ yɛlɛka ewiade ɛtane ɛhye awieleɛ nwo edwɛkɛ yɛahile awie mɔ la, yɛbahola yɛahwe adwenle yɛazie Baebolo nu ngapezo mɔɔ si zolɛ kɛ Gyihova di ye edwɛkɛ biala azo mɔɔ bie ɛnga nu la azo. Kɛ neazo la, mekɛ mɔɔ Babelɔnma nee Mideama rale suakpole Nenɛvɛ anwo zo wɔ ɛvolɛ 632 K.Y.M la, ezule kpole mɔɔ dɔle la manle Azule Taegelese ne yile bule aze na ɔbule suakpole ne bane ne mɔɔ bɛngola ye bu la foa ko. Bɛhonle bɛvale Nenɛvɛ ndɛndɛ kɛmɔ Gyihova hanle dole ɛkɛ la.—Nahum 1:8; 2:6.
4. Saa yɛlɛdi daselɛ a, kɛ ɔkɛyɛ na yɛamaa yɛ edwɛkɛ nu ala ɛkɛ na bɛade ɔ bo ɛ?
4 Maa Wɔ Edwɛkɛ Nu Ɛla Ɛkɛ Mɔɔ Bɛte Ɔ Bo: Nahum hɛlɛle edwɛkɛ ne manle nuhua lale ɛkɛ na ɔyɛle anyelielɛ. (Nahum 1:14; 3:1) Yɛdayɛ noko yɛkpondɛ kɛ yɛka aneɛ mɔɔ ɔ bo ɛdelɛ ɛnyɛ se la. (1 Kɔl. 14:9) Wɔ kenle mɔɔ lumua la anu, maa ahenle ɛnwu deɛmɔti wɔra ɛkɛ la. Mekɛ mɔɔ ɛ nee awie mɔ ɛlɛsukoa Baebolo ne la, boa bɛ maa bɛnyia Gyihova nee ye Edwɛkɛ ne anu diedi na bɛnwu kɛzi edwɛkɛ ne fane bɛ nwo la.—Wulo. 10:14.
5. Anwodozo boni a Nahum ngapezo ne maa yɛnyia a?
5 Anwodozo mɔɔ Nahum lɛ kɛ Gyihova bali ye edwɛkɛ biala azo la da ali wɔ Baebolo buluku mɔɔ ye duma la zo la anu. Mekɛ mɔɔ Seetan ewiade ne awieleɛ ɛlɛbikye la, yɛnyia anwodozo wɔ Nyamenle edwɛkɛ ɛhye anu: “Anwongyelelɛ ɛnrɛra fane nwiɔ.”—Nahum 1:9, NW.