Bɛva Ɛvolɛ Ɛya Ko Bɛbɔ Belemgbunlililɛ Ne Nolo!
1. Duzu a bɛmanle Gyihova menli anwosesebɛ kɛ bɛyɛ wɔ asɛɛ ɛvolɛ ɛya ko mɔɔ ɛze la anu a?
1 “Bɛnlea, Belemgbunli ne ɛlɛdi tumi! Bɛdabɛ a bɛbabɔ ye nolo a. Ɛhye ati bɛbɔ, bɛbɔ, bɛbɔ Belemgbunli ne nee ye belemgbunlililɛ ne nolo.” Edwɛkɛ zɔhane mɔɔ ka ahonle mɔɔ Adiema Rutherford hanle kɛyɛ ɛvolɛ ɛya ko mɔɔ ɛze ɛhɔ la manle Gyihova menli anwosesebɛ ɔmanle bɛbɔle Belemgbunlililɛ nrɛlaleɛ ne nolo wɔ ɛleka biala. Yɛdayɛ noko yɛbɔ edwɛkpa mɔɔ fane Belemgbunlililɛ ne anwo la nolo yɛhile “abɔdeɛ muala mɔɔ wɔ aleɛabo la” kɛmɔ alumua Keleseɛnema yɛle la. (Kɔl. 1:23) Saa yɛnea ɛvolɛ ɛya ko mɔɔ ɛze ɛhɔ la a, duzu a yɛyɛ yɛbɔ Nyamenle Belemgbunlililɛ ne nolo a? Kɛzi yɛbahola yɛadoa zo yɛabɔ Belemgbunlililɛ ne nolo wɔ mekɛ mɔɔ asɛɛ yeli ɛvolɛ 100 la ɛ?
2. Kɛzi yɛ mbuluku ne mɔ ɛha Nyamenle Belemgbunlililɛ ne anwo edwɛkɛ ɛ?
2 Mɔɔ Yɛyɛ La: Yɛ mbuluku ne mɔ ɛha Nyamenle Belemgbunlililɛ ne anwo edwɛkɛ wɔ ɛvolɛ dɔɔnwo anu. Ɔvi 1939, bɛvɛlɛ yɛ magazine titile ne: Ɛzinzalɛ Arane Ɔbɔ Gyihova Belemgbunlililɛ Nolo. Magazine ɛhye ta kilehile Belemgbunlililɛ ne nee mɔɔ ɔbayɛ la anu. Awake! magazine ne noko si zolɛ kɛ Nyamenle Belemgbunlililɛ ne ala a le alesama anyelazo a. Nea kɛzi ɔfɛta kɛ magazine nwiɔ ɛhye mɔ a bɛkile ɔ bo na bɛkyehyɛ bɛ dɔɔnwo kpalɛ wɔ ewiade ye anu a!—Yek. 14:6.
3. Ndenle mɔɔ yɛlɛdua zo yɛabɔ Belemgbunlililɛ ne nolo la bie a le boni?
3 Gyihova menli ɛlua ndenle dɔɔnwo azo ɛbɔ Belemgbunlililɛ ne nolo. Alumua ne, yɛvale kale mɔɔ speaker gyi zo, riledio nee gramafuu yɛlile gyima. Ndenle ɛhye mɔ boale yɛ manle yɛhanle edwɛkpa ne yɛhilele menli dɔɔnwo wɔ mekɛ mɔɔ ɛnee Belemgbunlililɛ nolobɔlɛma anzo la. (Edw. 19:4) Ɛvolɛ ekyi mɔɔ ɛze la, yɛva edwɛkɛ yɛgua jw.org ɛkɛ, ɔlua zo yɛlɛbɔ Belemgbunlililɛ ne nolo yɛahile menli mgbe dɔɔnwo—mɔɔ menli mɔɔ wɔ maanle mɔɔ bɛva bɛ sa bɛdo yɛ gyima ne azo la boka nwo la.
4. Ndenle titile boni a yɛlɛfa yɛali gyima a?
4 Eza Gyihova menli ɛlua ndenle titile bie mɔ azo ɛdɛlɛ Belemgbunlililɛ edwɛkɛ ne anu. Kɛ neazo la, ɔbɔ ye 1990 avinli ɛkɛ ne mɔɔ ba la, yɛbɔle mɔdenle kɛ yɛmia yɛ azua nu daselɛlilɛ gyima ne anu ɔlua ɛleka mɔɔ menli dɔɔnwo yia di nwɔhoa, kale agyinlaleɛ nee gyima mgbole nu mɔɔ yɛkɔ la azo. Kenlensa ye, yɛyɛ suakpole zo bagua nu daselɛlilɛ titile nwo ngyehyɛleɛ wɔ azuamgbole mɔɔ wɔ ewiade amuala la azo. Eza asafo dɔɔnwo ne ala ɛlɛfa bɛ nwo awula bagua nu daselɛlilɛ nu wɔ bɛ azɛlɛsinli ne mɔ anu ɔlua mbuluku mɔɔ bɛfa bɛgua ɛkponle nee ehwili zo wɔ ɛleka mɔɔ menli dɔɔnwo fa la azo. Nɔhalɛ nu, azua nu daselɛlilɛ ne le adenle titile mɔɔ yɛdua zo yɛbɔ Belemgbunlililɛ ne nolo a.—Gyi. 20:20.
5. Nwolɛ adenle boni a ɛzonlenlɛ ɛvolɛ fofolɛ ne bamaa yɛ nuhua dɔɔnwo anyia a?
5 Mɔɔ Gyi Yɛ Nye Zo: Wɔ ɛzonlenlɛ ɛvolɛ fofolɛ ne mɔɔ babɔ ɔ bo September la anu, menli dɔɔnwo babɔ ɔ bo ayɛ dahuu adekpakyelɛma. Ɛbayɛ bie ɔ? Saa ɛnrɛhola a, ɛbahola wɔayɛ adekpakyelɛ boavolɛ wɔ mekɛ bie mɔ anu ɔ? Saa ɛkola ɛyɛ adekpakyelɛnli anzɛɛ wɔangola bɔbɔ a, Gyihova bayila wɔ wɔ afɔle biala mɔɔ ɛbabɔ ye wɔ Belemgbunlililɛ nolobɔlɛ ne anwo la azo.—Mal. 3:10.
6. Duzu ati a October 2014 bayɛ siane titile ɛ?
6 Belemgbunlililɛ ne bali ɛvolɛ 100 wɔ October 2014. Ɛhye ati, ɔle kpalɛ kɛ zɔhane siane ne maanlema Ɛzinzalɛ Arane ne twe adwenle sie Nyamenle Belemgbunlililɛ ne azo la. Duzu ati a ɛmbɔ mɔdenle kɛ ɛbamaa menli dɔɔnwo asa aha bie ɛ? Mekɛ mɔɔ yɛlɛnea kenlebie ade la, ɔrɛla ye kɛ yɛ nuhua ko biala bahɔ zo aha “edwɛkpa ne mɔɔ fane Nyamenle Belemgbunlililɛ ne anwo” la ahile awie biala mɔɔ badie la.—Gyi. 8:12.