Fa Ngapezoma Ne Yɛ Neazo—Zɛfanaya
1. Tɛnlabelɛ boni anu a Zɛfanaya yɛle ye ngapezo gyima ne a, na kɛzi ɔle neazo kpalɛ ɔmaa yɛ ɛ?
1 Wɔ ɛvoya nsuu avinli K.Y.M, ɛnee Beeyale ɛzonlenlɛ ɛbu wɔ Dwuda. Bɛhunle Belemgbunli atisesebɛ Emɔn la ɛtɛkyɛle biala na ɛnee Belemgbunli Dwosaya mɔɔ le kakula la a ɛlɛdi tumi a. (2 Edk. 33:21–34:1) Wɔ zɔhane mekɛ ne, Gyihova kpale Zɛfanaya kɛ ɔha Ye ndɛnebualɛ ne ɔhile Dwudama. Ɔnva nwo kɛ ɛnee ɔbayɛ kɛ Zɛfanaya boka Dwuda dehelɛ abusua ne anwo la, ɔhanle Gyihova ndɛnebualɛ nrɛlaleɛ ne mɔɔ tia Dwuda tumililɛ ne la anyebolo zo. (Zɛf. 1:1; 3:1-4) Zɔhane ala a yɛsukoa Zɛfanaya akɛnrasesebɛ ne na yɛbɔ mɔdenle kɛ yɛnrɛmaa abusua nwo ɛlɔlɛ ɛnrɛha ɛzonlenlɛ mɔɔ yɛfa yɛmaa Gyihova la wɔ adenle ɛtane zo a. (Mat. 10:34-37) Edwɛkɛ boni a Zɛfanaya hanle a, na duzu a vile nuhua rale a?
2. Duzu a ɔwɔ kɛ yɛyɛ na yɛanyia ngoane wɔ Gyihova ɛya kenle ne anu a?
2 Bɛkpondɛ Gyihova: Gyihova angomekye a bahola alie menli ngoane wɔ ye ɛya kenle ne anu a. Ɛhye ati, Zɛfanaya zele Dwudama kɛ bɛkpondɛ Gyihova, bɛyɛ mɔɔ le tenlene na bɛbɛlɛ bɛ nwo aze wɔ mekɛ mɔɔ ɛha la anu. (Zɛf. 2:2, 3) Zɔhane ala a ɔde ye ɛnɛ a. Kɛ Zɛfanaya la, yɛsi menli adua kɛ bɛkpondɛ Gyihova, noko ɔwɔ kɛ yɛdayɛ noko yɛbɔ mɔdenle kɛ ‘yɛnrɛhakyi yɛ nzi yɛnrɛzi Gyihova ɛlɛ.’ (Zɛf. 1:6) Emomu, yɛkpondɛ Gyihova ɔlua ye Edwɛkɛ ne mɔɔ yɛbazukoa ye kpalɛ na yɛakpondɛ adehilelɛ yɛavi ye ɛkɛ ne la azo. Yɛkpondɛ tenleneyɛlɛ ɔlua ɛbɛla kpalɛ mɔɔ nwolɛ te mɔɔ yɛbabɔ la azo. Saa yɛnyia mɛlɛbɛnwoaze subane na yɛdie adehilelɛ mɔɔ vi Gyihova ahyehyɛdeɛ ne anu la yɛto nu ndɛndɛ a, ɔkile kɛ yɛbɛlɛ yɛ nwo aze.
3. Duzu ati a ɔwɔ kɛ yɛnyia ɛzonlenlɛ gyima ne anwo adwenle kpalɛ ɛ?
3 Nvasoɛ Bara Zo: Yeanyɛ boɛ fee la, Dwuuma bie mɔ diele Zɛfanaya ngapezo edwɛkɛ ne, bie a kakula Dwosaya diele ye kpalɛ wɔ mekɛ mɔɔ ɔbɔle ɔ bo kɛ ɔkpondɛ Gyihova wɔ ye ngakula nu la. Amozi Dwosaya bɔle ɔ bo kɛ ɔtu awozonle ɛzonlenlɛ bo wɔ maanle ne anu. (2 Edk. 34:2-5) Ɛnɛ, ɔnva nwo kɛ Belemgbunlililɛ edwɛkɛ ne mɔɔ le kɛ ma la bie gua adenle nu, azɛlɛ mɔɔ awolɛ wɔ nu la azo anzɛɛ mbowule nu la, bie mɔ gua azɛlɛ kpalɛ zo na ɔso ma. (Mat. 13:18-23) Yɛlɛ anwodozo kɛ Gyihova bahɔ zo ayila mɔdenle mɔɔ yɛbɔ kɛ yɛbaha Belemgbunlililɛ edwɛkɛ ne anyebolo zo la azo.—Edw. 126:6
4. Duzu ati a ɔwɔ kɛ ‘yɛkendɛ Gyihova’ ɛ?
4 Dwudama bie mɔ dele nganeɛ kɛ Gyihova ɛnrɛyɛ ɛhwee. Noko Gyihova manle bɛnwunle kɛ ye kenle kpole ne ɛbikye. (Zɛf. 1:12, 14) Menli mɔɔ bɛbakpondɛ ɛvealeka wɔ ye ɛkɛ ne la angome a bɛanyia ngoane a. (Zɛf. 3:12, 17) Mekɛ mɔɔ ‘yɛlɛkendɛ Gyhova la,’ ɔrɛla ye kɛ koyɛlɛ mɔɔ yɛ nee yɛ mediema azonvolɛ ɛlɛfa azonle yɛ Nyamenle ne la bamaa yɛ nye alie!—Zɛf. 3:8, 9.